မိုးမခ အထောက်တော် ၀၀၃
အောက်တိုဘာ ၂၂၊ ၂၀၀၈
ပြည်တွင်းက အဓိကသုံးသည့် အီးမေးများမှာ ဂျီမေးဖြစ်ပြီး၊ ကျောင်းသား လူငယ်ပေါင်း ထောင်ချီ၊ သောင်းချီပြီး ဂျီမေးအကောင့် (နံမည်စာရင်း)ကို ရယူထားကြသည်။ ထိုဂျီမေးနှင့် ပြည်တွင်းပြည်ပ အင်တာနက် ချက် (စကားပြောခြင်း) ခြင်း၊ ဘလောက်များသို့ စာတင်ဆက်ခြင်း၊ အီးမေး စာ အသွားအလာများ ပြုလုပ်နေကြရာ ထိုဂျီမေးများအတွင်းသို့ မသမာသူများ၊ လက်တည့်စမ်းလိုသူများက ဖောက်ထွင်းရန် ကြိုးစားနေကြသည်ကို တွေ့နေရသည်။
မိမိတို့အီးမေး၊ မိမိလျို့ဝှက်စကားဝှက်နှင့် မိတ်ဆွေများ၏လိပ်စာများ၊ ကိုယ်ရေးကိုယ်တာများကို ပေါက်ကြားစေမည့် အင်တာနက်လင့်ခ် (လိပ်စာ) များကို နှိပ်မိစေရန် ထိုသူတို့က တဖက်လှည့်နှင့် ပေးပို့နေခြင်း ဖြစ်ကြောင်း သိရှိရသည်။
အထူးသဖြင့် အင်တာနက် ဂျီတော့ခ် ဗုံးကျဲသူ ဆိုသည့် အမည်နှင့် လင့်ခ်ကို ချက်လိုင်းမှ ဖြစ်စေ၊ အီးမေးစာဖြင့် ဖြစ်စေ ပေးပို့ခြင်း၊ အီးမေးလိပ်စာကို အသုံးပြုသူ ဟုတ်မဟုတ် အကြောင်းပြန်စေရန် ဆိုသည့်သဘောနှင့် ကွန်ဖန်မေးရှင်းလင့် ပုံသဏ္ဍန်များ ပေးပို့ခြင်းတို့ကို ပြုလုပ်လာကြရာ အမှုမဲ့အမှတ်မဲ့ အီးမေးသုံးစွဲသူများက နှိပ်မိကြသည့် နောက်ပိုင်းတွင် ၎င်းတို့အီးမေးများကတဆင့် အဆင့်ဆင့် ပေါက်ကြားမှု၊ လက်ဆင့်ကမ်း ကိုယ်ရေးကိုယ်တာများ တစိမ်းများလက်ဝယ်သို့ ရောက်ရှိသည်အထိ အနှောက်အယှက်ဖြစ်ကြရသည်ဟု ဆိုပါသည်။
အရိုးဆုံး လှည့်စားမှုမှာ မိမိ၏ အီးမေးနှင့် စကားဝှက်ကို ရိုက်ရန်အတွက် မိမိအီးမေးဝက်ဆိုက်က မေးလေသည့် ဟန်ဆောင်စာမျက်နှာတခုဖြင့် ခိုးယူခြင်းဖြစ်သည်။ သို့မဟုတ်ပါက အဆိုပါ ၀က်ဆိုက်များက သူတို့၏ ၀န်ဆောင်မှုများ အစွမ်းကုန်ပေးနိုင်ရန်အတွက် မိမိ၏ အီးမေးအမည်နှင့် စကားဝှက်ကို ထုတ်ဖော်ပေးရန် တောင်းဆိုခြင်းဖြစ်သည်။ အခြားတမျိုးမှာ မိမိအီးမေးကို အခြားတစိမ်းတယောက်၏ အီးမေးသို့ကိုပါ မိတ္တူပွား ပေးပို့စေလိုကြောင်း မိမိက သဘောတူပါသည် ဟူသော သဘောတူညီချက် လင့်ခ်ကို လှည့်စားပြီး နှိပ်ခိုင်းခြင်း ဖြစ်သည်။ ထိုသို့ လိမ်လည်မှုများမှာ အင်တာနက် အီးမေး ပေါ်ကာစကတည်းက ရှိပြီးဖြစ်ပေါ်လည်း အလစ်အငိုက် ဖမ်းပြီး လိမ်လည်ခြင်းဖြစ်သဖြင့် ယခုအချိန်အထိ ခေတ်စားလျက်ရှိသည်။ အောင်မြင်လည်း အောင်မြင်နေသည်။
လတ်တလောတွင် မိမိတို့ အီးမေးကို ၀င်ရောက် စစ်ဆေးပြီး မိမိ၏ ဆက်တင်များတွင် တစိမ်းသူ၏ အီးမေးကို မေးဖောဝပ်ဒင်း (မိတ္တူ ပွားပို့ပေးခြင်း) လုပ်ထားခြင်း ရှိမရှိကို စစ်ဆေးရန် လိုသည်။ နောက်တခုမှာ မိမိ အီးမေး စကားဝှက်များကို အသစ်တခု ပြောင်းထားလိုက်ရန် ဖြစ်သည်။ မိမိ မိတ်ဆွေများကိုလည်း ယခု သတိပေးသတင်းကို လက်ဆင့်ကမ်းပေးရန်လည်း လိုပါသည်။
စစ်အစိုးရက အတိုက်အခံ စာနယ်ဇင်း အင်တာနက်စာမျက်နှာများကို တိုက်ခိုက်နေသည်ဟု သတင်းများ ထွက်ပေါ်နေချိန်၊ အတိုက်အခံ အင်တာနက်ဆာဗာများရှိ မိမိ စာရင်းဖွင့်ထားသည့် နံမယ်၊ စကားဝှက်များကိုလည်း အထူးကြပ်မတ်ပြီး ကာကွယ်နေရချိန်တွင် ယခုကဲ့သို့ အီးမေးသုံးစွဲသူများထံက ကိုယ်ရေးကိုယ်တာ အချက်အလက်များကို ခိုးယူရန် ကြိုးစားမှုများ ဖြစ်ပွားလာနေရာ ထိုအီးမေးတွေက အဆင့်ဆင့် မလိုလားအပ်သော အနှောက်အယှက်များ ဆက်လက် ဖြစ်ပွားနေနိုင်သည်ဟု ယူဆပါသည်။
No comments:
Post a Comment