11.17.2008

ကိုရင်မောင်နှင့်စကားစမည်

သော့အိမ်က “ပွဲ”


ကိုရင်မောင်ရေ

ကျုပ်တော့ ခုတလော “အငြိမ့်လွမ်းနာ”ကျနေတယ်ဗျာ။ စိတ်ထဲ ပျံလွန်တော်မူသွားတဲ့ ရွာဦးကျောင်းဆရာတော်ကြီး တောင်သတိရမိသေးတော့။ မှတ်မိသေးလား။ ဆရာတော်ကြီးရှိတုန်းကများဆို ရွာမှာ ပွဲလေးလမ်းလေးများ တခုခုပေါ်လို့  သွားလျှောက်တိုင်း “အိမ်း… အငြိမ့် လေးတော့သွင်းကွာ” လို့  မိန့်

တတ်တာလေ။ ကျုပ်နဲ့ များ အစေးကပ်ပါ့။ “အရှင်ဘုရား… ဒီတစ်ခေါက်တော့ ဆောင်းမင်းသမီးလေး ၀င်းဝင်းအေးရဲ့ “ဆောင်း” အငြိမ့်ဆို ကောင်းမယ်ဘုရာ့” ဘာညာနဲ့  မိချောင်းမင်း ရေခင်းပြ သွားသွားလုပ်ရတာအမော။ တကယ်က သူကကျုပ်ထက်တောင် ပါးသေး။ လှစ်လှစ်လေးရယ်။ ဒါပေသိ “ ဟေ့…. တကာတို့ ၊ ဟိုတယောက်ကတော့ ပြောနေပါလား။ “ဆောင်း” အငြိမ့် ကောင်းမယ်ဆိုဘဲ” ဒီလိုသာမိန့် ၊ အများညီညီ မညီညီ ဒီတချီတော့ “ဆောင်း” သာငှားလိုက်ပေရော့။ အငြိမ့်ဆို ကျုပ်အသေအလဲကြိုက်တာ ခင်ဗျားလည်းအသိသား။ အပြင် ပြန်ရောက်ရင် အငြိမ့်တွေ တ၀တပြဲကြည့်လိုက်မဟဲ့လို့  မောင်းတင်လာတာဗျာ။ အပြင်လည်းရာက်ရော သောက်ကျိုးနည်း၊ ဘယ်မလဲ အငြိမ့်၊ မူးလို့ တောင်ရှူစရာမရှိဘူး။ ဗွီဒီယိုအငြိမ့်ခွေတွေတော့ တွေ့  ပါရဲ့ ။ ကြည့်ကြည့်ပြန် တော့၊ ခလေးတွေ ပြော သလို ဘာဖီလင်မှမလာဘူး။ တချို့ ပြက်လုံးတွေများ ချက်အောက်ကကို မတက်တတ်တော့ဘူး။ မောင်နဲ့ နှမ သားနဲ့ အမိ ထိုင် ကြည့်ဖို့ တောင်မျက်နှာပူစရာကြီးရယ်။ လူကိုလည်း အတင်းဂလိထိုးရယ်ခိုင်းလားရယ်ခိုင်းနဲ့ ။ အငြိမ့်မှာ လူရွှင်တော်ပြက်လုံးက သိပ်စကားပြောတာဗျ။ ကျုပ်အငြိမ့်ကိုစွဲတဲ့အထဲမှာ ရယ်ချင်တာလည်းပါသဗျ၊ လူကသာ ဟာသဓါတ်ခံမရှိတာ။ တစိမ့်စိမ့်တွေးပြီး ရယ်ရတဲ့ ပြက်လုံးနဲ ၊့ မပြုံးပဲဝါးလုံးကွဲပြက်လုံး နှစ်ခုလုံးကြိုက်တာ။ နောက်တခု အငြိမ့်ကိုကျုပ်ကြိုက်တာ အငြိမ့်မှာရုံပွဲမရှိဘူး လေဗျာ။ အငြိမ့်တို့  ပွဲတို့  ဆို ကျုပ်က ဗလာပွဲမှကြိုက်တာ။ ရုံနဲ့  ဘာနဲ့  ဆို ပွဲကြည့်ရတယ်လို့ မမှတ်ဘူး။ ပွဲကြည့်ရင်း တန်းလန်းက အမိုးအကာမဲ့ ဟင်းလင်းပြင်ကြီးကို မော့ကြည့်လိုက်၊ ချမ်းလာရင် လျှောစောင်လေးဆွဲပတ်လိုက်၊ အဖန်ရည်လေးငှဲ့ သောက် ဆေးပေါ့လိပ်လေး တဖွာနှစ်ဖွာလောက်ဖွာလိုက် တိုးတိုးဝှေ့ ဝှေ့ နဲ့  ပွဲကြည့်ရတဲ့အရသာများ တယ်မမေ့ချင်ဘူးဗျ။ နည်းနည်းလေး ငြီးလာလို့ များကတော့၊ ပွဲဝိုင်းကထွက် ပွဲဈေးတန်းလျှောက် ခဲတန်ခြေထောက်ကလေး၊ အကြော်လေး ဘာလေးဝါးပေါ့ဗျာ။ ချမ်းရင်လည်း လှည်းဝိုင်းတွေနားသွား တွေ့ တဲ့မီးပုံ ၀င်သာလှုံ ဘယ်သူ့ ဘယ်သူမှ အားနာနေစရာလည်းမရှိ။ ကံကောင်းရင် အဖန်ရည်လေးများတောင် သောက်ရချည်သေး။ လွတ်လပ်တယ်ဗျ။ အဲသလို ညလုံးပေါက်ကြည့်တဲ့ပြီး မနက် လင်းတော့ ပွဲကိုက်ဒဏ်ဖျောက်ဖို့ နေနေသာသာ တနေ့ လုံး အပြေးအလွှား ရှာဟယ်ဖွေဟယ်နဲ့  နောက်ညဆို ခေါင်းချတာနဲ့  တုံးကနဲ။

ပွဲဆိုလို့ သော့အိမ်ထဲကပွဲအကြောင်း ခင်ဗျားကို ပြောပြရဦးမယ်။ အထဲမှာ ပွဲကြည့်ရဖို့ လား၊ ဝေးစွခြောက်ပါး။ ကျုပ်တို့ ဟာ ကျုပ်တို့  လုပ်ခဲ့တဲ့ပွဲဗျ။ ဇတ်ပွဲ အငြိမ့်ပွဲတော့မဟုတ်ပါဘူး။ ကျုပ်တို့ ဆိုလို့  ကျုပ်ပါတယ်မထင်နဲ့ ။ ကျုပ်ကပရိသတ်ပွဲငတ်နေတဲ့ ကောင်သက်သက်။ ကျုပ်အဲသလောက်မစွမ်းတာ ခင်ဗျားလည်းသိသားနဲ့ ။ ဒီလိုဗျ။ ၂၀၀၂ သင်္ကြန်လို့ မှတ်တယ်။ နေရာ ကတော့ဗျာ သုပဏ္ဏကဂဠုနရာဇာ ရဲ့  ဘူမိနက်သန်မှာပေါ့။ ကျုပ်တို့ “အိမ်” ကိုလည်း ကမ္ဘာ့ကြက်ခြေနီအဖွဲ့ က မျက်နှာဖြူတွေ အ၀င်အထွက်ကလည်း ခပ်စိတ်စိတ်ကလေး ရှိလာနေချိန်မျိုးလေဗျာ။ ဟေ့လူရေ…. အိမ်ရှင်တွေက ကျုပ်တို့ ပွဲလေးလုပ်မယ် ဆိုတော့ အင်တင်တင်နဲ့ ၊ ပေးမလုပ်ချင်ဘူး။ မလုပ်ပါနဲ့ လို့  တော့လည်း အတင်းကြီးမတားဘူး။ တဖက်လှည့်နဲ့  လူကြီးတွေ ကတဆင့် ထိန်းထိန်းသိမ်းသိမ်းလေးတော့လုပ်ဗျာ ..တဲ့။

ကိုယ့်လူတွေကလည်း သိတဲ့အတိုင်း၊ အူယားနေတဲ့ကောင်တွေ။ ဆိုတော့… သိကြားမင်းနားကင်းကြီးနဲ့ လာတောင်မရဘူးမှတ်။ လူကြီးတွေက ထိန်းထိန်းသိမ်းသိမ်းလေးလုပ်ကြပြောတော့ “ဟုတ်ကဲ့” ဆိုပြီးချတာဗျို့ ။ ကျုပ်တို့ ကလည်းတွက်ပါတယ်။ ဒါလေး တော့ ဖြစ်အောင်လုပ်ကြမယ်။ ဒါပေမယ့် ဘာမှနောက်ဆက်တွဲပြဿနာတွေမပေါ်အောင် အားလုံးထိန်းကြမယ်ပေါ့။ ပြက်လုံးတွေဘာတွေဆိုလည်း ရယ်သလိုမောသလိုနဲ့  သူကြီးနဲ့ သူ့ ကောင်တွေကို မထိတထိလေးကလိမယ်ပေါ့ဗျာ။ တကယ် လည်းထိန်းပါတယ် ပွဲသာပြီးရော ဘာပြဿနာမှမတက်ခဲ့ပါဘူး။ ဘယ်သူတွေလည်းဆိုတော့ ကျုပ်မှတ်မိသလောက် ပြည်သား ကိုဗရှီး လို့ ခေါ်တဲ့ သန်းထိုက်အောင်ရယ်၊ တရုပ်မကြီးလို့ ခေါ်တဲ့ သန်းထိုက်ဝင်းရယ်၊ ကိုညွန့် ဇော်ရယ်(ကွယ်လွန်) မျောက် ကြီးလို့ ခေါ်တဲ့ကိုစိုးထိုက်ရယ်၊ ကိုကျော်ကျော်ဦးရယ် နောက်ဒီ့ပြင်သူတွေလည်းပါသေးသဗျ။ ကျုပ်လည်းကောင်းကောင်း မမှတ်မိတော့ဘူး။ ဇတ်ကောင် ဇတ်ဆောင်တွေလည်း ကျုပ်တို့ ၊ ပရိတ်သတ်လည်းကျုပ်တို့  မဟန်လားဗျာ။ ဝေဖန်ရေးဆရာတွေ ပါးစပ်နဲ့ လည်း ဝေးတော့ကာ သူတို့ ကောင်းမှ ကောင်းရမယ်တို့  သူတို့ မကောင်းရင် မကောင်းရဘူးတို့ မရှိတော့ဘူးဗျို့ ။ အားလုံးကောင်းပါသည်ခင်ဗျားပေါ့ဗျာ။

အက ကလည်း ကောင်းသလားမမေးနဲ့။ ဒီကောင်မို့ ရှာရှာဖွေဖွေ ဘယ်ကဘယ်လို ကြံဖန်ပြီး အထဲသွင်းထားတယ်မသိပါဘူး။ ဘရာစီယာတွေ၊ ဘော်လီတွေ၊ မိန်းမအ၀တ်အစားတွေ၊ နှုတ်ခမ်းနီမိတ်ကပ်တွေလူးလို့ ။ နောက်ခံကားလိပ်က အထဲကရရာ အရောင်တွေနဲ ဆေးရောင်စုံခြယ်ထားတဲ့ ပုံစံစောင်တွေပေါ့ဗျာ။ တိုက်ခန်းကျဉ်းလေးထဲက ရှေ့ ထွက်လာတော့ မိန်းမလိုအ၀တ် အစားတွေ နှုတ်ခမ်းနီပါးနီတွေဆိုးလို့ ။ နွဲ့  တဲ့ နွဲ့ တဲ့နဲ့ ။ ကိုသက်ဦးကြီးဆို သူတို့ ကြည့်ပြီး တဟားဟားနဲ့ ။ ကိုဗရှီးက လူကောင် က သေးသွယ်သွယ်၊ မျက်တောင်က ကော့ကော့၊ မျက်လုံးမျက်ဖန်ကကောင်းကောင်း မိန်းမလိုဝတ်လိုက်တော့ မဆိုးဘူး။ ကိုစိုးထိုက်ကတော့က လူက ဂလန်ဂလား၊ မျက်ခွက်ကလည်းအပြောင်စား၊ မျက်နှာကရှည်ရှည်နဲ့ မိန်းမလို သူနွဲ့ တော့ ကို့ ရို့  ကားယားနဲ့ ၊ ရယ်ရတာ အူ့ ကိုတက်ရော။ တရုပ်မကြီးကတော့ လူက ဖြူဖြူဖွေးဖွေး၊ ခပ်ဖိုင့်ဖိုင့်လေးရယ် သူလည်း မျက်နှာတော့ အတော်ပြောင်တာ။ ကကြရောဆိုပါတော့။ ဟာဝိုင်အီ ကျွန်းသူလေးများအက..တဲ့။ မဆိုးပါဘူးကြည့်ကောင်းသား။ ညီလည်းညီတယ်။ ပရိသတ်ရှေ့ တိုးလာလိုက်၊ လိုက်ကာနား ပြန်ဆုတ်လိုက်ပေါ့။ ပါးစပ်တီးလုံးတွေကလည်း မြိုင်မြိုင်ဆိုင်ဆိုင်။ ကရင်းနဲ့  ငတိတွေက ကြည့်နေသူတွေကို မျက်စပြစ်လိုက်ဘာလိုက်နဲ့  ခရာတာတာကလုပ်သေး။ တောက်လျှောက် ဟုတ်နေ တာ။ ကျုပ်ကလည်း ထိုင်ကြည့်နေတာ။ ကျုပ်ဘေးမှာက တခြားလူကြီးတွေနဲ့ အတူ ပေါက်ခေါင်းက ဆရာကြီး ဦးစောနေဒွန်း လည်းထိုင်လို့ ။(ခုတော့ ကွယ်လွန်ရှာပါပြီ) သွားကျိုးပါးကျိုးနဲ အားရပါးရရယ်ရင်း ကျုပ်ကိုတောင် လှည့်ပြောလိုက်သေးတယ် “ဒီကောင်တွေ အတော်ပျော်နိုင်တဲ့ကောင်တွေ” တဲ့။ ကရင်းနဲ့ သီချင်းလည်းဆုံးတော့မယ် ပရိသတ်ကလည်း သဘောတွေ ကျနေတုန်း၊ ဗြုန်းဆို… တီးလုံးတိကနဲရပ်၊ သူတို့ ကလည်း ပရိသတ်နဲ့  အနီးဆုံးရှေ့ နားကိုအရောက်၊ မျက်နှာနားတောင် ကပ်တော့မယ့်နီးနီး၊ မောင်တွေက ဘာလုပ်လိုက်တယ်မှတ်သလဲ။ ၀တ်ထားတဲ့ ဂါဝန်လိုဟာကြီးတွေကို ဇတ်ကနဲ အပေါ်ကို လှန်တင်လိုက်တာဗျား။ ပရိသတ်လည်း ရုတ်တရက်တော့ တိတ်ကျသွားတယ်။ ပြီးမှ“ ဟား.. ဟေး.. ဝေး.. ၀ါး” နဲ့  ၀ိုင်းဩဘာပေးလိုက်ကြတာ ဆူညံပြီးပွဲကိုကျရော။ ကောင်းလိုက်တဲ့ ဟာသကွက်ကလေးဗျာ။ ကျုပ်မမေ့ဘူး။ အောက်ခံ ဘောင်းဘီတွေတော့ ကိုယ်စီဝတ်ထားတာပေါ့ဗျ၊ ခင်ဗျားကလည်း။

နောက်တကွက်မှတ်မိနေသေးတာက ကိုညွှန့် ဇော်(သူလည်းအထဲမှာ ကျဆုံးသွားရှာတဲ့ရဲဘော်ပါ)။ သူက မြန်မာ့ရုပ်မြင်သံကြား သတင်းကြေညာသူနဲ့  အင်တာဗျူးဖြေသူ လုပ်တဲ့အခဏ်းဗျ။ ရရာကတ္ထူ စက္ကူပြားတွေနဲ့  လူ့ ကိုယ်တပိုင်းစာဆန့် တဲ့အရွယ် ရုပ်မြင်သံကြားပုံတခုကို အသင့်ထောင်ထားတယ်။ အံမယ်… ကဒ်ပြားမှာ တီဗွီခလုပ်တွေဘာတွေတောင် ဆွဲထားသေး။ သူက အနောက်က ၀င်ရပ်လိုက်တော့ ရင်ခေါင်းအထက်ပိုင်းက၊ ဖန်သားပြင်ပုံဖေါက်ထားတဲ့အပေါက်နဲ့ ကွက်တိရယ်။ မဆိုးဘူး တူတယ်။

သူလည်းမျက်နှာတော့ ပြောင်ချော်ချော်ရယ်။ မိတ်ကပ်တွေ အဖွေးသားနဲ့ ။ ရှေ့ ကကြည့်နေတဲ့ တယောက်က ထတဲ့ပြီး စက္ကူပေါ်က တီဗွီခလုပ်ကို လှည့်လိုက်တယ်။ ခဏလေးနေတော့ ကိုညွှန့် ဇော်မျက်နှာကြီးက တီဗွီအပေါက်ထဲကနေ စပ်ဖြီးဖြီးနဲ့  ပေါ်လာတယ်။ စာရွက်တွေဘာတွေကိုင်လို့ ။ ပြီးတော့ ခပ်တည်တည်နဲ့  ရွာကသူကြီးနဲ့  သူ့ ကောင်တွေအကြောင်းကို တွယ်တာဗျ။ ရုန့် ရင်းကြမ်းတမ်းတာ တလုံးမှမပါဘူး။ ချက်အောက်ကိုမရောက်ဘူး ပြက်လုံးတွေက။ အားလုံးလည်း သဘော တွေကျလို့  တ၀ါးဝါး.. တဟားဟား… ပေါ့ဗျာ။ အဲဒီအချိန်တုန်းက ရွာမှာ သူကြီးထက်တလကြီးတဲ့ ဟိုရာအိမ်ခေါင်းက လူတွင်ကျယ်လုပ်နေချိန်ဗျာ။ သူကြီးထက်တောင် “ဓါး” ထက်နေတဲ့ကောင်လေ။ အဲဒီကောင်ပြောဖူးတာ မှတ်မိလား “မြန်မာ့အားကစားကမ္ဘာကိုလွှမ်းစေရမည်” ဆိုတဲ့ဆောင်ပုဒ်။ အေး… အဲဒီ .. သူတို့ လုပ်လို့ ဖြစ်မလာနိုင်တဲ့ဟာကို လူတွေကို အတင်းအလွတ်ကျက်ခိုင်းပြီး၊ ဖြစ်တော့မယောင် ဇွတ်ယုံခိုင်းနေတုန်းကြီးဗျ။ ဒီကောင်လုပ်ထားတာဆိုတော့ ဟုတ်ဟုတ် မဟုတ်ဟုတ်၊ ဆယ်အိမ်ခေါင်းတွေဘာတွေကလည်း ဘာမှပြန်ပြောရဲချိန်။ တိုတိုပြောရရင်တော့ဗျာ အထိမခံနိုင်တဲ့ကိစ္စကြီးဗျ။ အဲဒါကိုမှရွေးပြီး ကျုပ်တို့ ကိုညွှန့် ဇော်က ပြက်တာ ကိုရင်မောင်ရေ။ သတင်းတွေကြေညာအပြီးမှာ အင်တာဗျူးကဏ္ဍစတယ်။ ကိုညွှန့် ဇော်နဲ့  နောက်တယောက်ပေါ်လာတယ်။ တယောက်က အင်တာဗျူးမေးသူ။ အင်တာဗျူးမေးသူက အတော်လေးရို ကျိုးတဲ့ လေသံအမူအရာနဲ့  မိုက်ခရိုဖုန်းလေးကို ကိုညွှန့် ဇော်ပါးစပ်နားတေ့ပြီး “ဟုတ်ကဲ့… ရာအိမ်ခေါင်းမင်းခင်ဗျား၊ “မြန်မာ့ အားကစား ကမ္ဘာကိုလွှမ်းစေရမည်” ဆိုတဲ့ ဆောင်ပိုဒ်အတိုင်း ဘယ်လိုအားကစားမျိုးတွေနဲ့ များ ကမ္ဘာကို လွှမ်းပြစ်လိုက်ဖို့ ရည် ရွယ်ထားပါသလဲခင်ဗျ” လို့ မေးတယ်၊ ဒီတော့ ရာအိမ်ခေါင်းနေရာက နေတဲ့ ကိုညွှန့် ဇော်က မျက်နှာကိုတည်လိုက်တယ်၊ အကျီင်္ ကော်လာနှစ်ဖက်ကို ဆွဲတင်းလိုက်တယ်၊ တကယ့်ကိုအရေးကြီးတဲ့မေးခွန်းကို ဖြေရတော့မှာမို့ လည်ချောင်းရှင်းတဲ့အနေနဲ့  ချောင်းတချက် “အဟမ်း”…. ဆိုပြီး ဟန့် လိုက်သေးတယ်။ ပြီးတော့မှ အလွန်လေးနက်တည်ကြည်တဲ့ အသံနဲ့  “သတင်းထောက်ကြီး ခင်ဗျား…. ထုတ်ဆီးတိုး၊ ကြက်ဖခွပ်နဲ့ ဖန်ခုန်တမ်းပါ” တဲ့။ ပရိသတ်လည်း ဘာပြောကောင်းမလဲ၊ ၀ါးကနဲပေါ့။ မယောင်မလည်နဲ့  ကျုပ်တို့ ဘာတွေများပြောမလဲလို့  လာလာချောင်းတဲ့ သူကြီး လက်ပါးစေတွေတောင် ရယ်ကြ တာဗျ။ အဲဒါပဲ ကျုပ်တို့ လူတွေရဲ့  မြင်တတ်ပုံလေးနဲ့  လက်စွမ်းလက်စ၊ မကောင်းလား။ ကျုပ်ရဲ့ ပွဲအငတ်လေးလည်း နည်းနည်း တော့ပြေသပေါ့။

ကျုပ်တော့ ဒီဇတ်မမြည်ပွဲမမြောက်လေးကို ခုထက်ထိမေ့မရဘူး။ အခုတော့ အဲဒီတုန်းက အတူနေခဲ့ကြသူတွေက မရှိတဲ့သူတွေလည်းမရှိကြတော့ပါဘူး။ ရှိနေသေးသူတွေကြတော့လည်း တကွဲအပြားနဲ့ တောင်ရောက်မြောက်ရောက်။ ဘယ်တော့မှ ပြန်ဆုံမယ်မှန်းလဲမသိကြတော့ပါဘူး။ တခါတခါ ပြန်သတိရရင် ပြန်ပြောဖြစ်ရင် အခုချိန်ထိ သူကြီးကိုနာတုန်း၊ ကိုယ့်လူတွေကို လွမ်းတုန်း။

မျိုးမြင့်ချို

(၁၂.၁၁.၂၀၀၈)

No comments:

Post a Comment