ဗန်းမောင်တင်အောင် ကွယ်လွန်ခြင်း နှစ် ၃၀ မြောက် အခမ်းအနားကျင်းပ
မိုးမခ အထောက်တော် ၀၀၃
အောက်တိုဘာ ၂၄၊ ၂၀၀၈
ကိုလိုနီစနစ်၊ နယ်ချဲ့စနစ်နှင့် အာဏာရှင်စနစ်ခေတ် တလျောက်လုံး တော်လှန်သော စာရေးဆရာအဖြစ် မဆုတ်မနစ်ရပ်တည်ပြီး ကလောင်လက်နက်ဖြင့် အာခံတိုက်ခိုက်ခဲ့သူ၊ အဖိနှိပ်ခံ ပြည်သူလူထုဖက်က အမြဲတစေ ထာဝရ ရပ်တည် အသံပြုခဲ့သူ မြန်မာပြည်ရဲ့ သူရဲကောင်း စာရေးဆရာတဦးဖြစ်သူ ဗန်းမော်တင်အောင် (၁၉၂၀ - ၁၉၇၈) ကွယ်လွန်ခြင်း နှစ် ၃၀ မြောက် အမှတ်တရ အခမ်းအနားကို ကျန်ရစ်သူမိသားစု သားသမီးများက သမီးကြီး ဒေါ်တင်သန်းယုနေအိမ်၊ ၂၅ နှင်းဆီ ၃ လမ်း၊ ဂရင်းဗယ်လီ၊ ၉ မိုင် မရမ်းကုန်းမှာ ၂၃ အောက်တိုဘာ နံနက် ၉ နာရီက ၁၂ နာရီအထိ ကျင်းပခဲ့ပါတယ်။
အခမ်းအနားမှူအဖြစ် ဗြူတီမဂ္ဂဇင်း အယ်ဒီတာ ကိုထွန်းဝင်းငြိမ်းက ဆောင်ရွက်ခဲ့ပြီး အခမ်းအနား အစီအစဉ် ၉ ရပ်နဲ့ ကျင်းပတယ်လို့ ဆိုပါတယ်။
၁ - အခမ်းအနား ဖွင့်လှစ်ကြောင်း ကြေညာခြင်း၊ ၂ - နှစ်ခြင်း ခရစ်ယာန်သင်းအုပ်ဆရာ ဦးကျော်ညွန့်က ဂုဏ်ပြုစကားနဲ့ ၀တ်ပြုဆုတောင်းပေးခြင်း၊ ၃ သမီးကြီးက မိသားစုနှင့် ဧည့်သည်တို့ကို မိတ်ဆက်ပေးခြင်း၊ ၄ - ဆရာဒဂုန်တာရာက တာရာမဂ္ဂဇင်း ထုတ်ခဲ့စဉ် ဗန်းမော်တင်အောင်နဲ့ ဆုံခဲ့သည့် အတွေ့အကြုံများ ပြောကြားခြင်း၊ ၅ - ဆရာ ပါရဂူ ရန်တိနိကေတန် စာကြည့်တိုက် အတွက် ငွေ ၁ သိန်းကို ကျန်ရစ်သူ မိသားစုက ပေးလှူခြင်း၊ ၆ - နာမကျန်းသူ စာပေအနုပညာရှင် ၆ ဦးကို ကျပ်ငွေ ၂ သောင်းစီ ကျန်ရစ်သူ မိသားစုက ဒါနပြုခြင်း၊ ၇ - တကသ ကျောင်းသား ခေါင်းဆောင်ဟောင်း ဦးလှရွှေက ဗန်းမော်တင်အောင် ဂရပ်ဖစ်ဒီဇိုင်းပုံတူ ပန်းချီကားတချပ် မိသားစုထံ ပေးအပ်ခြင်း၊ ၈ - အခမ်းအနားပြီးဆုံးကြောင်း ကြေညာခြင်းနဲ့ ၉ အစီအစဉ်အဖြစ် အကျွေးအမွေးများနဲ့ ဧည့်ခံခဲ့ပါတယ်။
မိသားစုက ဒါနအကူအညီပြုတဲ့ စာရေးဆရာများမှာ - ညွန့်သစ်၊ မောင်အောင်နီ၊ မောင်ရန်ပိုင်၊ ဆရာဌေးကြည်၊ နီဟိန်း၊ ခင်ဝင်းသစ်တို့ ဖြစ်ကြပါတယ်။ တက်ရောက်သူ ပညာရှင်ပေါင်း ၁၀၀ ကျော် ရှိပါတယ်။ ဧည့်သည်များထဲမှာ ဒဂုန်တာရာ၊ ပါရဂူ၊ တိုးတက်ရေး သခင်အုန်းမြင့်၊ သခင်သိန်းမောင်၊ ဟံသာဝတီ ဦးဝင်းတင်၊ ဌေးမောင်၊ မောင်မိုးသူ၊ အောင်လွင်၊ ဦးလှရွှေ၊ မောင်ဝံသတို့အပြင် ထင်ရှားတဲ့ စာပေအနုပညာနဲ့ နိုင်ငံရေး ခေါင်းဆောင်များ တက်ရောက်ခဲ့ကြပါတယ်။
(ဓာတ်ပုံ ကျေးဇူး - ဇေမှိုင်းနဲ့ မိုးမခ ၀ိုင်းတော်သားများ)
No comments:
Post a Comment