11.26.2009

ဒေါ်အောင်ဆန်းစုကြည်၏ စာ ယခုအချိန်အထိ အကြောင်းပြန်မှု မရသေးဟု ရှေ့နေများပြော

ဒေါ်အောင်ဆန်းစုကြည် ၏ နေအိမ်တွင် ယနေ့ ၂၆ ရက်နေ့ နေ့လည် ၂နာရီခန့်မှ ညနေ ၄နာရီ အထိ တွေ့ဆုံဆွေးနွေးခဲ့ ပြီးနောက် သူမ ရှေ့နေများ၏ အဖွဲ့ ပြောရေးဆိုခွင့် ရှိသူ ဦးကြည်ဝင်းက ဒေါ်အောင်ဆန်း စုကြည်က ဗိုလ်ချုပ်မှူးကြီး သန်းရွှေထံ နိုဝင်ဘာလ ၁၁ရက်နေ့က ပေးပို့ထားသော စာနှင့် ပါတ်သက်၍ ယခု အချိန်အထိ မည်သည့် အကြောင်းပြန်ကြားချက်မှ မရရှိသေးကြောင်း ပြောကြားသွားခဲ့ပါသည်။
နေအိမ် အကျယ်ချုပ်ကျခံနေရသူ အတိုက်အခံ ဒီမိုကရေစီခေါင်းဆောင် နိုဘယ် ငြိမ်းချမ်းရေး ဆုရှင် ဒေါ်အောင်ဆန်းစုကြည်က ဗိုလ်ချုပ်မှူးကြီး သန်းရွှေထံ ပေးပို့သော စာထဲတွင် တိုင်းပြည်၏ အကျိုးစီးပွါးအတွက် ဗိုလ်ချုပ်မှူးကြီး သန်းရွှေနှင့် တိုက်ရိုက်တွေ့ဆုံဆွေးနွေးခွင့် ပြုပါရန်နှင့် တိုင်းပြည်၏ အကြပ်အတည်းများကို ပူးပေါင်းဆွေးနွေး ဖြေရှာကြရန် တောင်းဆို ထားခဲ့ပါသည်။
သူမ၏ ရှေ့နေတဦးဖြစ်သူ ဦးကြည်ဝင်းကပြောပြရာတွင် ယနေ့ တွေ့ဆုံဆွေးနွေးမှုသည် ပြီးခဲ့သော နိုဝင်ဘာ ၁၃ ရက်နေ့က ဗဟိုတရားရုံးချုပ်တွင် တင်ထားခဲ့သော ဒေါ်အောင်ဆန်းစုကြည်၏ အယူခံလွှာနှင့် ပါတ်သက်၍ လျှောက်လဲချက်ပေးရန် ဆွေးနွေးခဲ့ကြပြီး သူ့အနေဖြင့် ရှေ့အပါတ်ထဲလောက်တွင် လျှောက်လဲချက်ပေးရမည့် ရက်ကို ထုတ်ပြန်မည်ဟု မျှော်လင့်ကြောင်း ပြောပြသွားခဲ့ပါသည်။
အကယ်၍ ဗဟိုတရားရုံချုပ်မှ လက်ခံခဲ့လျှင် ဒေါ်အောင်ဆန်းစုကြည်ရဲ့ အမှု အယူခံကို ကြားနာသင့်ကြောင်း ပဏာမ အနေဖြင့် လျှောက်ရမည် ဖြစ်ကြောင်းလဲ ဦးဥာဏ်ဝင်းမှ ဆက်လက်ပြောပြ ခဲ့ပါသည်။
ဦးဥာဏ်ဝင်းသည် ထိုတွေ့ဆုံဆွေးနွေးပွဲ အပြီးတွင် ဂျပန်သံရုံး၏ ပထမ အတွင်းဝန် Mr. Yoshinori Yakabe နှင့် သွားရောက် တွေ့ဆုံခဲ့သည်ဟု သိရသော်လည်း နောက်ဆက်တွဲ သတင်းများ မရရှိသေးပါ။
ပြည်တွင်း သတင်းထောက် (ရွှေဝါရောင် သတင်းလွှာ)

No comments:

Post a Comment