2.13.2009

မတရား အလုပ်ဖြုတ်ခံရသည့် မြန်မာ အလုပ်သမ ၄ ဦး နစ်နာကြေးရရှိ



JACBA

ဖေဖေါ်ဝါရီ ၁၃

ထိုင်းနိုင်ငံ မဲဆောက်မြို့တွင် အကြောင်းပြချက် တစ်စုံတစ်ခု မရှိပဲ အလုပ်ဖြုတ်ခံခဲ့ရသော မြန်မာ အလုပ် သမများ ယမန်နေ့က နစ်နာကြေးငွေ ဘတ်တစ်သိန်းကျော် ရရှိလိုက်သည်။

၂၀၀၉ခုနှစ် ဖေဖော်ဝါရီလ၁၂ရက်နေ့ တွင် အလုပ်ရှင်က လျော်ကြေးငွေ (၁သိန်း၂သောင်း) ပေးသည်ကို
အလုပ် သမား ၄ဦးက ထိုင်းရှေ့ နေ ရုံးမှ တစ်ဆင့် လက်ခံ ရယူခဲ့သည်။၂၀၀၇ခုနှစ် မေလ ၁၈ရက်က အမျိုးသမီး ၂၄ဦး အကြောင်းမဲ့ အလုပ်ဖြုတ်ခံခဲ့ရစဉ် မဲဆောက် အခြေစိုက်(JACBA နှင့် SAW)တို့ မှ စောင့်ရှောက် ထားသည်။

၂၀၀၇ခုနှစ် ဇွန်လ ထိုင်းရှေ့ နေများ ကောင်စီ ဥပဒေ အထောက်အကူပြုဌာန (LLC)နှင့် တွဲဖက်၍ မြန်မာ ပြည်သူများ အရေး ပူးတွဲလှုပ်ရှားမှု ကော်မတီ (JACBA)မှ အလုပ်သမား ကာကွယ်ရေးရုံးသို့ အဆိုပါ အမှုကို တရားရုံး တင်ခဲ့သည်။ တရားရုံးသို့ မချိုသက်၊ မအိအိမွန်၊ မချိုချိုနှင့် မခင်ဌေးဝင်း ၄ဦးသာ တိုင်ကြားခဲ့သည်။)

၂၀၀၈ခုနှစ် ဇွန်လ၂၈ရက် အလုပ်သမား တရားရုံးမှ အဆိုပါ အလုပ်သမား၎ဦးအတွက် လျော်ကြေး
ငွေ (၄သိန်းခွဲ)ကို ပေးစေရန် တရားရုံးက ချမှတ်ခဲ့သည်။၂၀၀၈ခုနှစ် ဒီဇင်ဘာလ ၂၆ရက်နေ့ တွင် အလုပ်ရှင်က လျော်ကြေးပေးရန် ပျက်ကွက်သဖြင့်အလုပ်သမား တရားရုံးမှ အလုပ်ရှင်ပိုင်သောသိုးမွှေးစက် (၅၃)လုံးကို အမိန့် ဖြင့် သိမ်းယူခဲ့သည်။ ထိုသို့ စက်များ အသိမ်းခံရကာမှ အလုပ်ရှင်ဘက်က သဘောထားပြောင်းကာ လျော်ကြေးပေးရန် သဘောတူခဲ့သည်။ သို့သော် ၄င်း၏ အခြေအနေအရ လျော်ကြေးငွေ (၁သိန်း၂သောင်း)သာ ပေးနိုင်ပါကြောင်း တရားရုံးထံ ပန်ကြားခဲ့သည်။

မြန်မာပြည်သူများအရေးပူးတွဲလှုပ်ရှားမှုကော်မတီ(JACBA)ဥက္ကဌ ကိုမိုးကြိုး က “ကျနော်တို့အဖွဲ့ စတင် ဖွဲ့စည်း ခဲ့တဲ့ ၂၀၀၄ ကနေ ၂၀၀၉ ခုထိဆိုရင်ဒီလိုနစ်နာဆုံးရှုံးမှုတွေကနေ အမှုပေါင်း ၃၀ အတွက် လျှော်ကြေး (ဘတ်၇၀၀၀၀၀) ရရှိ အောင်မြင်ခဲ့ပြီး ဖြစ် ပါတယ်၊”ဟု ပြောသည်။

မဲဆောက်မြို့ တွင်း ထိုင်းအစိုးရအနေဖြင့် တစ်နေ့လုပ်အားခ ၁၅၀ ဘတ် သတ်မှတ်ထားသော်လည်း လုပ်ငန်းရှင်များက မည်သည့်အခါမှ မပေးသည့်အပြင် အလုပ်ရုံပိုင်ရှင်များက စည်းဝေးတိုင်ပင်၍ တစ်နေ့ကို ၁၂၀ ဘတ်ပေးမည်ဟု တရားဝင် ထုတ်ဖေါ် ပြောဆိုခဲ့သော်လည်း ယခုအချိန်ထိ မဲဆောက်တွင် မြန်မာအလုပ်သမား တစ်ယောက်၏ လုပ်အားခမှာ ဘတ် ၄၀ နှင့် ဘတ်၁၀၀ အကြားတွင်သာ ရှိသည်။ မဲဆောက်မြို့သည် အလုပ်သမား လိုအပ်ချက်ထက် အလုပ်သမားများ အလွန်ပိုလျှံနေသဖြင့် လုပ်ငန်းရှင်များက ပေးချင် သလောက် ပေး၍ ခိုင်းစေနေကြောင်း အလုပ်သမားအရေး ဆောင်ရွက်နေသူများက ပြောပြသည်။

ကိုကျော်သောင်းမှ ပေးပို့ပါသည်။

No comments:

Post a Comment