3.24.2009

သူတို့အတွေး သူတို့အမြင်များ

သူတို့အတွေး သူတို့ အမြင်များသို့ ပေးပို့သော အမြင်များသည် ပေးပို့သူများ၏ အတွေးအမြင်များသာ ဖြစ်၍ ဤ ဘလော့၏ အာဘော် မဟုတ်ကြောင်း သိစေအပ်ပါသည်။ မည်သူမဆို မိမိတို့၏ အတွေးအမြင်များကို ရေးသား ပေးပို့ နိုင်ပါသည်။ ပုဂ္ဂိုလ်ရေး တိုက်ခိုက် ရေးသားမှုများမှ အပ ဘလော့တွင် ထည့်သွင်း ဖေါ်ပြသွားမည် ဖြစ်ပါသည်။

တန်ဖိုးကိုနားလည်ပါ(ပညာကျော်)


မြန်မာ့စကားပုံတွင် " အမိုက်ကစ ပြသာဒ်မီးလောင်" "ပျားရည်တစ်စက် ပြည်ကိုဖျက်" ဟူ၍ ရှိပါသည်။ အမိုက်က စ ပြသာဒ် မီးလောင်ဆိုသည်မှာ နားလည်လွယ်သော စကားပုံဖြစ်သော်လည်း ပျားရည်တစ်စက် ပြည်ကိုဖျက် စကားပုံ ကို နားမလည်သူ များပါသည်။ ဤစကားပုံမှာ တကောင်း ရာဇဝင်လာ စကားပုံလည်း ဖြစ်ပါသည်။
ရှေးအခါက တိုင်းပြည်တစ်ပြည်တွင် ဆင်းရဲသား တစ်ယောက်သည် ပျားဖွတ် (ပျားရည်ညစ်/ခံ)သော အလုပ်ဖြင့် အသက်မွေး ဝမ်းကျောင်းမှုကို လုပ်ကိုင်နေပါသည်။ တနေ့သော် ပျားဖွတ်သမားသည် တောမှရလာသော ပျားရည်ကို မြို့တွင်း၌ လည်ရောင်း ရင်းမြို့လယ်တွင် ပျားရည်တစ်စက် ကျကျန်ခဲ့ပါသည်။
ပျားရည်တို့သည် ရနံ့ မွေးကြိုင် သင်းပျံ့လှိုင်သော သတ္တိရှိလေရာ ပျားရည်ရနံ့ကြောင့် ပိုးဖလံတစ်ကောင် ရောက်လာပြီး ပျားရည်ကို စုပ်ယူလေသည်။ ပိုးဖလံအား အနီးအနားရှိ အိမ်တစ်အိမ်မှ ကြောင်တစ်ကောင်က မြင်ပြီး လာရောက်ဖမ်းလေ၏။ ထိုကြောင်ကို အနီးရှိ ခွေးတစ်ကောင်က မြင်ပြီး လိုက်ကိုက်လေရာ ကြောင်မှာ သေဆုံးသွားလေသည်။ ကြောင်ကိုကိုက်သော ခွေးအား ကြောင်ပိုင်ရှင်မှ ရိုတ်လေရာက စပြီး ခွေးပိုင်ရှင်နှင့် ကြောင်ပိုင်ရှင်တို့ အချင်းများ ခိုက်ရန်ဖြစ်ကြရာ ခွေးပိုင်ရှင်ဘက်က ဆွေမျိုးများ၊ ကြောင်ပိုင်ရှင်ဘက်က ဆွေမျိုး များ စသည်ဖြင့် ဝိုင်းအုံ ပူးပေါင်း ပါဝင်လာကြရာ၊ သူ့ဘက် ကိုယ့်ဘက် ပူးပေါင်းရင်း တမြို့ လုံးမှ တစ်နိုင်ငံလုံးသို့ ပျံ့ကာ နောက်ဆုံးတွင် ပြည်ပါပျက်ရလေသည်။ ဤသည်ကို အကြောင်းပြု၍ "ပျားရည်တစ်စက် ပြည်ကိုဖျက်" စကားပုံ ဖြစ်ပေါ် လာသည်ဟု သိမှတ်ဖူးပါသည်။
ယခုတလော နှစ်လအတွင်းတွင် မီဒီများ အင်တာနက်များတွင် ပလူပျံ ကြားနေရသည့် သတင်း၊ အီးမေးကို ဖွင့်လိုက်သည်နှင့် တနေ့တွင် ဆယ်စောင်ထက် မနည်းတွေ့  နေရသည်က "ရိုဟင်ဂျာ" အကြောင်းအရာများ ဖြစ်ပါသည်။ အစကတော့ သာမန်အားဖြင့် သာတွေ့ လာရ သော်လည်း ယခုတွေ့ လာရ သည်မှာ ရခိုင်၊ ဗမာ၊ မွန်၊ ရှမ်း၊ လားဟူ၊ ပလောင်၊ ချင်းများပါ ပါဝင်လာပြီး တစ်ဦးကို တစ်ဦး ရန်မူဆဲဆို ရေးသားသည့် စာများကိုပါ ဖတ်လာရပါသည်။
ထို့အပြင် ဘာသာရေးဆိုင်ရာ အဟုတ်၊ မဟုတ်ရေးသား ကြံစည်မှုမျိုး တို့ပါ ပါဝင်လာနေရာ ပြဿနာက တနေ့တခြား ကြီးထွားလာသည်ဟု ဆိုရတော့မည်သာ ဖြစ်ပါသည်။ ဤသို့ ရေးသား ပြောဆိုနေကြသူများကို ပြန်လည်လေ့လာသော် မြန်မာ့နိုင်ငံရေး အင်အားစုများသာ ဖြစ်နေကြသည်ကိုလည်း တွေ့ ရပါမည်။ အချိန် ကာလ အားဖြင့် ယနေ့ အချိန်သည် ကား အားအင် အပြည့်ဖြင့် တိုင်းရင်းသား ပေါင်းစုံ ပူးပေါင်းကာ (၂၀၁၀)ကို ဦးတည်ရမည့် အချိန်တွင် တစ်ဦးနဲ့ တစ်ဦး တစ်ဖွဲ့ နှင့် တစ်ဖွဲ့ သွေးကွဲစေသည့် ပြောဆို ရေးသားမှုမျိုးကိုကား ရှောင်ရှားသင့်သည်ဟုသာ မြင်ပါသည်။ လူသားအချင်းချင်း စာနာသနား တတ်ကြသည်မှာ လူ့သဘဝ အလှအပသာလျှင် ဖြစ်ပါသည်။
ရိုဟင်ဂျာဘဲဖြစ် ဘာဘဲဖြစ်ဖြစ် လူသားဟူသည် လူသားသာလျှင် ဖြစ်ပါသည်။ လူ့ အခွင့်အရေး ကမ္ဘာကို လွှမ်းမိုးနိုင်လေ ကောင်းလေပါဘဲ။ သို့သော်လည်း ယနေ့သည် မြန်မာနိုင်ငံ၏ အာဏာရှင်မှာ နအဖသာ ဖြစ်ပါသည်။ ထို့ကြောင့် ရိုဟင်ဂျာ ဟုတ်မဟုတ် သတ်မှတ် ညှိနိုင်းပေးနိုင်သည်မှာ နအဖသာ ဖြစ်လိမ့်မည်ဟု ကျနော်ထင်ပါသည်။
မိမိတို့ အနေဖြင့် ထိုပြဿနာကို ဖြေရှင်းလိုပါလျှင် ပထမဦးစွာ" နိုင်ငံအာဏာ" ရရှိနိုင်ရေးကို ကြိုးပမ်းပါ။ အာဏာရရှိပါမှ ဤပြဿနာကို မိမိတို့ ညှိနှိုင်း အဖြေရှာနိုင်ပါမည်။ ဒီတော့ မိမိတို့ အနေဖြင့် ဘာမှ မလုပ် ပေးနိုင်သော၊ လုပ်မရနိုင်သော လူအချင်းချင်း တစ်ဦးနဲ့ တစ်ဦး ပြောဆိုရေးသားရန်စောင် ဆဲဆိုနေခြင်း သည်ကား အဘယ်မှာ အကျိုး ဖြစ်စေ ပါမည်နည်း။
ဒီတော့ စာရေးသူတို့ သတိပြုရမည်မှာ နုတ်ခမ်းပဲ့ အချင်းချင်း မီးမုတ်နေခြင်းလား ခုတ်ရာနှင့်ရှရာ တစ်ထပ်တည်း ကျနေပါသလား။ စဉ်းစားဖို့ လိုပါလိမ့်မည်။ စာရေးသူသည် သမိုင်းပညာရှင် တစ်ယောက် မဟုတ်သဖြင့် သမိုင်း ကိုတော့ မပြောလိုပါ လက်ရှိအခြေအနေတခု အပေါ်ကိုသာ အနည်းငယ် သုံးသပ်လိုပါသည်။
မြန်မာနိုင်ငံတွင် သမိုင်းစဉ်ဆက် လက်တွဲလာကြသည့် လူမျိုးများထဲတွင် ကချင်၊ ကယား၊ ကရင်၊ ချင်း၊ မွန်၊ ရခိုင်၊ ဗမာ၊ ရှမ်းများနှင့် လူမျိုးနွယ်စုဝင် ခမီး၊ ပလောင်၊ ပအို့ စသည့် လူမျိုးစုများ များစွာ တွေ့ရ ပါမည်။ ရိုဟင်ဂျာကိုတော့ တွေ့ဖူးကြလိမ့်မည် မထင်ပါ။ နောက်ပြီး မြန်မာနိုင်ငံအတွင်းတွင် ယနေ့ ထက်တိုင် တရုတ်လူမျိုးများရှိပါသည်။ ရန်ကုန်၊ မန္တလေး၊ မော်လမြိုင် စသည်တို့  တွင် တရုတ်တန်းဆိုသည်မှာ ထင်ရှားစွာ ရှိပါလိမ့်မည်။ ထိုတရုတ်များသည် မြန်မာနိုင်ငံတွင် ယနေ့ အချိန်တွင် အမျိုးလေးဆက် မက ကြာမြင့်စွာ နေထိုင်ပြီးသော်လည်း သူတို့ကို မြန်မာအစိုးရမှ နိုင်ငံခြားသား မှတ်ပုံတင်ကိုသာ ကိုင်ဆောင်ခွင့် ပေးထားပြီး နိုင်ငံခြားသား အဖြစ်သာ သတ်မှတ်ထားပါသည်။ သို့သော်လည်း ထိုသူများသည် နိုင်ငံဝန်ထမ်းအဖြစ် အမှုထမ်းခွင့် ရှိသလို စီးပွားရေး လုပ်ပိုင်ခွင့်လည်း ရှိသည်။ ထို့အတူ မြန်မာနိုင်ငံ တစ်ဝှမ်းလုံးတွင် အစ္စလာန် ဘာသာဝင် မွတ်စလင်များ အများအပြား ရှိပါသည်။ မိတ္ထိလာ၊ လယ်ဝေးမြို့  များတွင် အစ္စလာန် တက္ကသိုလ်များပါ ရှိနေသေးသည်။ ထိုမွတ်စလင် လူမျိုးများကို စီးပွားရေး လုပ်ပိုင်ခွင့် မပြုဘဲ ပိတ်ပင် ထားခြင်း ရှိပါသလား။ နိုင်ငံခြားသား မြန်မာနိုင်ငံဖွား အဖြစ်ဖြင့် သတ်မှတ်ထားပြီး ဖြစ်သည် မဟုတ်ပါလား။ ဘင်္ဂလာဒေ့ရ်ှ နိုင်ငံတွင် ရခိုင်ရွာများ ရှိပါသည်။ ထိုရွာများမှ ရခိုင်များသည် မြန်မာနိုင်တွင် နိုင်ငံသားအဖြစ်ဖြင့် နေထိုင်ခွင့်ကို မရပါ။ နိုင်ငံဝန်ထမ်း အဖြစ်ဖြင့်လည်း တာဝန်ထမ်းဆောင်ခွင့် မရှိပါ။ ဘင်္ဂလာဖွား ရခိုင်များ ဖြစ်ခြင်းကြောင့် ဖြစ်သည်။ သို့ပါ၍ ရခိုင်ပြည်မှ မွတ်ဆလင်များကိုသာ ရိုဟင်ဂျာဟု သတ်မှတ်ပါသော် မြန်မာ တစ်နိုင်လုံးရှိ မွတ်စလင် များကိုကား မည်သို့ သတ်မှတ်ပါမည်နည်း။ နအဖကတော့ ပြောသည်မှာရှင်းပါသည် ဘင်္ဂါလီလူမျိုး အဖြစ်သာ လက်ခံသည်။
ဘာဘဲဖြစ်ဖြစ်ပါ တမြေတည်းနေသော လူသားများ အချင်းချင်း မေတ္တာတရားဖြင့် ကူညီစောင့်ရှောက်လို စိတ်ထားသည်မှာ ကောင်းမြတ်ပါပေသည်။ မြန်မာနွယ်ဖွား တိုင်းရင်းသား အချင်းချင်း ရန်ဖြစ်ပြိုကွဲရမည့် အဖြစ်မျိုးကိုတော့ မဖြစ်စေလို ပါ။ အမိုက်တို့ သည် တန်ဖိုးမရှိပါ။ ပြသာဒ်တို့ သည် အထွတ် အမြတ်ထားလေးစား ဂုဏ်ယူရမည့် အရာသာဖြစ်ပါသည်။ ထို့ ကြောင့် တန်ဖိုးမရှိသော အမိုက်ကစပြီး ပြသာဒ် မီးမလောင်စေရေး ကြိုတင်ကာကွယ် တားဆီးကြပါရန် မေတ္တာဖြင့် ရေးသား လိုက်၇ပါသည်။
စာရေးသူ၏ အမြင်ကို ရေးဖွဲ့ ခြင်းသာ ဖြစ်သည်။

ပညာကျော်

အမျိုးသား ပြန်လည်သင့်မြတ်ရေး အတွေးအမြင်များ(ဇော်မင်း)
Opinion

No comments:

Post a Comment