12.19.2008

ကိုရင်မောင်နှင့်စကားစမည်

ယူဖရေးတီးစ်နဲ့ တိုက်ဂရစ်ကြားက ညပ်နေတဲ့ဖိနပ်တစ်ရံ

ကိုရင်မောင်ရေ

ခင်ဗျားလည်း ကျုပ်ရဲ့ “သော့အိမ်” အကြောင်း ပြောမဆုံးပေါင်တောသုံးတောင်တွေနဲ့ နည်းနည်းတော့ ငြီးလောက်ရော့မယ်။ ဒီတော့ ဒီတပတ် ခင်ဗျားလည်းအငြီးပြေလေးဖြစ်အောင်လို့ ကာလပေါ်လေးတွေ ပြောင်းပြောချင်တယ်ဗျာ။ မနေ့က ကျုပ်လည်း ပျင်းပျင်းရှိတာနဲ့ ဆေးလိပ်လေးကောက်ဖွာရင်း တောင်တွေးမြောက်တွေးလုပ်နေချိန်ပေါ့၊ ကျုပ်မိတ်ဆွေတယောက်က “ရုပ်မြင်သံကြားသတင်း ဖွင့်ကြည့်-ဖွင့်ကြည့်” လို့ ရေးကြီးသုတ်ပြာပြောပြီး ဖုန်းချလိုက်တယ်။ ကျုပ်လည်း ဒီလူ့နှယ် အဆုံးမရှိအစမရှိ ဘာပါလိမ့်ပေါ့။ ဒါနဲ့ တီဗွီလေး ထဖွင့်လိုက်တယ်ဗျာ။ သတင်းကဆုံးတော့မယ်။ သတင်းကြေငြှာသူကလည်း နောက်က “ကျား” လိုက်နေတဲ့အတိုင်းပဲ။ ပြောနေလိုက်တာ။ ကျုပ်လည်း သေသေချာချာမကြားလိုက်မိဘူး။ နားစွန်နားဖျားကြားလိုက်ရတာ “ရှူးဖိနပ်” ဆိုတာရယ် “သမ္မတဘုရှ်” ဆိုတာရယ် လောက်ပဲ။ ဟ.. ဘာများတုန်း။ သတင်းက သမ္မတကြီး ရှူးဖိနပ်များ ဘယ်ညာမှားစီးမိလို့လား။ ဖိနပ်ကို သာမန်လူတယောက်က ဘယ်/ညာ မှားစီးမိရင် သတင်းမဖြစ်ပေမယ့် သမ္မကြီးတယောက် မှားစီးမိရင်တော့သတင်းဖြစ်နိုင်တာပေါ့။ သမ္မကြီးတယောက်လုံးလုပ်နေပြီး ဖိနပ် ဘယ်/ညာ တော့ မှားမစီးလောက်ပါဘူး။ ဒါဆို သူများဖိနပ်များမှားစီးမိလို့လားပေါ့။ ဒါလည်းမဖြစ်လောက်ပါဘူး။ တို့ဆီမတော့ အလှူ မင်္ဂလာဆောင်တွေများ ဖြစ်ပလားဆို လူတွေ တယ်လည်း ဖိနပ်မှားတတ်ကြသကိုး။ ဒီမှာ ဖိနပ်မှားရအောင်လည်း သူတို့အလှူ မင်္ဂလာဆောင်တွေမှာ ဖိနပ်ချွတ် စရာမလိုတဲ့ အပြင်အဆင်တွေနဲ့ပါ။ ဒါဆို ဘာဖြစ်တာလဲ။ သိချင်စိတ်က ရွပိုးထိုးလာတယ်။ ဒါနဲ့ ဘယ်ရမလဲ အွန်လိုင်း တက်ကြည့်တာပေါ့။ သတင်း နောက်တကြိမ်ပြန်စောင့်ရမှာက ကြာနေဦးမယ်။

တွေ့ပြီဗျို့.. တွေ့ပြီ..။ လား..လား ကျုပ်ထင်ထားတာတွေ တခုမှမဟုတ်ဘူးဗျို့။ အမေရိကန်ပြည်ထောင်စု သမ္မတကြီး ဂျော့ရ်ှဒဗလျူဘုရ်ှတယောက် အီရတ်မှာ သတင်းစာရှင်းလင်းပွဲလုပ်နေတုန်း အီရတ်လူမျိုး သတင်းထောက်တယောက်က စီးထားတဲ့ဖိနပ်ကို ချွတ်ပြီး ထပေါက်ထဲ့လိုက်တာတဲ့ဗျား။ ကျုပ်လည်း တီဗွီရှိူးမှာတင်ထားတာတွေ အကုန်လိုလို လိုက်ကြည့်လိုက်တယ်။ တခုတည်းဆို မသေချာ မှာ စိုးတာရယ်။ မပြည့်စုံမှာ စိုးတာရယ်နဲ့။ ဟုတ်တယ်ဗျို့ သေချာတယ်။

စစခြင်း အမေရိကန်သမ္မကြီးနဲ့ အီရတ် ၀န်ကြီးချုပ် နော်ရီအယ်လ်မလီကီးတို့ အပြန်အလှန် လက်ဆွဲနှုတ်ဆက်ကြတယ်ဗျ။ ပြီးတော့ သမ္မတကြီးက တက်လာတဲ့ သတင်းစာဆရာတွေကိုပြောဖို့ စလိုက်တယ်ဆိုရင်ပဲ နောက်နားမကျတကျက လူတယောက်က ရုတ်တရက် ထတဲ့ပြီး စီးထားနဲ့ဖိနပ်နဲ့ ချွတ်ပေါက်တော့တာဗျို့။ ဘယ်ရမလဲ သမ္မတကြီးကလည်း အသာလေးငုံ့ရှောင်လိုက်တာပေါ့။ အံမယ် တဖက်နဲ့ပေါက်ပြီး အားမရလို့ထင်တယ်။ ပုဂ္ဂိုလ်က နောက်တဖက်ပါ ချွတ်ပြီးထပ်ပေါက်တာဗျို့။ သမ္မကြီးကလည်း ထပ်ရှောင်ပေး လိုက်တာပေါ့။ အာဂလူဗျာ။ မပေါက်ခင် ပါးစပ်ကလည်း တခုခုရေရွတ်လိုက်သေးတယ်။ ဘာလဲတော့ မသဲကွဲဘူး။ ဘေးကလူတွေက ဆွဲတော့ဆွဲကြတယ်။ ဒါပေမယ့် မမှီလိုက်ဘူး။ မြန်ချက်တော့။ လက်လည်း အတော်တည့် တဲ့ကောင်ဗျာ။ ရှောင်လို့၊ မရှောင်ရင် မျက်နှာတဲ့တဲ့ကြီး။ ချက်ခြင်းတော့ ချက်ချင်းပါပဲ၊ သမ္မတကြီးရဲ့ အနီးကပ် အရပ်ဝတ်သက်တော် စောင့်တွေ ဒီလူ့ကို အတင်းဝင်ဖမ်းချုပ်ပြီး အခန်းပြင်ဆွဲထုတ်သွားတယ်။ ဒီလူလည်း ၀ူးဝူးဝါးဝါးနဲ့ ဘာတွေလည်းမသိဘူး အော်ပြီး ကန့်လန့်ကန့်လန့်နဲ့ ဒရဥ့်တိုက်ပါသွားတော့ပါဘဲ။ ဒါပေမယ့် သမ္မတကြီးကို ဒီလူ ဖိနပ်နဲ့မပေါက်ဖြစ်အောင်တော့ ကြိုတင်မကာကွယ် လိုက်နိုင်ကြရှာဘူး။ ဖြစ်ဖြစ်ချင်းတော့ အခန်းထဲရှိတဲ့ လူတွေလည်း ရုတ်ရုတ်သဲသဲတော့ နည်းနည်းဖြစ်သွားတာပေါ့။ အံ့အားလည်းသင့် လန့်လည်းလန့်သွားကြတယ် ထင်ပါရဲ့ဗျာ။ ဖြစ်လည်းဖြစ် လောက်စရာပဲ။ စဉ်းစားကြည့်လေ။ ဖိနပ်နဲ့မို့သာပဲ။ သေနတ်နဲ့သာဆို ပြဿနာ။ ခဏနေတော့ သမ္မတကြီးကလည်း သတင်းစာရှင်းလင်း ပွဲကိုပြန်စပြီး ပြီးတဲ့အထိလုပ်သွားတယ်။ ပြန်စစချင်းတော့ သမ္မတကြီးလည်း မျက်နှာတော့ပျက်ချင်ချင်ရယ်။ မနည်းပြန်အဖတ်ဆယ်ရတာပေါ့။ ရာဇအိနြေ္ဒကို ထိပါးခံရတားကိုး။ ခင်ဗျားလည်း စဉ်းစားကြည့်လေ။ သမ္မတ ဖိနပ်နဲ့ အပေါက်ခံရတယ်လို့။ ကျုပ်တော့ ကြား ကြားဖူးပေါင်ဗျာ။ သမ္မတမှ ရိုးရိုးသမ္မတမဟုတ်ဖူး။ အမေရိကန်သမ္မတ။ အမေရိကန်သမ္မတဆိုတာ ကမ္ဘာပေါ်မှာတော့ စကြာဝတေးမင်းလောက်နီးနီး တန်ခိုး ထက်တာကိုးဗျ။ အမေရိကန် သမ္မတရွေးကောက်ပွဲများ လုပ်ပလားဟေ့ဆို၊ ကမ္ဘာ့နိုင်ငံအသီးသီးက အာရုံစိုက်ပြီးတော့ကို နားထောင် ကြတာမို့လား။ ဘယ်သူများနိုင်မလဲ။ ဘယ်သူနိုင်ရင် ကမ္ဘာကြီးမှာ ဘာတွေဖြစ်ဦးမှာလဲ။ ကောင်းမလား။ ဆိုးမလား ဆိုတဲ့ အတွေးတွေနဲ့ပေါ့။ ကျုပ်လည်း အမေရိကန်ပြည်ထောင်စုမှာ ဖိနပ်နဲ့အပေါက်ခံရတဲ့ သမ္မတသူ့အပြင် ဘယ်သူများရှိသေးလဲလို့ လက်လှမ်းမီသလောက် မေးမြန်းကြည့်တော့လည်း ဘယ်သူမှ မရှိခဲ့ဖူးဘူးလို့ပြောကြတယ်။ အံ့ရောဘဲ။

လူတယောက်ကို စီးထားတဲ့ဖိနပ်နဲ့ပေါက်တာဆိုတာ အီရတ်အမျိုးသားတွေမှာ တော်တော့ကို မဖွယ်ရာတဲ့အပြုအမူလို့ဆိုတယ်။ လူတယောက်ကို အရှက်ခွဲချင်ရင်၊ မနှစ်မြို့တာကို အဆုံးစွန်ဆုံးထိပြချင်ရင် အဲသလို လုပ်လေ့ရှိတယ်လို့ ပြောကြတယ်ဗျ။ ကျုပ်က ဒါကို ကြည့်ပြီး၊ ဒီလူဘာတွေများ ဒီလောက်တောင် ဖြစ်သွားရတာလဲ။ ဘာကို မကြေမချမ်းဖြစ်သွားတာလဲ။ သမ္မတကြီးကရော ဘာတွေများ သူမကြိုက်တာတွေ သွားပြောမိလိုက်လဲ။ ဒီလောက်တောင် ချက်ချင်းကြီး ဘယ်လိုမှတားမရဆီးမနိုင် ဒေါသတွေထွက်ရတာလဲ။ နောက်ဆက်တွဲသတင်းတွေ ဆက်နားထောင်ကြည့်တယ်ဗျာ။ နည်းနည်းလည်း စိတ်ဝင်စားတာကိုး။ သတင်းဌာနတွေအဆိုအရတော့ အမေရိကန်နဲ့အီရတ်အစိုးရကြားမှာ သဘောတူညီချက်စာချုပ်တစ်ခုကို အပြန်အလှန်လက်မှတ်ထိုးတယ် ဆိုတယ်ဗျာ။ စာချုပ်ထဲ ဘာတွေ ပါတယ်၊ ဘာတွေ သဘောတူလိုက်ကြတယ်ဆိုတာတော့ ကျုပ်လည်းမသိသေးဘူးဗျ။ ကျုပ်တွေ့တာမှာလည်း သမ္မတကြီးက ဘာမှတောင် သိပ်ပြီး စမပြောရသေးဘူး ဖြစ်သွားတာဗျ။

အမေရိကန်ပြည်ထောင်စုမှာ ၉/၁၁ အရေးအခင်းကြီး ဖြစ်ပြီးကတည်းက ဘယ်တုန်းကနဲ့မှမတူအောင် ပြည်တွင်းလုံခြုံရေး အစီ အစဉ်တွေတင်းကျပ်လာတယ်ဗျာ။ အရင်ကထက် ပိုပြီးလုံခြုံဖို့လိုလာတယ်၊ အခုအရင်ကလောက် လုံခြုံမှုမရှိတော့ဘူးဆိုတဲ့ သဘောပေါ့ဗျာ။ အမိမြေလုံခြုံရေးဝန်ကြီးဌာနဆိုပြီး ဖွဲ့ယူရတဲ့အထိဖြစ်လာတယ်။ ပြည်သူတချို့နဲ့ အခွင့်အရေးဆိုင်ရာ အုပ်စုတွေက ဒါကိုမကြိုက်ကြဘူး။ ဒါပေမယ့် လုပ်ရတာပါပဲ။ အခု သမ္မတကြီးခရီးစဉ်ဆိုလည်းကြည့်လေ တရားဝင် ဘယ်နိုင်ကို၊ ဘယ်အချိန်မှာသွားမှာပါလို့ ကြိုတင်ကြေညာတာမလုပ်ဘဲနဲ့ ထွက်သွားခဲ့တာ။ ဒါပေမယ်လို့ လုံလောက်တဲ့ လုံခြုံရေးအစီအမံတွေ ရှိထားပြီးသားနေမှာပါ။ နောက်တခု ကလည်း သမ္မတကြီးရဲ့ သတင်းစာရှင်းလင်းပွဲဆိုတာ နှယ်နှယ်ရရမှ မဟုတ်တာကလား။ သတင်းသမားတွေကို ကြိုတင်ပြီးလိုအပ်တဲ့ စစ်ဆေး ရှာဖွေမှုတွေ လုပ်ပြီးမှတက်ရတာလေ။ သွားတာက အီရတ်နော် တခြားနိုင်ငံမဟုတ်ဘူး။ ပိုတောင်လိုဦးမယ်။ နောက်ပြီးလုပ်တဲ့နေရာကလည်း ဟင်းလင်းကွက်လပ်ထဲမှာ မဟုတ်ဘူး။ အဆောက်အဦးထဲမှာ ကျကျနနလုံခြုံရေး အစီအစဉ်တွေမပါပဲ လုပ်ခဲ့တာတော့ မဖြစ်နိုင်ဘူး။ လုံခြုံရေး တာဝန်ရှိသူတွေကလွဲလို့ ဘယ်သူ့မှ လက်နက်ကိုင်ဆောင်ဝင်ရောက်ခွင့်ပေးမှာလည်းမဟုတ်ပါဘူး။

ဒီတော့ ကျုပ်တွေးမိတယ်။ ဒီ့လူ ဒီလုပ်ရပ်ဟာ လုပ်ကြံသတ်ဖြတ်ဖို့တော့ ဘယ်နည်းမှမဟုတ်ဘူး၊ ထင်ရှားတယ်။ ဒါဆို အရှက်တကွဲ အကျိုးနည်းဖြစ်အောင်လုပ်တာ သက်သက်တင်ပဲလား။ ဒါမှမဟုတ် နာမည်မကြီးကြီးအောင် စတန့်ထွင်တာလား။ စတန့်ဆိုရင်လည်း သူ့စတန့်က မြွေပွေးကိုသွား ကလိထိုးသလိုပဲ။ အန္တရာယ်သိပ်ကြီးတယ်။ သူလည်း မသိပဲတော့နေမှာမဟုတ် သိမှာပဲ။ သမ္မတကြီးပြောလိုက်တဲ့စကားထဲမှာ သူ ဒီလို ထပေါက်ဖြစ်လောက်အောင် ဘာများမခံချင်စရာပါသွားလည်း။ ကျုပ်လည်း ဉာဏ်မီသလောက် တော့ တွေးကြည့်နေတုန်းဗျာ။ အချက်အလက်ကလည်းမရသေး၊ မရှိသေးဘူးဆိုတော့ ပြောဖို့တော်တော်ခက်နေတယ်။

ဒါပေမယ့် ဒီအဖြစ်အပျက်မှာ လုပ်သူဖက်က ကြည့်ရင်လည်းမတော်ပါဘူးဗျာ။ လူကြီးလူကောင်းမဆန်တဲ့ အပြုအမူတခုလို့ ကျုပ်ခံစားမိတယ်။ မလုပ်ကောင်းဘူးလို့ထင်တာပါဘဲ။ ခံရသူဖက်က ပြန်တွေးကြည့်ပြန်တော့လည်း အောင့်တောင့်ကြီး။ မသကာ သေနတ်နဲ့ ပစ်ခတ်တယ်ဆို လူကြားလို့ကောင်းသေးတယ်။ သေရင်လည်းသေပေါ့ဗျာ။ မသေမပျောက်ခဲ့ရင်လည်း ဒီလူ့ကို လုပ်ကြံမှုနဲ့ တရားစွဲ ထောင်ချ။ လိုအပ်ရင်သေဒဏ်ပေးလိုက်ရုံ ရှိတာပဲ။ အခုတော့ဗျာ အရပ်ရပ်နေပြည်တော် ကြော်မကောင်းကြားမကောင်း။

ဒီလူ့ သတင်းဌာနကတော့ ဒီလိုပြောတယ်ဗျ “ဂျော့ခ်ျဘုရ်ှက အီရတ်ကို ၀င်တိုက်တုန်းက၊ အီရတ်မှာ ဒီမိုကရေစီနဲ့ လူ့အခွင့်အရေးတွေ အပြည့်အ၀ရရှိအောင် လုပ်ပေးမယ်လို့ ပြောခဲ့ပါတယ်။ အခုလည်း သူတို့သတင်းထောက်ဟာ သူမကြေနပ်ချက်ကို ဒီလိုနည်းနည်းနဲ့ ဆန့်ကျင်ပြသတာဟာ သူ့ရဲ့လူ့အခွင့်အရေးနဲ့ ဒီမိုကရေစီရပိုင်ခွင့်ကို ဖေါ်ထုပ်ပြသလိုက်တယ်ဖြစ်တယ်။ သူ့ကို ဖမ်းဆီး လို့မရဘူး။ ချက်ချင်းပြန်လွှတ်ပေးရမယ်” လို့ပြောတယ်ဗျ။

ကျုပ်တော့ ဒီမိုကရေစီနဲ့ လူ့အခွင့်ရေးရပိုင်ခွင့်တွေအရ ဒီလိုပြုမူလုပ်ဆောင်တာဟာ ရပိုင်ခွင့်၊ လုပ်ပိုင်ခွင့်ဖြစ်တယ်ဆိုဦးတော့ ဒီလူ့လိုတော့ မလုပ်ချင်ပါဘူး။ တခြားနည်းတွေကို ရွေးမိမလားမပြောတတ်ပါဘူး။ သမ္မတကြီးနေရာက ကြည့်ပြန်တော့လည်း သေနတ်နဲ့ အပစ်ခံလိုက်ရတာကမှ တော်ဦးမယ၊် အခုတော့ ဖိနပ်နဲ့ အပေါက်ခံလိုက်ရတာဆိုတော့………..။

မျိုးမြင့်ချို

No comments:

Post a Comment