1.02.2009

ဒေါ်အောင်ဆန်းစုကြည်၏ ကြောက်ရွံ့ခြင်းမှ ကင်းလွတ်ရေး (အပိုင်း၅)

“စု” မှာ ဖတ်ရှုကျက်မှတ်ရန် စာအုပ်တသေတ္တာလည်း ပါလာပါသည်။ နှစ်ပေါင်းများစွာ လွတ်လပ်ရေး ရုန်းကန်မှု ဒဏ်ကို ခံခဲ့ရသူများအား ကူညီ ထောက်ပံ့ရန် စီမံကိန်းများကို ကွပ်ကဲနေသော အဖွဲ့အစည်းတခုနှင့် ကျမတို့ ဆက်သွယ်ပါသည်။

စီမံကိန်းတရပ်၏ တာဝန်ခံဖြစ်သူ လူငယ်တဦးလာရောက်၍ ၎င်းတို့လုပ်ငန်းအကြောင်း ရှင်းပြပါသည်။ လွတ်လပ်ရေးတိုက်ပွဲတွင် ကျဆုံး ခဲ့သော ရဲဘော်များ၏ ကျန်ရစ်သူဇနီးများအတွက် နေအိမ်များ ဆောက်လုပ် နေကြရာ အဲလ်ဂျီးရီးယန်းလူမျိုးများသာမက နိုင်ငံတကာမှလူငယ် များပါ ဝင်ရောက်ကူညီရန် ဖိတ်ခေါ် ကြိုဆိုကြောင်း ပြောပါသည်။ “စု” လည်း ထိုဆောက်လုပ်ရေး စခန်းတွင် ရက်သတ္တပတ်အတော်ကြာ သွားရောက် နေထိုင်ကာ လုပ်အားပေးခဲ့ပါသည်။ အလုပ်သွန်သင်ကြီးကြပ်သူမှာ ရုရှားလူမျိုးဖြစ်ပြီး လုပ်ဖော်ကိုင်ဖက်များမှာ အဲလ်ဂျီးရီးယား၊ ပြင်သစ်၊ လက်ဗနွန်၊ ဟော်လန်နှင့် ဂျာမနီ စသောတိုင်းပြည်များမှ လူငယ် များ ဖြစ်ပါသည်။ အစားအသောက်နှင့် နေရာထိုင်ခင်း ပေးသော် လည်း လုပ်ခမပေးပါ။

“စု” ၏ မိတ်ဆွေများသည် သူမအား ကာဗီးလီး (Kabyle) တောင်တန်းများသို့ လက်ထပ်မင်္ဂလာပွဲတပွဲ တက်ရောက် ကြည့်ရှုရန် ခေါ်သွား ဖူးသည်။ ကျမတို့နှစ်ဦးအတူ ဆဟာရသဲကန္တာရအစပ်ရှိ မြို့လေးတမြို့ တိုင်အောင်လည်း ခရီးရှည်ထွက်ခဲ့ပါသည်။ နွေရာသီအပူရှိန် ပြင်းထန် လွန်းလှသဖြင့်ထိုထက်လွန်၍ မသွား နိုင်ခဲ့ပါ။ နောက် အလည်အပတ်ခရီးတရပ်အနေနှင့် ရောမခေတ်က ဆောက်လုပ်တည်ခဲ့သော မြို့ပျက်ကြီး ရှိရာသို့သွားခဲ့၏။ ထိုမြို့ပျက်တွင်းရှိ လဟာပြင်ဇာတ်ရုံကြီး၏ ကျောက်ပြားခင်းထားသော တလင်းပြင်ပေါ်တွင် ဘင်ဘဲလား၏ သစ္စာခံများက ဘင်ဘဲလား အသက်ရှည်ပါစေဟု စာလုံးကြီးများနှင့် ရေးထား ပါသည်။ “စု” မော်ရော်ကို သို့ ခရီးတခေါက်ထွက်ခဲ့ပြီး စပိန်နိုင်ငံ တောင်ဘက်ကမ်းခြေကိုလည်း ခြေချမိသည် ဆိုသလောက်တော့ ရောက်ခဲ့ပါသည်။ ထို့နောက် ပြန်လည်စာဖတ်ပြီး ကျောင်းပိတ်ရက်အဆုံး တွင် ကျေကျေနပ်နပ်ကြီးနှင့် အောက်စဖို့ဒ်သို့ပြန်သွား နိုင်ခဲ့ပါသည်။

ဘွဲ့ရပြီးနောက် “စု” သည် လပိုင်းမျှ စာသင်ပို့ချခြင်းနှင့် သမိုင်းဆရာ ဟယူးတင်ကာ (Hugh Tinker)နှင့်အတူ သုတေသနလုပ်ခြင်း စသည်တို့ကို ဆောင်ရွက်ပြီးသောအခါ နယူးယောက်ရှိ ကျမနှင့်လာ၍နေပါသည်။ အဲလ်ဂျီးယားတွင် လေးနှစ်မျှ တာဝန်ထမ်းဆောင် ပြီးနောက်ပိုင်း ကျမကုလသမဂ္ဂဌာနချုပ်သို့ ပြန်ရောက် နေပါသည်။ မိသားစုမိတ်ဆွေတဦးဖြစ်သူ ဖရင့်ထရေ ဂါ (Frank Trager) က ၎င်း အပြည်ပြည်ဆိုင်ရေးရာ ပါမောက္ခ အဖြစ် ဆောင်ရွက်နေသော နယူးယောက်တက္ကသိုလ်၌ “စု” ဘွဲ့ လွန်သင်တန်းတက်ရန် စီစဉ်ပါသည်။

ပါမောက္ခထရေဂါသည် အမေရိကန် ထောက်ပံ့ရေးအစီအစဉ်တခုဖြင့် မြန်မာပြည်တွင် နှစ်အတန်ကြာ နေခဲ့ဖူး ပါသည်။ သူသည် အရှေ့တောင် အာရှနှင့် အရှေ့ဖျားနိုင်ငံများတွင် ကျယ်ပြန့််စွာ ခရီးလှည့်လည်ဖူးကာ၊ ထိုဒေသများ၏ ကိစ္စအဝ၀တို့တွင် စိတ်ဝင်စားသူတဦးဖြစ်ပါသည်။ သူရေးသော “ဘားမား၊ ပဒေသရာဇ်နိုင်ငံမှ သမတနိုင်ငံသို့” အမည်ခံစာအုပ် ထွက်ခဲ့သည်မှာလည်း မကြာသေးပါ။ သူသည် “စု” ၏ တိုးတက် မှုကို ဂရုတစိုက်လေ့လာပါသည်။

ကျမတို့နေရာမြို့လယ် မန်ဟတ်တင် (Midtown Manhatteည) မှ နယူးယောက်တက္ကသိုလ်သို့ သွားရသော ဘတ်စ်ကားခရီး မှာ အတော် ရှည်ပြီးကားမူးတတ်သော “စု” အတွက် ပင်ပန်းခက်ခဲပါသည်။

ဘတ်စ်ကားမှတ်တိုင်မှ ပန်းခြံတခုကိုဖြတ်ပြီး၊ ဝါရှင်တန်ရင်ပြင် (Washington Square) သို့သင်တန်းတက်ရန် “စု” သွားရသော လမ်း၌ ကျက်စားလေ့ရှိသော လူကြမ်းများ၏ အန္တရာယ်ကလည်း ရှိပါသေးသည်။ ကုလသမဂ္ဂ ရုံးသို့ ကျမတို့နေအိမ်မှ ခြောက်မိနစ်လောက်သာ လမ်းလျှောက်ရပါသည်။ သို့ဖြင့်လောလောဆယ် “စု” ကုလသမဂ္ဂတွင် အလုပ်ဝင်ပြီးနောက်မှ စာဆက်သင်ရန် စိတ်ကူးပေါ်ပါသည်။ အလုပ် လျှောက်လွှာများ၊ ထောက်ခံစာများ၊ တွေ့ဆုံမေးမြန်းခြင်းများနှင့် ဖြစ်ရိုးဖြစ်စဉ် ကြန့်ကြာမှုနှင့် အခက်အခဲများကို ကျော်လွန်ပြီးသောအခါ “စု” ကုလသမဂ္ဂဝန်ထမ်းတဦး ဖြစ်သွားပါတော့သည်။ သုံးနှစ်ကြာမျှ “စု” ကုလသမဂ္ဂတွင် အလုပ်လုပ်ပြီး နောက်ဆုံးနှစ်နှစ်တွင် အုပ်ချုပ်ရေး နှင့် ဘတ်ဂျက်ပြုစုရေးဆိုင်ရာ အကြံပေး ကော်မတီကို အထောက်အကူပြုရသော ကုလသမဂ္ဂရုံးအဖွဲ့တွင် တာဝန်ထမ်းဆောင်ပါသည်။ ကော်မတီဝင် များသည် မိမိတို့နိုင်ငံများ၏ ကိုယ်စားလှယ်များအဖြစ် ခန့်အပ်ထားရခြင်းမဟုတ်ဘဲ၊ ဘဏ္ဍာရေးဆိုင်ရာ ကိစ္စများတွင် ကျွမ်းကျင်သူများအဖြစ် ခန့်အပ်ခြင်းခံရသူများ ဖြစ်ပါသည်။ ကုလသမဂ္ဂနှင့် အရံအဖွဲ့ အစည်းများ အားလုံးအပြင် ကမ္ဘာ့ကျန်းမာရေးအဖွဲ့၊ စားနပ်ရိက္ခာနှင့် လယ်ယာစိုက်ပျိုးရေးအဖွဲ့များကဲ့သို့သော အထူး အေဂျင်စီများ၏ စီမံကိန်းအစီအစဉ်များနှင့် ဘတ်ဂျက်များကို ထို ကော်မတီက လေ့လာမှတ်ချက်ချ ပြင်ဆင်ပြီး သဘောတူညီမှုရရန် တင်ပြရပါသည်။

အလုပ်များခက်ခဲသော်လည်း ကုလသမဂ္ဂလုပ်ငန်းများ၏ ကုန်ကျစရိတ်ကို အသေးစိတ်စီစစ်ရခြင်းနှင့် ထက်မြက် ထူးချွန်သော အဖွဲ့ဝင်များ တို့ကြောင့် စိတ်ဝင်စားဖွယ်ကောင်းလှပါသည်။ ထိုအဖွဲ့ဝင်များနှင့် “စု” ကောင်းစွာ သိကျွမ်းလာပါသည်။

ကုလသမဂ္ဂဝန်ထမ်းများသည် ညနေပိုင်းနှင့် သတင်းပတ်ကုန်ပိုင်း အားလပ်ချိန်များ၌ ပရဟိတလုပ်ငန်းများတွင် လုပ်အားပေးလေ့ ရှိကြ ပါသည်။ မန်ဟတ်တင်ရှိ ကျမတို့နေအိမ်မှ ဘတ်စ်ကားနှင့်သွားလျှင် ဆယ်မိနစ်ခန့် သာဝေးသော ဘဲလ်ဗယူး (Belleview) ဆိုသည်မှာ နယူးယောက်ဆေးရုံကြီးတခု၏ အစိတ်အပိုင်းဖြစ်ပါသည်။ မြို့ကြီးရှိ အဆင်းရဲဆုံး၊ ကုမရသော ရောဂါစွဲကပ်နေသူများနှင့် ခိုကိုးရာမဲ့များ အတွက်ဖြစ်ပါသည်။ ဘဝကို ရင်မဆိုင်နိုင်တော့ဘဲ ကိုယ်စိတ်နှစ်ဖြာပြိုလဲလုမတတ် ဖြစ်နေသူများကို ထိုဆေးရုံသို့ ခေါ်လာလေ့ရှိပါသည်။ လူမမာများအား စာဖတ်ပြပေးရန်၊ အဖော်ပြုရန် အစီအစဉ်များတွင်ပါဝင်ရန် အမျိုးသမီး၊ အမျိုးသားများ အမြဲ အလိုရှိနေပါသည်။

ထိုအစီအစဉ်တွင် “စု” ပါဝင်၍ အပတ်စဉ်နာရီပေါင်းများစွာ လုပ်အားပေးပါသည်။ ဤကား သူမမိခင်၏ ပရဟိတလုပ်ငန်း အစဉ်အလာအရ ဆောင်ရွက်ခြင်း ဖြစ်ပါသည်။

ထိုအချိန်က မြန်မာနိုင်ငံမှ ဦးသန့်သည် ကုလသမဂ္ဂအတွင်းရေးမှူးချုပ် ဖြစ်ပါသည်။ ဟဒ်စင်မြစ်ကို လှမ်း၍မြင်ရသော သူ၏အိမ်ကြီးသည် ရီးဗားဒေးလ် (Riverdale) အရပ်တွင်ရှိပြီး ကျမတို့နေအိမ်မှ ကားနှင့် တနာရီခန့် သွားရပါသည်။ ဦးသန့်အိမ်၌ တည်ခင်းကျင်းပသော တနင်္ဂနွေနေ့ ထမင်းစားပွဲများမှာ ကျမတို့အဖို့ အလွန် စိတ်ရွှင်လန်းဖွယ်ရာဖြစ်ပါသည်။ အခြား မြန်မာမိတ်ဆွေများလည်း လာကြပြီး ကျမတို့အကြိုက် မြန်မာ အစားအစာများ ကျွေးမွေးလေ့ရှိပါသည်။ ဦးသန့်၏ မြေးတဦးဦး၏ မွေးနေ့ကဲ့သို့သော အထူးနေ့များတွင် မြန်မာ များအပြင် နိုင်ငံတကာမှ ကုလသမဂ္ဂအမြဲတန်း ကိုယ်စားလှယ်များကိုပါ ဖိတ်ကြားဧည့်ခံပါသည်။

အစားအစာမှာမူ အစဉ်အမြဲ အကောင်းဆုံးမြန်မာ ထမင်းဟင်းများဖြစ်ပါသည်။ ဦးသန့်မိသားစုက နွေးထွေး ပျူငှာကာ ဧည့်ဝတ်ကျေ လှပါသည်။ ကျမတို့ကမူ ဧည့်သည်တွေ သိပ်မများသော ထမင်းစားပွဲများကို ပိုမို၍နှစ်သက်သော်လည်း၊ ထိုအခါများ၌ပင်လျှင် လူမှုရေး၊ နိုင်ငံရေး၊ ကမ္ဘာ့အခြေအနေ၊ ဦးသန့် ကိုင်တွယ် နေရသော ပြဿနာများ စသည်တို့ကို စိတ်ပါလက်ပါ ဝိုင်းဝန်းဆွေးနွေးနိုင်ခြင်းမရှိပါ။ ဦးသန့်၏ အိမ်ရှင် အနေနှင့် ဆောင်ရွက်ရသော တာဝန်အဝ၀ကြောင့် ထိုကဲ့သို့စကားဝိုင်း ဆွေးနွေးပွဲများ မဖြစ်နိုင်ခဲ့ဟု ထင်ပါသည်။

မြန်မာနိုင်ငံမှ ကုလသမဂ္ဂအမြဲတန်းကိုယ်စားလှယ်ဖြစ်သူ ဦးစိုးတင်၏ ဖိတ်ကြားဧည့်ခံပုံများမှာမူ အနည်းငယ် ကွာခြားပါသည်။ သူလည်း ရီးဗားဒေးလ်၌ပင် ဦးသန့်၏ဂေဟာလောက် ကြီးကျယ်ခမ်းနားခြင်းမရှိသော အိမ်တလုံး၌ နေပါသည်။ အထွေထွေ ညီလာခံကြီးကျင်းပ ချိန်ဖြစ်သော စက်တင်ဘာလ ဒုတိယအပတ်မှ ဒီဇင်ဘာလလယ်ခန့် အတွင်းဆိုလျှင် ဦးစိုးတင်သည် အလုပ်ကိစ္စများ၊ မြန်မာကိုယ်စားလှယ် အဖွဲ့နှင့် အခြားကိုယ်စားလှယ်အဖွဲ့များကို ဧည့်ခံကျွေးမွေးရခြင်းဖြင့် မအားမလပ် ဖြစ်နေလေ့ရှိပါသည်။ အခြား အချိန်များတွင်မူ နယူး ယောက်ရှိ မြန်မာများကို သူ၏အိမ်သို့ ဗုဒ္ဓဘာသာပွဲတော် အခါသမယများ၌ ဖိတ်ခေါ် လေ့ရှိပါသည်။ ကျမတို့သည် သူ၏ ဇနီးနှင့် သားသမီး များကို ခင်မင်နှစ်သက်ပါသည်။ ဦးစိုးတင်သည် သဘောထား ကြီးသူ ဖြစ်သည့်အလျောက် မြန်မာများကို သိုးများ၊ ဆိတ်များဟူ၍ ခွဲခြားပြီး မဆက်ဆံပါ။ ဆိတ်များဆိုသည်မှာ ဦးနေဝင်းလက်အောက် မြန်မာနိုင်ငံ၏အခြေအနေကို ဝေဖန်သူတို့ဖြစ်ပြီး၊ သာမန်အားဖြင့် သံရုံးအရာရှိ များ၏ “ပ” ထားခြင်းကို ခံရတတ်ပါသည်။ ဦးစိုးတင်အိမ်၌ကား အခြေအတင် ဆွေးနွေး ငြင်းခုန် နိုင်ပါသည်။ တခါတရံ အငြင်းအခုန်မှာ ပြင်းထန်သော်လည်း အများအားဖြင့် ဗွေမယူတမ်း၊ ခင်မင်သော သဘော ဆောင်ပါသည်။

တချိန်တွင် ကုလသမဂ္ဂအထွေထွေညီလာခံ ကျင်းပဆဲအချိန်အတွင်း ကျမနှင့် “စု” ကို ဦးစိုးတင်အိမ်သို့ ထမင်းစား ဖိတ်ပါသည်။ မြန်မာ ကိုယ်စားလှယ်အဖွဲ့ဝင်အ ချို့က ကျမတို့နှင့်တွေ့လိုကြောင်း ပြောပါသည်။

ဦးစိုးတင်သည် အစဉ်ယဉ်ကျေးဖော်ရွေသူ တဦးဖြစ်သော်လည်း ဤဖိတ်ကြားပုံမှာမူ ထူးခြား နေသဖြင့် တခုခုတော့ တခုခုပဲဟု ကျမ ထင်မိပါသည်။ သူ၏ ရီးဗားဒေးလ်နေအိမ်သို့ ကျမတို့နေ့လယ်လောက် ရောက်သွား ပါသည်။ ပန်းများ၊ ရွက်လှပင်များ၊ အနက်နှင့် ရွှေရောင် ခြယ် မြန်မာယွန်းထည်များနှင့် ပြည့်နေသော လေးထောင့်ပုံ ဧည့်ခန်းကြီးအတွင်းရှိ ဆိုဖာများနှင့် ကုလားထိုင်များကို အခန်းဘေးကိုကပ်၍ ရွှေ့ထားပြီး၊ ကော်ဖီပန်းကန်တင် စားပွဲကြီးများကို ထိုင်ခုံများရှေ့တွင်စီထား၏။ ဆိုဖာများနှင့် ကုလားထိုင်များ ပေါ်တွင် အထွေထွေညီလာခံ တက်ရန် ရောက်နေသော မြန်မာသံအမတ်ကြီးများ တသီတတန်းကြီး ထိုင်နေကြ၏။ ကျမတို့နှင့် မတွေ့ ဖူးသေးသော သူများအား မိတ်ဆက် ပေးပြီး “စု” ကို အခန်းတဖက်စွန်း၌ လူကြီး နှစ်ယောက်အကြားတွင် ထိုင်စေပါသည်။ ကျမကိုမူ ကိုယ်စားလှယ်အဖွဲ့ကို ဦးဆောင်သူ ဗိုလ်မှူးကြီး မောင်လွင် ရှိရာနှင့် မဝေးလှသော လူနှစ်ဦးအကြား၌ ထိုင်စေပါသည်။

ဦးစိုးတင်၏ဇနီးက သစ်သီးဖျော်ရည်များ လိုက်၍ကမ်းခြင်း၊ အာလူးကြော် စသော သွားရည်စာများကို စားပွဲများ ပေါ်ချခြင်း စသည့်ဝတ္တရားများ ပြီးစီးသည်နှင့် အထူးဧည့်သည်တော်များနှင့် ထိုက်တန်အောင် ချက်ပြုတ် ထားသော ထမင်းပွဲကိုအပြီးသတ်စီမံရန် ကပ်လျက်အခန်းထဲသို့ ထွက်သွားပါသည်။ အားလုံး အလ္လာပသလ္လာပ စကားများ ပြောကြပါသည်။ ဦးစိုးတင်သည် ယဉ်ကျေးစွာ ပြုံးနေသော်လည်း အနေရ ခက်နေပုံရပါသည်။ ရောက်ရှိ နေသော လူစုလူဝေးက “စု” အပေါ်တွင် စီရင်ချက်တမျိုးမျိုးချရန် စိုင်းပြင်းနေသည်မှာ ထင်ရှားပါသည်။

ဘယ်လို စီရင်ချက်မျိုးချမည်ကိုတော့ ကျမ မတွေးနိုင်ဖြစ်နေပါသည်။ ကိုယ်စားလှယ်အဖွဲ့ အကြီးအကဲက ဦးဆောင် တိုက်ခိုက် ပါတော့သည်။ “စု” မည်ကဲ့သို့ ကုလသမဂ္ဂ၌ အလုပ်လုပ်နေပါသနည်း၊ မည်သည့် နိုင်ငံကူးလက်မှတ် ကိုင်ဆောင်ထားပါသနည်း၊ သူမမိခင်သည် သံအမတ် ကြီး မဟုတ်တော့သဖြင့် “စု” အနေနှင့် သံတမန်များ ဆိုင်ရာ နိုင်ငံကူးလက်မှတ်ပြန်အပ်ရမည် ဖြစ်ပါသည်။ ယခုထိ ပြန်မအပ်ရသေးဆိုသည် မှာ မှန်ပါသလား။ သံတမန်များဆိုင်ရာ နိုင်ငံကူးလက်မှတ်ကို ဆက်လက်ကိုင်ထားခြင်းမှာ ဥပဒေနှင့်မညီကြောင်း သူမ သိမည်ဖြစ်ပါသည်။ အလွန်မှ နည်းလမ်းမကျသောကိစ္စ ဖြစ်သဖြင့် အမြန်ဆုံးပြင်ဆင်ရန် လိုပါသည်။ တစု တဝေးလုံးက ဦးလွင်ပြောသမျှကို မျက်နှာလိုမျက်နှာရ အောက်ကျို့သောအသွင်ဖြင့် ထောက်ခံသံများပြုကာ “စု” ကို ဝိုင်းကြည့်နေကြပါတော့သည်။ “စု” က အနေမပျက် တည်ငြိမ်စွာရှိနေခြင်းမှာ ကျမအတွက် အတော် စိတ်သက်သာရာ ဖြစ်စေပါသည်။

သူမက ဣနြေ္ဒရှိရှိ လေအေးအေးနှင့် ပြန်ဖြေပါသည်။ နိုင်ငံကူးလက်မှတ်အသစ်ရရန် လန်ဒန်ရှိ မြန်မာသံရုံး၌ သူမ လျှောက်ထားသည်မှာ အချိန်အတော်ကြာသွားပြီ ဖြစ်သော်လည်း ယခုတိုင်အဖြေမရသေးကြောင်း၊ မည်ကဲ့သို့သော အကြောင်းကြောင့် ဤမျှထူးထူးခြားခြား ကြန့် ကြာနေရသည်ကို မပြောနိုင်ကြောင်း၊ နယူးယောက်သို့ သူမ ပညာသင်ရန်လာခဲ့ရာ၌၊ ရှိလက်စနိုင်ငံကူးလက်မှတ်ကိုပင် ကိုင်ဆောင် ခဲ့ရ ကြောင်း၊ စားဝတ် နေထိုင်ရေးအတွက် အလုပ်ရှာရန် လိုနေသည့်အချိန်၌ ကံအားလျော်စွာ ကုလသမဂ္ဂ၌ အလုပ် ရရှိခဲ့ကြောင်း၊ မြန်မာနိုင်ငံသား ဖြစ်ကြောင်း အထောက်အထားပြရန် နိုင်ငံကူးလက်မှတ်မှာ လိုအပ်ချက် ဖြစ်ကြောင်း၊ လပေါင်းများစွာကပင် လျှောက်ထားခဲ့သော နိုင်ငံကူး လက်မှတ်ကို လန်ဒန်သံရုံးမှ ပို့ပေးရန် စောင့်နေလျက်ပင်ဖြစ်ကြောင်း၊ နိုင်ငံကူးလက်မှတ် အသစ်ရောက်သည်နှင့် အဟောင်းကို ဝမ်းသာစွာ ပြန်အပ်မည်ဖြစ်ကြောင်း၊ နိုင်ငံခြား၌ အလုပ်လုပ်ကိုင်နိုင်ရန် နိုင်ငံကူးလက်မှတ် သံတမန်ဆိုင်ရာပဲဖြစ်စေ၊ ရိုးရိုးပဲဖြစ်စေတမျိုးမျိုး လိုအပ် သည်ကို အခန်းတွင်းရှိ ဦးလေးအား လုံး နားလည်ကြမည်ဟု သူမ ယူဆကြောင်း၊ “စု” က ယဉ်ကျေး သိမ်မွေ့သော အသံနေအသံထားနှင့် တိကျကောင်းမွန်သော မြန်မာစကားလုံးများကိုသုံး၍ ပြောသွား ပါသည်။

လန်ဒန်မှ မြန်မာသံအမတ်က ထကာ “စု” အနေနှင့် နိုင်ငံကူးလက်မှတ်အသစ်ရရန် လျှောက်ထားခဲ့သည်မှာ လပေါင်းများစွာရှိပြီ ဖြစ်ကြောင်းကို အတည်ပြုကာ ထုံးစံအတိုင်း လျှောက်လွှာကို ရန်ကုန်သို့ပို့ထားကြောင်း ပြောပါတော့သည်။ အဘယ့်ကြောင့် လပေါင်းများစွာ ကြာပြီဖြစ်သော်လည်း အကြောင်းမပြန်သေးသည်ကို သူ မသိရကြောင်းလည်း ပြောပါသည်။ အမှန်အားဖြင့် မြန်မာပြည်၌ ဤသို့ နည်းတူ နှောင့်နှေးကြန့်ကြာမှုများကို ဖြစ်ပေါ်စေသော ရှုပ်ထွေးပွေလီလှသည့် ဗျူကရက်ယန္တရားနှင့် အလုပ်အကိုင်မပီပြင်မှုများ အကြောင်းကို အခန်း တွင်းရှိ ကျမတို့အားလုံး သိရှိပြီးဖြစ်ပါသည်။

ထိုအခါမှ အခြားသံအမတ်များကလည်း “စု” အနေနှင့် မိမိလုပ်ခဲ့ပုံမှလွဲ၍ အခြားရွေးချယ်ရာလမ်းမရှိခဲ့ဟု သဘောတူကြပါတော့သည်။ ကိုယ်စားလှယ်အဖွဲ့အကြီးအကဲ၏ မျက်နှာထားကား မတင်မကျဖြစ်လာ၏။ တောင်းပန်သကဲ့သို့သောလေသံနှင့် အစကအခြေအနေကို လုံးစေ့ပတ်စေ့ နားမလည်ခဲ့ကြောင်း၊ ရန်ကုန် ပြန်ရောက်သော အခါ နိုင်ငံကူးလက်မှတ်ရုံးက လုပ်စရာရှိသည်များကို လျင်မြန်စွာလုပ်ရန် သူကိုယ်တိုင် ညွှန်ကြား လိုက်မည်ဖြစ်ကြောင်း ပြောပါသည်။ ဤပုဂ္ဂိုလ်ကြီးများမှာ “စု” ထက် အသက်အားဖြင့် ကြီးကြ သူများဖြစ်ကြ သော်လည်း ကောင်းသောအရည်အချင်းအားဖြင့် ကြီးသူများမဟုတ်ဟု ကျမထင်မိပါသည်။

ကျမလည်း ချက်ကောင်းယူကာ နိုင်ငံကူးလက်မှတ်တွေ လုံးလုံးမလိုတော့တဲ့နေ့ မြန်မြန် ရောက်ပါစေလို့ ကျမတို့ မျှော်လင့်ရမှာပဲ ဟု ပြောလိုက်ပါသည်။ ထို့နောက် ကျမတို့ နေ့လယ်စာစားကြပါသည်။

အမြဲတမ်းကိုယ်စားလှယ်အဖွဲ့ထဲတွင် မြန်မာပြည်အခြေအနေများကို ကျမတို့ပွင့်ပွင့်လင်းလင်း ဆွေးနွေး၍ ရသော မိတ်ဆွေတဦး ပါဝင်ပါ သည်။ ထိုမိတ်ဆွေကား “စု” ၏ ဝေဖန်ချက်များ သိပ်ရဲလွန်းသည်ဟု ယူဆသော အခါများ၌ “စု” က ယုံကြည်ချက်အရ သတ္တိရှိရုံမက၊ အဆက်အနွယ်အရလည်း သတ္တိရှိတာကိုးဟု နောက်ပြောင် လေ့ရှိ၏။ သူမ ဆိုလိုသည်မှာ “စု” သည် ဗိုလ်ချုပ်အောင်ဆန်းနှင့် ဒေါ်ခင်ကြည်တို့၏ သမီး ဖြစ်သဖြင့် တော်တော်နှင့် နှိမ်လို့ရမည်မဟုတ်၊ ကျမအထင်မှာတော့ “စု” သည် သွေးသားအရထက် စိတ်ဓာတ်အရ သူမ မိဘနှစ်ပါး၏ သမီး ပီသပါပေသည်။

No comments:

Post a Comment