နိုဝင်ဘာ ၂၀
ဘန်ကောက်မြို့ ဘန်ဘော် ငါးသေတ္တာရုံ အလုပ်သမားအချို့ အားယနေ့နံနက် စောစောက ထိုင်းလူဝင်မှု ကြီးကြပ် ရေးမှ ၀င်ရောက် ကာ မြန်မာ အလုပ်သမားအချို့နှင့် အတူ ဆယ်နှစ်ဝန်းကျင်အရွယ် မြန်မာငယ်နှစ်ဦးလည်း အိုင်ဒီစီ အချုပ်သို့ပို့ ဆောင်ခြင်း ခံလိုက်ရသည်။
ဘန်ကောက်မြို့ ဖလန်ဆောင်လမ်းမကြီး ဘန်ဘော် မီးရထား ဘူတာရုံအနီးတွင် ရှိသော ငါးသေတ္တာ (ပါကပေါင်) စက်ရုံဝင်း အတွင်းသို့ ထိုင်းလူဝင်မှု ကြီးကြပ်ရေးအဖွဲ့နှင့် ထိုင်းရဲတပ်ဖွဲ့ဝင် သုံးဆယ်ကျော်ခန့် ကားဆယ်စီးကျော်ဖြင့် လာရောက်ပြီး စီနင်းဖမ်းဆီးခဲ့သည်။ နံနက် ၆နာရီအချိန် မြန်မာအလုပ်သမားများ အိပ်ရာနိုးထစနှင့် အချို့ အိပ်နေတုန်း အချိန်တွင် ထိုင်းအာဏာပိုင်များက အခန်းများကို တစ်ခန်းချင်း ဖွင့်စေပြီး နေထိုင် အလုပ်လုပ်ကိုင်ခွင့် (ဘတ်)ရှိ/မရှိ စစ်ဆေးခဲ့သည်။
အစပိုင်းတွင် မြန်မာအလုပ်သမားများနေထိုင်ရာ အေ.ဘီ.စီ အဆောင် သုံးဆောင်မှ ရာပေါင်းများစွာသော မြန်မာ အလုပ်သမားများကို ကားပေါ်သို့ တင်ဆောင်ခဲ့သည်။ ငါးသေတ္တာ စက်ရုံမန်နေဂျာတို့က စက်ရုံမှ အလုပ်သမားများကို စာရွက်စာတမ်းများ တစ်ဦးချင်းပြ၍ ရွေးထုတ်ခဲ့သဖြင့် အားလုံးနီးပါး ပြန်လွတ်ခဲ့သည်။
နေထိုင်အလုပ်လုပ်ကိုင်ခွင့် (ဘတ်)ရှိသော်လည်း နယ်ကျော်သည်ဟု အကြောင်းပြပြီး မြန်မာ အလုပ်သမား ၃ဦးနှင့်အတူ ဆယ်နှစ်အရွယ် မြန်မာကလေးငယ်နှစ်ဦးကို အိုင်ဒီစီ (ဗဟိုအချုပ်ကြီး)သို့ ဖမ်းဆီး ခေါ်ဆောင် သွားခဲ့သည်။
ကရင်ပြည်နယ် ကော့ကရိတ်မြို့နယ်မှ ဆယ့်နှစ်နှစ်အရွယ် မောင်ဇော်လင်းမှာ ဘန်ကောက်မြို့ တစ်နေရာမှ မြန်မာ ဘုန်းတော်ကြီးကျောင်းတွင် ပညာသင်ကြားနေစဉ် ဖျားနာသဖြင့် မိခင်ဖြစ်သူထံသို့ လာရောက် နားနေစဉ် အတွင်း ဖမ်းဆီးခံခဲ့ရသည်။
မိခင်ဖြစ်သူ ဒေါ်ဇော်ထန်းက “အရင် ကျမ မကြုံဖူးဘူးလေ၊ သားကို ပုလိပ်ဖမ်းထားတယ်လို့ သူများတွေပြောလို့ အလုပ်က ပြန်လာပြီး ကြည့်တော့ သားက ကားပေါ်မှာ ရောက်နေပြီ၊ ဘာလုပ်လို့ လုပ်ရမှန်းမသိတော့ဘူး” ဟု ပြောသည်။
မောင်ဇော်လင်း၏ အစ်ကိုကြီးဖြစ်သူ ကိုညီညီက“ ကျနော့် ညီလေးကို ဖမ်းသွားလို့ ကျနော် နောက်က လိုက်သွားတယ်။ အိုင်ဒီစီဲ (ထိုင်းဗဟို) အချုပ်ကြီးကို ရောက်တော့ အရာရှိက ဘာပြောလဲဆိုရင် ဗမာတွေ တော်တော် ပြောရခက်တယ်၊ ကမ္ဘောဒီယားနဲ့ လာအိုတို့ ပတ်စပို့ လုပ်တာ ဘာမှမဖြစ်ဘူး၊ လာမယ့် နှစ်အကုန်မှာ ပတ်စပို့ မလုပ်လို့ကတော့ ဒီထက် ဖမ်းရအုံးမှာပဲ ဆိုပြီး ပြောတယ်။ ခု ကျနော်တို့ကို ယာယီပတ်စပို့ လုပ်အောင် ဖိအားပေး လုပ်စေတဲ့သဘောလို့ ကျနော် နားလည်မိတယ်”ဟု ပြောသည်။
နောက်ကလေးငယ် တစ်ဦးမှာ ကော့သောင်းမြို့ လင်းမချန်ရပ်ကွက်မှ အသက်သုံးဆယ်ကျော်အရွယ်ရှိ ကိုမောင်နီနှင့် မ၀ါစမ်းတို့၏ တစ်ဦးတည်းသောသား မောင်ကျော်စိုးမင်း ဖြစ်သည်။
“ကျမတို့ သားကို ရွာက အမေတို့ဆီမှာ ထားပါတယ်၊ မိဘနှစ်ပါးလုံးက ဒီမှာဆိုတော့ ကလေးလည်း အောက်မေ့တယ်။ ကျမတို့ လည်း အောက်မေ့လိုလေ ဘန်ကောက်ကို ခေါ်တင်လိုက်တာ၊ ရောက်တာ ၂လလောက်ပဲ ရှိသေးတယ်။ ကျမသားလေး ထမင်းဝအောင် စားရပါ့မလား၊ စောင်ခြုံရပါ့မလား၊ တွေးပြီး ကျမစိတ်ပူနေတယ်”ဟု ၀မ်းနည်းစွာ ငိုကြွေးရင်း ပြောသည်။
ဖခင်ဖြစ်သူ ကိုမောင်နီက“ကျနော်နဲ့ ကျနော့်မိန်းမတို့မှာ ဘတ်ရှိပါတယ်။ ကလေးက အိပ်နေတာ၊ ပုလိပ်တွေ ၀င်လာတော့ ထွက်ပြေးသေးတယ်။ ကျနော်တို့ အလုပ်သမားတွေ နေထိုင်တဲ့ တန်းလျားကို ပုလိပ်တွေ ၀ိုင်းထားတာ။ အကူအညီ ပေးနိုင်တဲ့ လူတွေကို ဆက်သွယ်ပြီးတော့ သားလွတ်မြောက်လာအောင် ကြိုးစားကြည့်ပါ့မယ်။ သားအတွက် မနက်ဖြန် အနွေးထည် ယူသွားမယ်၊ အစောကြီးသွားတွေ့မယ်၊ ၀ိုင်းဝန်းကူညီပေးကြပါ”ဟု ပြောသည်။
မြန်မာအလုပ်သမားများ ထောင်ပေါင်းများစွာ နေထိုင် အလုပ်လုပ်ကိုင်နေကြသော ပါကပေါင် စက်ရုံးဝင်း အနီးတွင် နှစ်ဆယ်ချီ နေထိုင်နေသည့် ကိုအရှည်ကြီးက သူ၏ ထင်မြင်ချက်ကို ပြောရာတွင် “ အယင်တုန်းက လုပ်ငန်းပိုင်ရှင်တွေက သက်ဆိုင်ရာတွေနဲ့ အဆင်ပြေအောင် ပေါင်းထားတယ်။ ဒီနှစ်က လူသစ်တွေကိုပါ ဘတ်အသစ် လုပ်ပေးလိုက်တော့ မပေးတော့ဘူး။ နောက်လူအသစ် ၂၀၀ ထပ်ခေါ်မယ်လို့ သတင်းလွှင့် ထားတယ်။ အဲဒါကြောင့်လို့ ကျနော်ထင်တယ်။ အတိအကျတော့ မသိရဘူး။ လမ်းထိပ်မှာ ကားတွေဆို တစ်လမ်းလုံး ပြည့်နေတာပဲ၊ မြန်မာ အလုပ်သမားတွေရဲ့ ဘ၀ကကျီးလန့် စာစား ဘ၀ပါပဲ”ဟု ပြောသည်။
မြန်မာအလုပ်သမားများအား နှစ်နိုင်ငံအစိုးရမှ ယာယီပတ်စ်ပို့ လုပ်ငန်းစဉ်မှာ အောင်မြင်ချောမွေ့မှု မရှိပဲ ဖြစ်နေသည်။ ထိုင်းနိုင်ငံအတွင်း မြန်မာ အလုပ်သမားများ နေထိုင် အလုပ်လုပ်ကိုင်ခွင့် သက်တမ်းမှာလည်း လာမည့် ၂၀၁၀ ဖေဖေါ်ဝါရီလ ၂၈ရက်နေ့တွင် ကုန်ဆုံးတော့မည် ဖြစ်သည်။
No comments:
Post a Comment