11.28.2008

ကြောက်ရွံ့ခြင်းမှလွတ်ကင်းရေး

ယခုအပတ်မှစ၍ ဒေါ်အောင်ဆန်းစုကြည်ရေးသားသော ဆောင်းပါးများ၊ မိန့်ခွန်းများနှင့်သတင်းစာ ရှင်းလင်းပွဲများကို ပေါင်းစည်း၍ ဒေါက်တာအောင်ခင်တည်းဖြတ် ထုတ်ဝေထားသည့် Freedom From Fear “ကြောက်ရွံ့ခြင်းမှလွတ်ကင်းရေး” စာအုပ်အား အပတ်စဉ် အပိုင်းလိုက်ခွဲ၍ ဖေါ်ပြပေးသွားပါမည်။ စာနှင့်ဓါတ်ပုံများကို ကိုမျိုးမြင့်ချိုက ရှာဖွေစုဆောင်းပေးပါသည်။

အပိုင်း(၁)

“ကြောက်ရွံ့ ခြင်းမှ လွတ်ကင်းရေး”

အောင်ဆန်းစုကြည်

“စစ်သားမဟုတ်ပေမယ့် နိုင်ငံအတွက် အမျိုးမျိုးအနစ်နာခံ၊ အမျိုးမျိုးစွန့် စားလုပ်ကြတဲ့ လူတွေလည်း ရှိတာပဲ။ အဲ့ဒါကြောင့် စစ်သားမှ စစ်သားဆိုတဲ့ စိတ်ဓာတ်ကို ပြောင်းကြရမယ်။ ငါတို့ ဟာ လက်နက်ကိုင်တွေ ဖြစ်ကြသော်လည်း မတရားမလုပ်၊ နိုင်ငံ ရဲ့ ရန်သူတွေမဟုတ်၊ နိုင်ငံ ရဲ့မိတ်ဆွေတွေ ဖြစ်တယ်ဆိုတာကိုသဘောပေါက်ရမယ်” “အောင်ဆန်း”

“အောင်ဆန်းစုကြည်သည် အမှန်တရားကို ပြောဆိုနေ၍လည်းကောင်း၊ မြန်မာနှင့် ကမ္ဘာ့ အခြေခံအယူအဆများကိုရောင်ပြန်ဟပ် နေ၍ လည်းကောင်း၊ သူမအား နှုတ်ဆိတ်အောင် မပြုလုပ်နိုင်ပါ” “ဗားစလဗ်ဟာဗဲလ်”

“အောင်ဆန်းစုကြည်သည် အမျိုးသားယဉ်ကျေးမှုအမွေအနှစ်၏ အကောင်းဆုံး အင်္ဂါလက္ခဏာများဟု သူမယူဆထားသည်များ ကို ဂရုပြုလာစေရန် ကြိုးစား၍ သူမကိုယ်တိုင်လည်း ယင်းအင်္ဂါလက္ခဏာရပ်များနှင့် ထပ်တူထပ်မျှ

ဖြစ်စေရန် ကြိုးပမ်းအားထုတ်သည်” နိုဘဲလ်ကော်မတီဥက္ကဌ” (၁၉၉၁)

စာရေးသူ၏ အမှာ

စာရေးခြင်း၊ မိန့် ခွန်းပြောခြင်း၊ စကားပြောခြင်းစသော လုပ်ရပ်များ၏ အဓိကရည်ရွယ်ချက်တခုကား လူအချင်းချင်း နားလည်မှုတိုးပွားစေရန်ဖြစ်သည်ဟု ကျမယူဆပါသည်။ မြန်မာ့လူမှုရေး၊ နိုင်ငံရေးနှင့် ဒီမိုကရေစီအရေးတို့ ကို ကမ္ဘာက ပိုမို၍ သိရှိနားလည်စေရန်ရည်ရွယ်၍ ဤစာအုပ်ပါဆောင်းပါးများကို ရေးသားခဲ့ခြင်းဖြစ်ပါသည်။ နိုင်ငံတနိုင်ငံကို အမှန်တကယ် အကျိုးပြုနိုင်မည့် စီးပွားရေး၊ နိုင်ငံရေး၊ လုပ်ငန်းစဉ်များ အကောင်အထည်ဖေါ်နိုင်ရန် ပြည်သူပြည်သားအပေါင်းတွင် ပွင့်လင်းပြတ်သားသားစွာ သုံးသပ်ဝေဖန်ပိုင်ခွင့်နှင့် အသိအမြင်၊ အတွေးအခေါ်များကို လွတ်လပ်စွာ ဆွေးနွေးဖလှယ်ပိုင်ခွင့်များ ရှိရမည်ဟုလည်း ကျမယုံကြည်ပါသည်။

“၁၉၈၈-၈၉” ခုနှစ်များအတွင်း ကျမပြောကြားခဲ့သော မိန့် ခွန်းများနှင့်သတင်းစာရှင်းလင်းပွဲများ၏ ဦးတည်ချက်သည် ဒီမိုကရေစီ သဘောတရားများနှင့် ဒီမိုကရေစီစနစ်ကို တည်ထောင်လိုသူတို့ ၏ အတွေးအခေါ်၊ အမြင်တို့ ကို အများပြည်သူဝေဖန်သုံးသပ်နိုင် ရေးပင် ဖြစ်ပါသည်။

ဆောင်းပါးများ၊ မိန့် ခွန်းများ၊ သတင်းစာရှင်းလင်းပွဲများကို စုပေါင်း၍ စာအုပ်ထုတ်ဝေလိုက်ခြင်းဖြင့် မြန်မာ့နိုင်ငံရေးနှင့် ဒီမိုကရေစီ ရေးများကို နားလည်သုံးသပ်လိုသူများအတွက် အထောက်အကူ ဖြစ်နိုင်မည်ဟု မျှော်လင့်ပါသည်။

ဤစာအုပ်ကို ထုတ်ဝေနိုင်ရန် အားပေးကူညီခဲ့သူ တို့ အား ကျေးဇူးတင်လျက်ရှိပါသည်။ များပြားလှသော အလုပ်တာဝန်များကြား မှ စေတနာပြည့်ဝစွာဖြင့်အဓိကဘာသာပြန်သူအဖြစ်လည်းကောင်း စာတည်းဖြတ်သူအဖြစ်လည်းကောင်း ဆောင်ရွက်ခဲ့သည့် ဒေါက်တာအောင်ခင်“လန်ဒန်” ကို အထူးကျေးဇူးတင်ရှိကြောင်း ဖော်ပြအပ်ပါသည်။

အောင်ဆန်းစုကြည်

စာတည်း၏ အမှာ

လွန်ခဲ့သော ရှစ်နှစ်ခန့်  “၁၉၈၅” ခုနှစ်ကဖြစ်သည်။ နှင်းထူထပ်စွာကျနေသည့် ထိုနှစ် ဆောင်းရာသီတနေ့ တွင်ဒေါ်အောင်ဆန်း စုကြည်နှင့် ပထမဆုံးအကြိမ်ကျနော် တွေ့ ဆုံခဲ့ရသည်။ ထိုစဉ်က အင်္ဂလန်တွင် ရန်ကုန်တက္ကသိုလ်မှ လုပ်ဖော်ကိုင်ဖက်ဟောင်း သမိုင်းဆရာဆရာမများ ရောက်ရှိနေခိုက်ဖြစ်သဖြင့်အောက်စဖို့ ဒ်တက္ကသိုလ်တွင် တနေ့ စုဝေးကြသည်။

ထိုနေ့ ၌ပင် ဒေါ်အောင်ဆန်းစုကြည်တို့  ဇနီးမောင်နှံက သူတို့ အိမ်တွင် လက်ရည်ပွဲပြင်ဆင်ထားသဖြင့် ကျနော်တို့  သမိုင်းအုပ်စု သွားကြသည်။ ကျနော်နှင့် ကျနော့်ဇနီးအပါအဝင် အားလုံးဧည့်သည် ရှစ်ယောက် ရှိ၏။

ဒေါ်စုကိုယ်တိုင် လုပ်ထားသော ကိတ်မုန့် များ စားသောက်၍ တပျော်တပါး ရှိလှသည်။ ကျနော်သည် ဒေါ်စု၏ခင်ပွန်း ဒေါက်တာ မိုက်ကယ် အဲရစ်နှင့်သာ စကားပြောရသည်ကများပြီး ဒေါ်စုမှာမူအမျိုးသမီးဝိုင်းတွင် လက်မလည်နိုင်အောင်ဧည့်ခံရင်း စကား လက်ဆုံကျနေသည်က များ၏။

ဒေါ်စုတို့ အိမ်မှာ အတော်လေးကျယ်ဝန်းသည်ဟု ဆိုနိုင်သော်လည်း ကုလားထိုင်များ၊ စားပွဲများနှင့်စာအုပ်စင်များကလွဲ၍ ကျနော် ဘာမျှမတွေ့ မိ။ လင်မယားနှစ်ယောက်စလုံးရိုးရိုးကုပ်ကုပ်နှင့် စာပေလိုက်စားသူများ ဖြစ်သည်ဟူ၍သာ ကျနော့်စိတ်ထဲ၌ မှတ်ချက်ချမိသည်။

ထိုနေ့  တွေ့ ဆုံ ပြီးနောက်ပိုင်း ကျနော်နှင့် ဒေါ်စုတို့ ဇနီးမောင်နှံ လုံးဝ အဆက်အသွယ် မရှိသလောက် ဖြစ်သွားသည်။ “၁၉၈၈” ခုနှစ်ရောက်မှ မြန်မာပြည်ဒီမိုကရေစီအရေးတော်ပုံတွင် ဒေါ်စု ဇောက်ချ၍ လုပ်ကိုင်နေသည်များကို သတင်းစာများတွင် ဖတ်ရ သည်။ လူကြုံများနှင့်ပါလာသော ဗွီဒီယိုအခွေများတွင်လည်း ဒေါ်စုကိုတွေ့ ရသည်။ ကျနော်သည် မဆလခေတ်ကို စက်ဆုပ်ရွံရှာ ပြီး“မဆလ” ဒဏ်ကိုလည်း မခံနိုင်သည့်အဆုံး နိုင်ငံခြားထွက်လာခဲ့သူဖြစ်သည်။ ဒေါ်စုမှာမူလွတ်လပ်နေရာမှ အမိနိုင်ငံသို့ ပြန်ရင်း မိမိ၏ ယုံကြည်ချက်အတိုင်း ဒီမိုကရေစီထွန်းကားရေးအတွက် တိုက်ပွဲဝင်ရုန်းကန်နေသူဖြစ်သည်။ ဒေါ်စုကို ရိုးသား ဖြောင့်မတ် သိမ်မွေ့ သော အိမ်ရှင်မတဦးအဖြစ်သာ သိရှိထားခဲ့သဖြင့် ရေရှည်တိုက်ပွဲတွင် ခံနိုင်ရည်ရှိပါ့မလားဟု အစတွင် ကျနော် သံသယ ဖြစ်မိသည်။ သို့ သော် ဒေါ်စု ဦးဆောင်သည့် ဒီမိုကရေစီတိုက်ပွဲ အချိန်ကြာလာသည်နှင့်အမျှ ထိုသံသယစိတ် တို့  လွင့်စင်ကွယ်ပျောက်ကုန်တော့သည်။

ဒေါ်စု အင်္ဂလိပ်ဘာသာဖြင့်ရေးသား၍ ခင်ပွန်းသည် ဒေါက်တာမိုက်ကယ်အဲရစ် တည်းဖြတ်ထုတ်ဝေသော "Freedom From Fear" စာအုပ်ကို “၁၉၉၁” ခုနှစ် ဒီဇင်ဘာလတွင် ဖတ်လိုက်ရသည်။ ထိုစာအုပ်ကို မြန်မာဘာသာ ပြန်ဆိုထုတ်ဝေသင့်သည်ဟု ကျနော် တွေးမိသည်။ ထိုစာအုပ် ကို တကယ်တမ်း မြန်မာပြန်ရာတွင် ကျနော် အဓိကအခန်းမှပါဝင်လာရမည်ဟု ထိုစဉ်က မထင်မှတ်ခဲ့ပါ။ ကျနော် နောက်ဆုံး မြန်မာပြန်ဆိုရေးသားထုတ်ဝေခဲ့သည့် အတွေ့ အကြုံမှာ “၁၉၇၁” ခုနှစ်က ဖြစ်သည်။ နှစ်ပေါင်း “၂၀” ကျော်ခန့်  မြန်မာပြန်ထုတ်ဝေသည့် အလေ့အထ ပြတ်လပ်နေခဲ့သဖြင့်အစတွင် ဒေါ်စုစာအုပ် ကို မြန်မာပြန်ရန် မဝံ့မရဲ ဖြစ်မိသော်လည်း မြန်မာတိုင်းရင်းသားတိုင်း ဖတ်ရှုသင့်သည့်စာအုပ်ဟု ယုံကြည်သည့်အတွက် အတတ်နိုင်ဆုံး အားထုတ် ပြန်ဆိုခဲ့ရသည်။ အထူးသဖြင့်မြန်မာစာဖတ်ပရိသတ်အတွက် ရည်စူးထားသည့်အလျောက် အင်္ဂလိပ်စာအုပ်နှင့်မတူဘဲ တမူ ထူးခြားနေမှာ အမှန်ဖြစ်သည်။ ဗိုလ်ချုပ်အောင်ဆန်းကို မြန်မာ့လွတ်လပ်ရေးဖခင်ဟု လူတိုင်းလိုလို ငယ်စဉ်ကတည်းက သိရှိထား ခဲ့ကြသော်လည်း ဗိုလ်ချုပ်၏ အတွေးအခေါ်အယူအဆများ ကို လေးလေးနက်နက် နားလည်သဘောပေါက်မိသူ အလွန်နည်းပါး လိမ့်မည်ထင်သည်။ ထိုလူနည်းစုထဲတွင် ဒေါ်စု အထင်ရှားဆုံးဖြစ်မည်မှာပြောရန်မလိုဟု ယုံကြည်သည်။ ဗိုလ်ချုပ်အောင်ဆန်း၏ အတွေးအခေါ်အယူအဆများပေါ်တွင်အခြေခံ၍ မိမိကိုယ်ပိုင်ယုံကြည်ချက်များကို တည်ဆောက်ထားသော ဒေါ်စု၏အတွေး အခေါ် ကို မြန်မာတိုင်းရင်းသားတိုင်းသိရှိနားလည် သဘောပေါက်ရန် လိုအပ်သည်။

မြန်မာနိုင်ငံတွင် “၁၉၆၂” ခုနှစ်မှ “၁၉၈၈” ခုနှစ်အထိပြည်သူလူထု ယုံကြည်အားထားလောက်သည့် နိုင်ငံရေးခေါင်းဆောင်မျိုး ပေါ်ပေါက်ရန် အခွင့်အလမ်း မရှိခဲ့ပါ။ “၁၉၈၈” ခုနှစ် ဒီမိုကရေစီအရေးတော်ပုံ ပေါ်ပေါက်လာသည့်အခါတွင်မှ ကိုယ်ကျိုးစွန့် ၍ တိုင်းပြည်အတွက် အနစ်နာခံလုပ်ကြမည့် ငယ်ရွယ်သောခေါင်းဆောင်များ ပေါ်ပေါက်လာခြင်းဖြစ်သည်။ ထိုအထဲတွင်ဒေါ်စုသည် ဗိုလ်ချုပ်အောင်ဆန်း၏ နိုင်ငံရေးအမွေကို ဆက်ခံမည့်သူအ ဖြစ်၎င်း၊ငြိမ်းချမ်းသောနည်းဖြင့်တိုင်းရင်းသားစည်းလုံးညီညွတ်ရေး ကိုရယူနိုင်မည့်သူအဖြစ်လည်းကောင်း၊ တပ်မတော်သားတို့ ကရိုသေလေးစားရသူအဖြစ်၎င်း၊ အများပြည်သူ၏ ယုံကြည်ကိုးစား မှုရယူထားသူအ ဖြစ်၎င်း၊ အမျိုးသားပြန်လည်သင့်မြတ်ရေးကို လုပ်ဆောင်နိုင်မည့်သူအဖြစ်လည်းကောင်း ပေါ်ထွက်လာပါသည်။

ကွယ်လွန်သူ သမိုင်းပညာရှင် ဗိုလ်မှူးဘရှင် ရေးသား၍ “၁၉၅၀” ခုနှစ်က ပထမဆုံးအကြိမ် ပုံနှိပ်ထုတ်ဝေခဲ့သည့် “မြန်မာနိုင်ငံ တော်သမိုင်း” စာအုပ်တွင် မြန်မာ့ရှေးဟောင်းသမိုင်းပညာရှင်ကြီး ပါမောက္ခ “ဂျီအိပ်ခ်ျလုစ်” က “ဗမာမဟုတ်သော နိုင်ငံသားများ အပေါ် ကွယ်လွန်သူအောင်ဆန်း ထားရှိသော သဘောထားများကို ကျနော် များစွာလေးစားမိပါ၏။ မြန်မာနိုင်ငံ စည်းလုံးရေးကို “ဓား”ဖြင့်မဟုတ်ဘဲ နိုင်ငံ့ခေါင်းဆောင်ပီသစွာ လေးလေးနက်နက် အဓိပ္ပာယ်ရှိရှိ ကြိုးပမ်းရာတွင် “ကျန်စစ်သား” လွန်သည်မှစ၍

အောင်ဆန်းသည် ပထမဆုံးသော ဗမာဖြစ်သည်ဟု ကျနော် ယူဆပါသည်” ဟု ၎င်း၏ အမှာစာတွင် မှတ်တမ်းတင်ထားသည်။

ဒေါ်စုသည် ဖခင်လုပ်သူ၏ ခြေရာအတိုင်း လိုက်နိုင်မည်ဟု ကျနော်ယုံကြည်၏။ သို့ သော် မြန်မာနိုင်ငံ၌ ဒီမိုကရေစီထွန်းကားရန် ဒေါ်စုတဦးတည်း အနစ်နာခံကြိုးပမ်း၍ ရမည်မဟုတ်၊ လူတိုင်းက မိမိတို့ ၏ ကိုယ်ကျိုးသက်သက်ကိုသာ ကြည့်မနေဘဲ၊ အမျိုး သား ပြန်လည်သင့်မြတ်ရေးနှင့် ဒီမိုကရေစီအရေးတို့ အတွက် တတ်နိုင်သ၍ တာဝန်သိသိကူညီမှသာ မြန်မာနိုင်ငံတွင် ဒီမိုကရေစီထွန်းကား၍ စစ်မှန်သော တိုင်းရင်းသားစည်းလုံးညီညွတ်ရေးကို ရရှိနိုင်မည် ဖြစ်သည်။

စာအုပ်ပါ အသုံးအနှုန်းများကို နေ့ စဉ်သုံး မြန်မာစကားနှင့် အနီးစပ်ဆုံးဖြစ်စေရန်ရည်ရွယ်ထားသဖြင့် ဥပမာ“ကျွန်မ” “ကျွန်တော်” ဟူသော စာလုံးပေါင်းကို မသုံးဘဲ “ကျမ”“ကျနော်” ဖြင့်အစားထိုး သုံးစွဲထားသည်။ မူရင်း မြန်မာစကားတွင် မိမိကိုယ်မိမိ “ငါ” ဟူ၍ ရည်ညွှန်းသော်လည်း အာဏာရှင်ဘုရင်များခေတ်တွင် “ကျွန်”ဟူသော ဝေါဟာရ ခေတ်စားလာခဲ့၍ “ငါ” ဟူသော မူလအသုံးအနှုန်းမှာ ဘုရားစာများတွင်သာ ကျန်နေတော့မည်ဖြစ်သည်။

စာအုပ် ဖြစ်မြောက်ရေးအတွက် အဖက်ဖက်မှ ကူညီကြသည့် လန်ဒန်မြို့မှ အရှင်ဥတ္တရ၊ ဦးစိန်ကျော်လှိုင်နှင့်အခြား မြန်မာပြန်ဆို ကူညီသူများအား အထူးလှိုက်လှဲစွာ ကျေးဇူးတင်ရှိပါသည်။ မြန်မာပြန်ဆိုရာ၌ တစုံတရာ ချွတ်ယွင်းမှုရှိမည်ဆိုလျှင် ကျနော့် တွင်သာ တာဝန်ရှိပါသည်။

ဒေါက်တာအောင်ခင်

လန်ဒန်

“၇- ၉- ၉၃”

No comments:

Post a Comment