ဗိုလ်ချုပ်ကြီးများသို့ အိတ်ဖွင့်ပေးစာ
မောင်သြ
ဖေဖော်ဝါရီ ၁၉၊ ၂၀၀၉
မြန်မာနိုင်ငံရဲ့ နိုင်ငံရေး၊ စီးပွားရေး၊ ပညာရေး၊ ကျန်းမာရေး၊ လူမှုရေး စသည်များ တိုးတက်ခြင်း၊ ဆုတ်ယုတ်ခြင်းကို အမှန်တကယ် လေ့လာသုံးသပ်လျှင် ဆုတ်ယုတ်ခြင်းသာ ရှိကြောင်း တွေ့ရပါသည်။ ယခင်ပ အရှေ့တောင်အာရှတွင် ချမ်းသာကြွယ်ဝခဲ့သော မြန်မာနိုင်ငံဟာ လူကြီးမင်းများ (စစ်အစိုးရ) လက်ထက်တွင် အဆင်းရဲဆုံးနိုင်ငံ ဖြစ်သွားရသည်ကို ကမ္ဘာနိုင်ငံအားလုံးကပင် အသိအမှတ်ပြုခဲ့ရသလို၊ လူကြီးမင်းတို့ကိုယ်တိုင်လည်း ၀န်ခံပြီးဖြစ်ကြောင်း ငြင်းဆို၍ မရနိုင်ပါ။
ယနေ့ လူကြီးမင်းတို့ အုပ်ချုပ်ခဲ့သော ၁၉၈၈ စက်တင်ဘာလမှ စတင်ပြီး ရေးသားလိုပါသည်။ ၁၉၈၈ အရေးတော်ပုံကြီးမှ မဆလ (စစ်အစိုးရ၊ ဗိုလ်နေ၀င်း အစိုးရ)ကို ဖြုတ်ချနိုင်ခဲ့ပြီး၊ လူကြီးမင်းတို့ န၀တ (စစ်အစိုးရ) တက်လာခဲ့ပါသည်။ ယခင် မဆလအစိုးရထက်တော့ ကောင်းလာလိမ့်မည်လို့ ပြည်သူတွေက ယုံကြည်မျှော်လင့်ခဲ့ကြပါသည်။
လူကြီးမင်းတို့က ၉၀ ခုနှစ် ပါတီစုံ ဒီမိုကရေစီ အထွေထွေရွေးကောက်ပွဲကြီးကို လွတ်လပ်ပြီး တရားမျှတသော ရွေးကောက်ပွဲအဖြစ် အောင်မြင်စွာ ကျင်းပပေးခဲ့ပါသည်။ စစ်မှန်သော ပြည်သူ့ဆန္ဒအပေါ် အာဆီယံနိုင်ငံများအပြင် ကမ္ဘာ့နိုင်ငံများအားလုံးက ချီးကျူးထောက်ခံခဲ့ကြပါသည်။
လူကြီးမင်းတို့ကိုယ်တိုင် ကျင်းပဆောင်ရွက်ပေးခဲ့တဲ့ ရွေးကောက်ပွဲကြီးကို လူကြီးမင်းတို့ကိုယ်တိုင် ၁၉၉၀ ခုနှစ် ဇူလိုင်လ ၂၇ ရက်နေ့မှာ ကြေညာချက် အမှတ် ၁/၉၀ ကို ထုတ်ြပန်ခဲ့ပါတယ်။
အဲဒီကြေညာချက် အပိုဒ် ၁၂ တွင် -
“ပြည်သူလွှတ်တော် ရွေးကောက်ပွဲ ဥပဒေ ပုဒ်မ ၃ တွင် လွှ့တ်တော်ကို မဲဆန္ဒနယ်များမှ ဤဥပဒေနှင့်အညီ ရွေးကောက်တင်မြှောက်လိုက်သော လွှတ်တော်ကိုယ်စားလှယ်များဖြင့် ဖွဲ့စည်းစေရမည်”
ယင်းပြဋ္ဌာန်းချက်နှင့်အညီ လွှတ်တော်ခေါ်ယူ ဖွဲ့စည်းခြင်းကို န၀တက ဆောင်ရွက်ပေးမည်ဟု၎င်း -
အပိုဒ် ၂၀ တွင်
“ယနေ့အခြေအနေတွင် ပြည်သူများက ရွေးကောက်တင်မြှောက်လိုက်သော ကိုယ်စားလှယ်များသည် အနာဂတ်ဒီမိုကရေစီနိုင်ငံတော် ဖွဲ့စည်းပုံအခြေခံဥပဒေကို ရေးဆွဲကြရန် တာဝန်ရှိသည့် ပုဂ္ဂိုလ်ကြီးများဖြစ်သည်ဟု၎င်း” အတိအလင်း ကြေညာထုတ်ပြန်ခဲ့သည်ကိုလည်း လူကြီးမင်းတို့ သိပြီးဖြစ်ပါသည်။
တိုင်းပြည်ကို အုပ်ချုပ်နေသည့် တပ်မတော်သားကြီးတွေ၊ ယောကျာင်္းရင့်မကြီးတွေ ဖြစ်ကြသည့် လူကြီးမင်းတို့က ကိုယ်ထုတ်ပြန်တဲ့ အမိန့်ကြေညာချက် ဥပဒေများကို ကိုယ်က စောင့်သိ ရိုသေ လေးစားလိုက်နာမှ ပြည်သူများကလည်း စောင့်သိရိုသေ လိုက်နာကြမှာ ဖြစ်သည်။
“ရှေ့ဆောင်နွားလား ဖြောင့်ဖြောင့်သွားမှ၊ နောက်နွားတသိုက် ဖြောင့်ဖြောင့်လိုက်၏” ဆိုတဲ့ စကားလိုပေါ့ ခင်ဗျား။
တိုင်းပြည်အုပ်ချုပ်တဲ့ မင်းပဲ ဖြစ်ဖြစ်၊ အစိုးရပဲ ဖြစ်ဖြစ် “မင်းမှာ သစ္စာ လူမှာ ကတိ” ဆိုတာလို မင်းအစိုးရများဟာ သစ္စာ ကတိတည်ကြည် ဖြောင့်မတ်မှ ပြည်သူက ယုံကြည်လေးစားမှာပါ။
ယနေ့လူကြီးမင်းတို့ ရေးဆွဲပြီးတဲ့ ဖွဲ့စည်းပုံအခြေခံဥပဒေ မူကြမ်း ၂၀၀၈ ဟာ လူကြီးမင်းတို့ ထုတ်ပြန်ထားတဲ့ ကြေညာချက် ဥပဒေများနဲ့ ညီညွတ်မှု ဆီလျှော်ကိုက်ညီမှု ရှိပါသလား။ လူကြီးမင်းတို့ ပေးထားတဲ့ ကတိက၀တ် စကားများနဲ့ ရေးဆွဲထားတာလား ဆိုတာကို ရိုးဖြောင့်ပြီး လူကြီးလူကောင်းဆန်တဲ့ စိတ်ထားနဲ့ ကြည့်မြင်တတ်ရင် အမှန်တရားဟာ ပေါ်ထွက်လာမှာပါ။
ပြီးတော့ လူကြီးမင်းတို့ရဲ့ စိတ်ကြိုက်၊ လက်ညှိုးထောင်၊ ခေါင်းညိတ် ရွေးချယ်ထားတဲ့ ပုဆိန်ရိုး ကိုယ်စားလှယ်တွေနဲ့ လူကြီးမင်းတို့ ဆန္ဒသဘောထားအတိုင်း တဖက်သတ်ရေးဆွဲထားတဲ့ ဖွဲ့စည်းပုံအခြေခံဥပဒေ မူကြမ်း ၂၀၀၈ ဟာ ပြည်လုံးကျွတ်ဆန္ဒခံယူပွဲ ဥပဒေနှင့် နည်းဥပဒေများကို ချိုးဖောက်ပြီး ပြည်သူများကို အကြပ်ကိုင်ခြင်း၊ ခြိမ်းခြောက်ခြင်း၊ လိမ်လည်လှည့်ဖြားခြင်း၊ မလျော်သြဇာသုံးခြင်းများဖြင့် ပြုလုပ်ဆောင်ရွက်ခဲ့တာကို အထက်ကလူကြီးမင်း ဗိုလ်ချုပ်ကြီးများ သိသိနှင့် မသိကျိုးကျွံ ပြုနေတာလယး၊ ဒါမှမဟုတ် “ငါ့လှေ ငါထိုး ပဂိုး ရောက်ရောက်၊ ငါ့မြင်း ငါစိုင်း စစ်ကိုင်း ရောက်ရောက်” ဆိုပြီး မသိဟန်ဆောင်ပြီး အမှန်တရားကို မျက်ကွယ်ပြုမယ်ဆိုရင် အမှန်တရားရဲ့ တုန့်ပြန်မှုဒဏ်ဟာ ပျက်စီးဆုံးရှုံးခြင်းနဲ့ နိဂုံးချုပ်တတ်ပါတယ် ခင်ဗျား။
လူကြီးမင်းများ ပြုလုပ်ခဲ့တဲ့ ၂၀၀၈ ခုနှစ် ဖွဲ့စည်းပုံ အခြေခံဥပဒေ မူကြမ်း ပြည်လုံးကျွတ်ဆန္ဒခံယူပွဲ ကျင်းပရာမှာ -
(၁) မဲရုံများတွင် နိုင်ငံတကာမှ စောင့်ကြည့်လေ့လာသူများ မရှိဘဲ လူကြီးမင်းတို့၏ လက်ကိုင်တုတ်များဖြစ်သော ရယကအဖွဲ့ဝင်များ၊ ကြံ့ဖွံ့များ၊ စွမ်းအားရှင်များ၊ အမျိုးသမီးရေးရာ အဖွဲ့ဝင်များသာ ထားရှိပြီး မိမိစိတ်ကြိုက် ဆောင်ရွက်သွားခြင်း။
(၂) အစိုးရ၀န်ထမ်းများကို ဋ္ဌာနဆိုင်ရာရုံးများတွင် ၀န်ထမ်းများ၏ စစ်မှန်သော ဆန္ဒမပါဘဲ ကြိုတင်ထောက်ခံဆန္ဒမဲများ ရယူခြင်း။
(၃) စက်ရုံ အလုပ်ရုံ အလုပ်သမားများကိုလည်း စက်ရုံ အလုပ်ရုံများတွင် ကြိုတင်ထောက်ခံဆန္ဒမဲများ ပေးစေခြင်း၊ (၀န်ထမ်းအိမ်ယာများနှင့် အလုပ်သမားအိမ်ယာခန်းများတွင် နေသော ၀န်ထမ်းအလုပ်သမားများကို ကန့်ကွက်မဲပေးက နေအိမ်ခန်းများမှ ပယ်ရှားပစ်မည်ဟု ခြိမ်းခြောက်ထားခြင်း ရှိနေပါသည်။)
(၄) ခရီးဝေးသွားသူများ၊ နာမကျန်းသူများ၊ အသက်ကြီးသူများ၊ မသန်မစွမ်းသူများ၏ ဆန္ဒမဲများကို ကောက်မရှင်အဖွဲ့ဝင်များက ၎င်းတို့သဘောဖြင့် ကြိုတင်ထောက်ခံမဲများ ရယူခြင်း။
(၅) ၂၀၀၈ မေလတွင် နာဂစ်မုန်တိုင်းဒဏ်ကြောင့် သေဆုံးခဲ့သူ တသိန်းကျော်၏ ဆန္ဒမဲများ၊ ဒုက္ခရောက်နေသူ ၃ သိန်း ကျော်၏ ဆန္ဒမဲများကို မသမာသောနည်းများဖြင့် ထောက်ခံမဲများ ရယူခြင်း။
(၆) အိမ်ထောင်စုအတွင်းရှိ ထောင်ကျနေသောသူများ၏ ဆန္ဒမဲများလာမထည့်ကြသော သူများ၏ ဆန္ဒမဲများကို စာရင်းကောက်ယူ၍ မဲရုံကော်မရှင်အဖွဲ့ဝင်များမှကိုယ်စား ထောက်ခံမဲများ ရယူခြင်း …
စသည့် မမှန်ကန်သောနည်းများဖြင့် ပြည်လုံးကျွတ်ဆန္ဒခံယူပွဲ နည်းဥပဒေများကို ချိုးဖောက်၍ ဆောင်ရွက်ခြင်းများသည် စစ်မှန်သော တရားမျှတသော ဆန္ဒခံယူပွဲ မဟုတ်ကြောင်း ထင်ရှားနေပါသည်။
ဤကဲ့သို့ ၂၀၀၈ ခုနှစ် ဖွဲ့စည်းပုံ အခြေခံဥပဒေမူကြမ်းမှာ ပြည်သူက ရွေးချယ်ထားသော ပြည်သူ့ကိုယ်စားလှယ်များက ရေးဆွဲထားခြင်း မဟုတ်သည်က တကြောင်း၊ ဆန္ဒခံယူပွဲနည်းဥပဒေများကို ချိုးဖောက်၍ မတရားသောနည်းမျိုးစုံဖြင့် တဖက်သတ် ပြည်သူ့ဆန္ဒစစ်စစ် မပါဘဲ လိမ်ညာခြင်း၊ အကြပ်ကိုင်ခြင်း၊ ခြိမ်းခြောက်ခြင်းများဖြင့် ဆောင်ရွက်သွားခြင်းကြောင့် တကြောင်း၊ ၎င်းဖွဲ့စည်းပုံအခြေခံဥပဒေမူကြမ်းသည် တရားမျှတမှု မှန်ကန်မှု မရှိကြောင်း ထင်ရှားပါသည်။
ထို့ကြောင့် အင်န်အယ်ဒီ အဖွဲ့ချုပ်မှ စက်တင်ဘာ ၉ ရက် ၂၀၀၈ က ထုတ်ပြန်တဲ့ အထူးကြေညာချက် အမှတ် ၁၈/၉/၀၈ ကို လူကြီးမင်းများက ပြန်လည်သုံးသပ် စဉ်းစား ဆောင်ရွက်ကြမယ်ဆိုရင် ၂ ဦး ၂ ဖက် အနေနဲ့၎င်း၊ တိုင်းပြည်နဲ့ လူမျိူးများ အနာဂတ်အတွက်၎င်း ကောင်းမြတ်တဲ့ အကျိုးတရားများ ရရှိနိုင်ပါလိမ့်မယ်။
ဖေဖော်ဝါရီ ၁ ရက်၊ ၂၀၀၉ က မြန်မာနိုင်ငံသို့ ရောက်ရှိလာသော ကုလသမဂ္ဂ အတွင်းရေးမှူးချုပ်၏ အထူးအကြံပေး ပုဂ္ဂိုလ် မစ္စတာဂန်ဘာရီနှင့် လူကြီးမင်းတို့ တွေ့ဆုံစဉ်က လူကြီူးမင်းတို့ ပြောကြားခဲ့သော …
“စီးပွားရေး ပိတ်ဆို့မှုများ၊ လူ့အခွင့်အရေး ဆုံးရှုံး ထိခိုက်စေသည့် ဗီဇာပိတ်ပင်ထားမှုများကို ကုလသမဂ္ဂအနေဖြင့် ဖယ်ရှားအောင် ဦးစွာ ကြိုးပမ်းသင့်ကြောင်း၊ ခင်မင်ရင်းနှီးသူ တဦးအနေဖြင့် ဥပမာနှိုင်းပြရလျှင်၊ ခြေ ၂ ဖက်ကို ကြိုးများဖြင့် ချည်နှောင်ထားပြီး မြန်မြန်ပြေးခိုင်းသည်နှင့် တူနေကြောင်း၊ သို့သော်လည်း မိမိတို့ နိုင်ငံအနေနှင့် ကုလသမဂ္ဂနှင့် ပူးပေါင်းဆောင်ရွက်သောအားဖြင့် လုပ်သင့်သည်များကို၊ လုပ်နိုင်သည်များကို ကြိုးပမ်း ဆောင်ရွက်သွားမှာ ဖြစ်ကြောင်းနှင့် မြန်မာနိုင်ငံကို စီးပွားရေးဖွံဖြိုးတိုးတက်ပြီး နိုင်ငံရေးတည်ငြိမ်စေချင်သည်ဆိုလျင် ကုလအနေနှင့် မြန်မာနိုင်ငံအပေါ် စီးပွားရေး ပိတ်ဆို့မှုများကို အရင်ဖယ်ရှားပေးရန် ကြိုးစားသင့်ကြောင်း၊ စီးပွားရေးတည်ငြိမ်မှ နိုင်ငံရေးတည်ငြိမ်မည် ဖြစ်ကြောင်း …”
စသည်ဖြင့် ပြောခဲ့ရာ၊ ဤစကားများကို သေချာစွာ ပြန်စဉ်းစားသင့်ပါသည်။
လူကြီးမင်းများက ဥပမာနှင့် တင်ပြသလို ပြန်ပြောရရင် …
“ကျောင်းစည်းကမ်း ချိုးဖောက်သည့် ကျောင်းသား၊ အိမ်စာမလုပ်လာတဲ့ ကျောင်းသားကို အတန်းပိုင်ဆရာက ကြိမ်လုံးနဲ့ ရိုက်ချင်ရိုက်မယ်။ ခုံပေါ်တက် မတ်တတ်ရပ်ခိုင်းပြီး အပြစ်ဒဏ် ပေးမယ်။ ကျောင်းသားက အပြစ်ရှိနေတာကိုး။ ကျောင်းသားက ကျောင်းစည်းကမ်းကို လိုက်နာမယ်၊ အိမ်စာလုပ်လာမယ် ဆိုရင် ဆရာက အပြစ်ဒဏ်ပေးမှာ မဟုတ်ဘူး..”
အဲဒီလိုပဲ လူကြီးမင်းများက ကျူးလွန်ထားတဲ့ လူ့အခွင့်အရေး ချိုးဖောက်တာတွေ၊ မတရားလုပ်အားပေး ခိုင်းစေတာတွေ၊ ကလေးစစ်သားစုဆောင်းတာတွေ၊ နိုင်ငံရေးသမားတွေကို မတရားဖမ်းဆီး၊ ပုဒ်မတွေ အမျိုးမျိုးတပ်၊ နှစ်ရှည်ထောင်ဒဏ်တွေ ချမှတ်၊ ဝေးလံလှတဲ့ နယ်အကျဉ်းထောင်တွေကို ပို့၊ အကျဉ်းသားတွေကို နှိပ်စက် ဒုက္ခပေးရုံတင်မက၊ ကျန်ရစ်တဲ့ မိသားစုတွေကိုပါ နှိပ်စက်ဒုက္ခပေးနေတာမျိုးတွေ ဖြစ်နေတယ်။ တရားဥပဒေ အုပ်ချုပ်တာတွေ၊ နိုင်ငံရေးသမားများအပေါ် တရားစီရင်ရာတွင် တရားသူကြီးက မစီရင်ရဘဲ၊ အထက်က အမိန့်အတိုင်း စီရင်ရတာတွေ၊ (အငြိမ်းစားတရားသူကြီး တဦး၏ ပြောပြချက်အရ)၊ ငြိမ်းချမ်းစွာ ဆန္ဒပြ၊ မေတ္တာပို့ခဲ့ကြတဲ့ ရဟန်း သံဃာ ကျောင်းသား ပြည်သူများကို လူကြီးမင်းတို့ရဲ့ ပုဆိန်ရိုး လက်ကိုင်တုတ် ကြံ့ဖွံ့များ စွမ်းအားရှင်းများက မင်းမဲ့စရိုက် ၀င်ရောက် ဖမ်းဆီးပြီး အကြမ်းဖက်မှု၊ ဆူပူမှုလုပ်တာတွေ စတဲ့ လုပ်ရပ်တွေဟာ လူ့အခွင့်အရေးကို အကြီးမားဆုံး ချိုးဖောက်တာပဲ မဟုတ်လား။
လူကြီးမင်းများက လူ့အခွင့်အရေး ချိုးဖောက်သူများကို ပြုပြင်နိုင်မယ်ဆိုရင် ပြီးတော့ ကုလသမဂ္ဂနဲ့ ပူးပေါင်းဆောင်ရွက်မယ် ဆိုရင် ပြီးတော့ ကုလသမဂ္ဂအထွေထွေညီလာခံမှ အကြိမ်ပေါင်းများစွာ ဆုံးဖြတ်ချက် ကြေညာချက်များကို လိုက်နာခဲ့မယ် ဆိုရင် ကုလသမဂ္ဂအနေနဲ့ မြန်မာနိုင်ငံအပေါ် စီးပွားရေးပိတ်ဆို့မှုတွေဟာ အလိုလို ဖယ်ရှားပြီးသား ဖြစ်သွားမှာပါ။
မြန်မာနိုင်ငံ ပြည်သူပြည်သားတွေအပေါ် မိမိကျူးလွန်ထားတဲ့ အပြစ်တွေကို အရင်ကနဦး ဆေးကြောပစ်ရမှာပါ။
လူကြီးမင်းများက …
“ဒီမိုကရေစီသဘောအရ အများစုရဲ့ ဆန္ဒကို အနည်းစုက လက်ခံကြရမှာ ဖြစ်၊ အများစုက အတည်ပြုထားတဲ့ အခြေခံဥပဒေကို သဘောမတူတဲ့ အနည်းစုရဲ့ ဆန္ဒကြောင့် ပြန်လည်ညှိနှိုင်း ပြင်ဆင်ပေးဖို့ ဆိုတာ ဒီမိုကရေစီနည်းလမ်းမကျ၊ ထို့အတူလည်း မဖြစ်နိုင်၊ ဒီမိုကရေစီကို ကြိုက်တယ်၊ လိုလားတယ် ဆိုရင် ဒီမိုကရေစီရဲ့ အနှစ်သာရကို လက်ခံကြရမှာပဲ ဖြစ် …”
စသည်ဖြင့် လူကြီးမင်းတို့ ပြောခဲ့တာ သိပ်မှန်တယ်. လက်ခံကြိုဆိုပါတယ်။ လူကြီးမင်းတို့လည်း ကိုယ်စကားနဲ့ ကိုယ်ပြောသလို လုပ်နိုင်ဖို့ တာဝန်ရှိပါတယ်။
ဥပမာ …
၁ - ၁၉၉၀ ခုနှစ် ရွေးကောက်ပွဲဟာ စစ်မှန်သော လွတ်လပ်၍ တရားမျှတသော အများပြည်သူရဲ့ ဆန္ဒအမှန် ပါ။ ဘာကြောင့် အဲဒီတုန်းက လူကြီးမင်းတို့က အများစုရဲ့ ဆန္ဒကို လက်မခံခဲ့ရပါသလဲ။
၂ - ကုလသမဂ္ဂ လုံခြုံရေး ကောင်စီ ၁၅ နိုင်ငံမှ အများစုရဲ့ ဆန္ဒကို ဆန့်ကျင်ပြီး တရုတ်နှင့် ရုရှား ၂ နိုင်ငံက အများစုရဲ့ ဆန္ဒကို ဘာကြောင့် လက်မခံခဲ့ပါသလဲ။
၃ - ၂၀၀၈ ခုနှစ် ပြည်လုံးကျွတ် ဆန္ဒခံယူပွဲဟာ စစ်မှန်တဲ့ အများဆန္ဒလား၊ မသမာနည်းနဲ့ လုပ်သွားတာလား ဆိုတာ ရှေ့မှာ တင်ပြခဲ့ပြီး ဖြစ်၍ လူကြီးမင်းများ စဉ်းစားသင့်။
၎ - ရေးဆွဲထားတဲ့ အခြေခံဥပဒေကကော ၉၀ ခုနှစ် က ရွေးကောက် တင်မြှောက်ခံရသော ပြည်သူ့လွှတ်တော်ကိုယ်စားလှယ်များမှ ရေးဆွဲထားတာလား၊ စစ်အစိုးရရဲ့ လက်ရုန်းတပ်သား တပည့်တွေ၊ လက်ကိုင်တုတ်တွေက ရေးဆွဲထားတာလား။ အမှန်ကို အမှန်အတိုင်း၊ အရှိကို အရှိအတိုင်း သိသင့်ပါတယ်။
၎င်းအပြင် လူကြီးမင်းတို့ရဲ့ အောက်တိုဘာ ၄ ရက်၊ ၂၀၀၇ နေ့စွဲနဲ့ ထုတ်ပြန်ခဲ့သော ကြေညာချက် အမှတ် ၁/၂၀၀၇ မှာ ထိပ်တိုက်ရင်ဆိုင်ရေး၊ အလုံးစုံပျက်သုဉ်းရေး၊ မြန်မာနိုင်ငံအား စီးပွားရေး အဆက်အသွယ်ပြတ်တောက်ရေး၊ အလုံးစုံ ပိတ်ဆို့ရေးဆိုတဲ့ အချက် ၄ ချက်ကို ဒေါ်အောင်ဆန်းစုကြည်က စွန့်လွှတ်ကြောင်း ကြေညာခဲ့ရင် နိုင်ငံတော်အကြီးအကဲ ကိုယ်တိုင် သူမနှင့် တိုက်ရိုက်တွေ့ဆုံမှာဖြစ်ကြောင်းလို့ ဖော်ပြထားတာ တွေ့ရပါတယ်။
အဲဒီအချက် ၄ ချက်က တွေ့ဆုံဆွေးနွေးရေးအတွက် ကြိုတင်စည်းကမ်း သတ်မှတ်ချက်တွေ ဖြစ်မနေဘူးလား။ ပြီးတော့ အဲဒီအချက် ၄ ချက်ကို ဒေါ်အောင်ဆန်းစုကြည်က ပိတ်ဆို့တားဆီးနိုင်စွမ်းရှိသူလား သို့မဟုတ် ပယ်ဖျက်နိုင်စွမ်း ရှိသူလား၊ တကယ် ပိတ်ဆို့တားဆီးထားတာက ဘယ်သူတွေလဲ ခွဲခွဲခြားခြား သိဖို့ လိုပါတယ်။
အကယ်၍ အိမ်ထဲမှာ အကျယ်ချုပ်နဲ့ ထိန်းသိမ်းခံနေရတဲ့သူက ဒီအချက် ၄ ချက်ကို လုပ်နိုင်စွမ်းရှိတယ် ဆိုရင်၊ ပြင်ပမှာ တကယ့်လက်တွေ့ အာဏာနဲ့ အုပ်ချုပ်နေတဲ့ လူကြီးမင်းတို့ စွမ်းရည်က ဘယ်အဆင့်အထိ ကျဆင်းသွားမလဲဆိုတာ စဉ်းစားကြည့်ပါဦး။
လူကြီးမင်းများ ခင်ဗျား …
ကျနော်တို့ နိုင်ငံကို ပြည်ပနိုင်ငံများမှ ပုဂ္ဂိုလ်များ၊ ကုလသမဂ္ဂမှ ပုဂ္ဂိုလ်များ၊ အခြားနိုင်ငံတကာမှ အဖွဲ့အစည်းများမှ လာရောက်ပြီး လူကြီးမင်းများနှင့်ကော၊ အင်န်အယ်ဒီ အဖွဲ့ချုပ်မှ ခေါင်းဆောင်များနှင့်ကော၊ အခြား တိုင်းရင်းသားအဖွဲ့များ၊ တသီးပုဂ္ဂလများနှင့် လာရောက်တွေ့ဆုံကာ မြန်မာနိုင်ငံရေးကို ၀င်ရောက်စွက်ဖက်နေတာ ရှက်စရာလည်း ကောင်းပါသည်။ ဗိုလ်ချုပ်အောင်ဆန်းစကားလို “ဟိုလူ လာ၊ မျက်နှာချိုသွေးရ။ ဒီလူ လာ၊ မျက်နှာချိုသွေးရ” နှင့် နိုင်ငံဂုဏ်သိက္ခာ ကျလှပါသည်။ ကျနော်တို့ ပြည်တွင်းရေးကိစ္စကို ကိုယ့်ဖာသာကိုယ် ဖြေရှင်းပြီး အဖြေရှာချင်ပါသည်။
သို့ပါ၍ ၁၉၉၀ ရွေးကောက်ပွဲကို ကျင်းပပေးခဲ့သော တပ်မတော်ခေါင်းဆောင်ကြီးများနှင့် ၎င်းတို့ ရွေးကောက်ပွဲတွင် အနိုင်ရရှိခဲ့သော နိုင်ငံရေးပါတီများ၊ ရွေးကောက်တင်မြှောက်ခံရသော ပြည်သူ့ကိုယ်စားလှယ်များ၊ တိုင်းရင်းသားအဖွဲ့အစည်းများ အမြန်ဆုံး တွေ့ဆုံဆွေးနွေး၍ အဖြေရှာခြင်းသည်သာ အကောင်းဆုံး ဖြစ်ပါသည်။
ကိုယ့်ပြည်တွင်းအင်အားစု အချင်းချင်း၊ အဃာတကင်းကင်းနှင့် စည်းလုံးညီညွတ်စွာ တွေ့ဆုံဆွေးနွေးခြင်းမှ ရရှိလာမည့် ရလာဒ်ကောင်းများ ပေါ်ထွက်လာပါက စောစောက လူကြီးမင်းတို့ တောင်းဆိုထားသော စီးပွားရေးပိတ်ဆို့မှုများ၊ ဗီဇာပိတ်ဆို့မှုများ အလိုလို ပွင့်ထွက်ပျက်ပြယ်သွားနိုင်ပါကြောင်းနှင့် စစ်မှန်စော အမျိူးသားပြန်လည်သင့်မြတ်ရေးနှင့် စည်းလုံးညီညွတ်ရေးများ ရရှိလာနိုင်ပါသည်။
နောက်ဆုံး တင်ပြလိုတာကတော့ ဒုတိယအိမ်ထောင်ပြုချင်ရင် ပထမအိမ်ထောင်ကို တရားဝင် ကွာရှင်းပြတ်စဲပစ်ရပါမယ်။ နို့မို့ရင် ပထမအိမ်ထောင်က အမွေဆက်ခံတောင်းပိုင်ခွင့် ရှိနေပါမယ်။ အဲဒီလိုပါပဲ လူကြီးမင်းတို့က ၂၀၁၀ ရွေးကောက်ပွဲ သွားချင်ရင် ၁၉၉၀ ရွေးကောက်ပွဲကို တရားဝင် ဖျက်သိမ်းပစ်ရပါမယ်။ နို့မို့ရင် ၉၀ ခုနှစ် ရွေးကောက်ပွဲဟာ တရားဝင် တည်ရှိနေတာကြောင့် အမွေရယူပိုင်ခွင့် တောင်းဆိုပိုင်ခွင့်တွေ ရှိနေဦးမှာပါပဲ ခင်ဗျား။
ကိုယ့်နိုင်ငံ၊ ကိုယ့်ပြည်တွင်းရေးကို ပြည်ပမှ လာရောက်ဆွေးနွေး ညှိနှိုင်း ဖြေရှင်းပေးခြင်းထက်၊ ကိုယ့်သွေး၊ ကိုယ့်သား၊ ကိုယ့်ဆွေမျိုးချင်း အဃာတ ကင်းကင်းနဲ့ ဆွေးနွေး အဖြေရှားခြင်း၊ အပြန်အလှန် ယုံကြည်လေးစားခြင်းတို့ဖြင့် အမျိုးသားပြန်လည်စည်းရုံးညီညွတ်မှု တည်ဆောက်ကြပါရန် တိုက်တွန်းလိုက်ရပါသည်။ ။
(မြန်မာပြည်တွင်းက ပေးစာဖြစ်ပါတယ်။ သူရွေးတဲ့ အမည် “မောင်သြ” အမည်နဲ့ မိုးမခမှာ ယခင်စာများ ဖော်ပြခဲ့ဖူးပါတယ်)
No comments:
Post a Comment