ရန်ကုန် ၊သြဂုတ် ၁၃ ။
ရွေးကောက်ပွဲကို လာမည့် နိုဝင်ဘာလ ၇ ရက်နေ့တွင် ကျင်းပမည်ဟု ယနေ့နံနက်ကကြေငြာခဲ့ပြီးနောက် ရွေးကောက်ပွဲဝင်မည့် နိုင်ငံရေးပါတီများသည် ယခုလ ၁၆ရက်နေ့မှ ၃၀ရက်အတွင်း ပါဝင်ယှဉ်ပြိုင်မည့် ကိုယ်စားလှယ်လောင်းများစာရင်းကို ပေးပို့ရမည်ဟု ရွေးကောက်ပွဲ ကော်မရှင်မှ ထပ်မံထုတ်ပြန်ခဲ့ပါသည်။
ယနေ့နေ့လည်ပိုင်းက ထုတ်ပြန်ခဲ့သော ရွေးကောက်ပွဲ ကော်မရှင်၏ ထုတ်ပြန်ချက်ကို တီဗီ အစီအစဉ်နှင့် ရေဒီယိုတို့မှ ထုတ်ပြန်သွားခဲ့ပါသည်။
ရွေးကောက်ပွဲ ကော်မရှင်သည် ထိုတင်သွင်းလာသော ကိုယ်စားလှယ်လောင်းများ စာရင်းကို ရွေးကောက်ပွဲ ဥပဒေများနှင့် ကိုက်ညီခြင်းရှိမရှိ စစ်ဆေးသွားမည်ဟုလည်း ဆိုပါသည်။ စစ်ဆေးပြီး လက်ခံမည့် ကိုယ်စားလှယ်လောင်းများ စာရင်းကို လာမည့် စက်တင်ဘာ ၆ရက်နေ့မှ ၁၀ရက်နေ့အတွင်း ထုတ်ပြန်သွားမည်ဟု ဆိုပါသည်။
နအဖမှ ထုတ်ပြန်ထားသော ရွေးကောက်ပွဲဆိုင်ရာ ဥပဒေအရ ဝင်ရောက်ယှဉ်ပြိုင်မည့် ပါတီများသည် အနည်းဆုံး မဲဆန္ဒနယ် ၃ခုတွင် ဝင်ရောက်ယှဉ်ပြိုင်ရမည် ဖြစ်ပါသည်။
ယခုထုတ်ပြန်ချက်အတိုင်း လိုက်နာရန် ပျက်ကွက်လျှင် နိုင်ငံရေးပါတီအဖြစ်မှ ရပ်စဲခံရမည် ဖြစ်ပါသည်။
ရွေးကောက်ပွဲ ဥပဒေအရ နိုင်ငံရေးပါတီ တစ်ခုလျှင် ကျပ်ငွေ သုံးသိန်းနှင့် ရွေးကောက်ခံ မည့်ကိုယ်စားလှယ် တစ်ဦးလျှင် ကျပ်ငွေ ငါးသိန်းနှုန်း တင်သွင်းရမည် ဖြစ်ပြီး ၄င်းငွေကြေးများကို ပြန်လည် ထုတ်ပေးမည် မဟုတ်ပါ။
ထိုရွေးကောက်ပွဲ ဥပဒေတွင်ပင် ရွေးကောက်ခံမည့် ကိုယ်စားလှယ်လောင်း တစ်ဦးသည် ကျပ်ငွေ ဆယ်သန်းအထိ ရွေးကောက်ပွဲ ရံပုံငွေအဖြစ် သုံးစွဲခွင့်ရှိသည်ဟု ဆိုပါသည်။
ထိုအချက်များအရ တနိုင်ငံလုံး အတိုင်းအတာနှင့် ဝင်ရောက်ယှဉ်ပြိုင်မည့် ပါတီ တစ်ခုအနေနှင့် ကျပ်ငွေ သန်းပေါင်းမြောက်များ စွာ အကုန်အကျခံရမည်ဖြစ်ရာ နိုင်ငံပိုင် ပစ္စည်းများကို အလွဲသုံးစားလုပ် ရယူထားပြီး စစ်တပ်မှ ကျောထောက်နောက်ခံ ပေးထားသည့် ဝန်ကြီးချုပ် သိန်းစိန် ဦးဆောင်သည့် ကြံဖွံ့ပါတီမှအပ မည်သည့်ပါတီမှ ထိုကဲ့သို့ သုံးစွဲနိုင်ခြင်း ရှိမည်မဟုတ်ဟု အကဲခတ်များက သုံးသပ်ပြောဆိုနေကြပါသည်။
ပြည်တွင်းသတင်းထောက် (ရွှေဝါရောင် သတင်းလွှာ)
No comments:
Post a Comment