7.06.2009

“အသံ ညီ ပြီး အလုပ် တူ ဖို့” အတွက် “အမြင် တူ ပြီး အတွေး ညီ ကြပါစို့”

အပိုင်း ၁

မောင်ရွှေ

ဇူလိုင် ၄၊ ၂၀၀၉

၁။ လူထုခေါင်းဆောင် ဒေါ်အောင်ဆန်းစုကြည်ကတော့ လူထုအရှေ့ ထွက်ခွင့်ကြုံလိုက်တဲ့ အချိန်၊ နအဖရဲ့ တရားစွဲမှုကို ရင်ဆိုင်နေရတဲ့ ဘ၀မှာဘဲ မြန်မာနိုင်ငံရေး အခြေအနေ ပြောင်းလဲ သွားနိုင်အောင် ဆောင်ရွက် ပေးနေပါ တယ်။ နအဖရဲ့ မတရားတဲ့ အမိန့် အာဏာများနဲ့ ပျက်ဆီးနေတဲ့ တရားစီရင်ရေး စနစ်များကို နိုင်ငံတကာ အလယ်မှာ ကွက်ကွက် ကွင်းကွင်း မြင်လာအောင် ပြသနိုင်ခဲ့ပါတယ်။ ဒီအခြေအနေမှာ မြန်မာ့ ဒီမိုကရေစီအရေး လက်တွဲညီညီ ဆောင်ရွက်ကြဖို့ အတွက် ဆရာဦးဝင်းတင်က အလွန် အဓိပ္ပါယ်ရှိတဲ့ စကားနှစ်ခွန်း ပြောခဲ့ပါပြီ။ “နိုင်ငံရေးသစ်” နဲ့ “အလုပ်တူဖို့ အသံတူဖို့လိုပြီ” ဆိုတဲ့ စကားတွေပါ။

၂။ န၀တ၊ နအဖလက်ထက် အနှစ် (၂၀)ကျော် ကာလအတွင်း တိုင်းပြည်မှာ ဒီမိုကရေစီစနစ် ပြန်လည် ထွန်းကားဖို့ ကြိုးပမ်းခဲ့ရတဲ့ သမိုင်းဖြစ်စဉ်တွေကို ပြန်ကြည့်ရင် ဒီစကားလုံးတွေဟာ အလွန် အဓိပ္ပါယ်ရှိနေတာကို စေ့စေ့တွေးလေ ပိုပီပြင်လာလေပါဘဲ။ အလုပ်တူဖို့၊ အသံတူဖို့အတွက် နည်းလမ်းများကို စဉ်းစားကြည့်တဲ့အခါ အတွေး၊ အမြင်တွေ တူညီဖို့က ဆုံချက် နေရာမှာ ရှိနေ တယ်လို့ ယူဆမိပါတယ်။ ဒီမိုကရေစီဆိုတာ လူထုအတွက် လူထုကိုယ်တိုင် လူထုအားနဲ့ ဆောင်ရွက်ကြရတဲ့ အလုပ်တစ်ခုမို့ မြန်မာဒီမိုကရေစီအရေးမှာလည်း ဆုံချက် ဖြစ်တဲ့ အမြင်လည်း တူညီ၊ အတွေးလည်း တူညီနိုင်ဖို့အရေး လူထုအတွက် အထောက်အကူတစ်ခု ဖြစ်စေဖို့ ရည်ရွယ်ချက်နဲ့ ယခုဆောင်းပါးကို ရေးမိပါတယ်။

အာဏာရှင်စနစ်တိုက်ဖျက်ရေး

၃။ ယနေ့ မြန်မာ့နိုင်ငံရေး မြင်ကွင်းကို ကြည့်ရင် အာဏာရှင်စနစ်ကို တည်မြဲနေအောင် ဘက်စုံထောင့်စုံကနေ ကြိုးပမ်း နေကြတဲ့ နအဖစစ်အုပ်စုရဲ့ လှုပ်ရှားမှုတွေ၊ အာဏာရှင်စနစ်က လွတ်မြောက်ပြီး တိုင်းပြည်မှာ ဒီမိုကရေစီ စနစ် ဖွံ့ဖြိုးလာစေဖို့ နည်းလမ်း အမျိုးမျိုးနဲ့ ကြိုးစားနေသူများရဲ့ လှုပ်ရှားမှုတွေကို အထင်းသား တွေ့ရမှာ ဖြစ်ပါ တယ်။ ၁၉၆၂ခုနှစ် ဗိုလ်နေ၀င်း အာဏာသိမ်းပြီးတဲ့နောက် အာဏာရှင် စနစ် ပေါ်ပေါက်ခဲ့ရတဲ့ အချိန်ကစပြီး ယနေ့ အချိန်အထိ ကျနော်တို့ တိုင်းပြည်ကို အာဏာရှင်စနစ် လက်အောက်က လွတ်မြောက်အောင် ကြိုးစားခဲ့ကြတဲ့ သမိုင်းမှာ တော်လှန်ရေး အသွင်နဲ့ ပြောင်းလဲဖို့ ကြိုးစားခဲ့ကြသလို တဖြည်းဖြည်း ဆင့်ကဲဆင့်ကဲ ပြောင်းလဲလာစေဖို့ ကြိုးပမ်း ခဲ့ကြသူများကိုလည်း တွေ့မြင်နိုင်ပါတယ်။

၎။ တဖြည်းဖြည်း ပြောင်းလာနိုင်မလားလို့ ကြိုးစားခဲ့သူများ တဖြည်းဖြည်းခြင်း ဘေးရောက်သွားတာကို ရာစုနှစ် တ၀က်နီးပါး ရှိလာပြီဖြစ်တဲ့ ကျနော်တို့နိုင်ငံက အာဏာရှင်စနစ်အတွင်းမှာ တွေ့ခဲ့ရပေါင်း များလှပါပြီ။ အယူအဆ မတူသူကို လက်မခံ၊ အလိုတော်ကျ လုပ်မည့်သူများကိုသာ နေရာပေး၊ အရာရာကို သံသယနဲ့ ကြည့်ကြတဲ့ အာဏာရှင်တွေရဲ့ အနားမှာ ပြုပြင်ပြောင်းလဲလိုသူများဟာ ကြာကြာနေလို့ မရနိုင်ပါဘူး။ ကြာကြာ နေသွားတဲ့ သူတွေကလည်း အစကသာ ပြုပြင်ရေးစကား ပြောပြီး နောက်ပိုင်းမှာ အာဏာရှင်ရဲ့ လက်ဝေခံများ အဖြစ် ပြောင်းလဲ သွားကြပါတယ်။ တော်လှန်ရေး အသွင်နဲ့ ပြုပြင်ပြောင်းလဲဖို့ ကြိုးစားခဲ့တာတွေကို ကြည့်ရင် လူထုအားနဲ့ ပြောင်းလဲဖို့ ကြိုးစားခဲ့မှုတွေနဲ့အတူ လက်နက်ကိုင် တော်လှန်ရေး နည်းလမ်းများနဲ့ ကြိုးစားမှုတွေကို ကျနော်တို့ နိုင်ငံမှာ အထင်အရှား မြင်တွေ့ခဲ့ရ ပြီးပါပြီ။ ဒါပေမယ့် အာဏာရှင်စနစ်က ခိုင်မြဲလျက် ဖြစ်ပါတယ်။ အာဏာရှင်စနစ် တိုက်ဖျက်ရေး ကြိုးပမ်းမှု နည်းလမ်းများ အနက် လူထု အင်အားကို အသုံးပြုလို့ လူထုတော်လှန်ရေး အသွင်နဲ့ အာဏာရှင်စနစ် တိုက်ဖျက်ရေး လုပ်ငန်းများကို ဦးစားပေး လေ့လာသုံးသပ်သွားပါမယ်။

လူထုအားနဲ့ တော်လှန်ခြင်း

၅။ အာဏာရှင်စနစ်ကို လူထုအားနဲ့ တော်လှန်ဖို့ ကြိုးစားကြရာမှာ အဆင့်(၃)ဆင့်ကို အောင်မြင် ပြီးမြောက်ဖို့ လိုအပ်တယ်လို့ ဆိုကြပါတယ်။ ပထမအဆင့် ကတော့ နိုင်ငံအတွင်း တစ်နေရာရာမှာ လူတန်းစားတစ်ခုက အစပြုတဲ့ ဆန္ဒပြုတောင်းဆိုမှု စတင် ဖြစ်ပွားခြင်းပါ။ ဥပမာ ကျောင်းသားတစ်စု၊ သံဃာတစ်စု၊ အလုပ်သမားတစ်စု စသဖြင့်ပေါ့။

လူထုတော်လှန်ရေးရဲ့ ပထမအဆင့်သည် ရုတ်တရက်ပေါ်လာတဲ့ အခြေအနေတစ်ခု Trigger တစ်ခု အပေါ် အခြေခံကာ စတင်ဖြစ်ပွားလေ့ ရှိပါတယ်။ အဲဒီအဆင့်မှာ အာဏာရှင်က နည်းမျိုးစုံသုံးပြီး နှိမ်နင်းပါတယ်။ သူ့ရဲ့ အယုံကြည်ဆုံး တပ်ဖွဲ့တွေကိုထုတ်သုံးပြီး နှိမ်နင်းကြပါတယ်။ မနှိမ်နင်း နိုင်လို့ ဖြစ်စေ၊ အဲဒီ အင်အားသုံး နှိမ်နင်းမှုပေါ် လူထုက အမျက်ဒေါသ ထွက်လာလို့ဖြစ်စေ၊ လူထုအတွင်း စည်းရုံး စုစည်းထားမှု အားကောင်း နေလို့ဖြစ်စေ လူတန်းစားအစုံ ထပ်မံပါဝင်လာပြီး နိုင်ငံတစ်ဝှမ်း လူထုအင်အားနဲ့ ဆန္ဒပြ တောင်းဆိုမှုတွေ ပျံ့နှံ့ လာတဲ့အဆင့်ကို ဒုတိယအဆင့် လို့ သတ်မှတ်ပါတယ်။

ဒီအဆင့်ရောက်ရင် အာဏာရှင်များက တစ်နိုင်ငံလုံးမှာ ဖြစ်နေတဲ့ ဆန္ဒပြ တောင်းဆိုမှုများ အတွက် သူ့ရဲ့ စစ်တပ်၊ ရဲတပ်ဖွဲ့ စတာတွေကို တစ်နိုင်ငံလုံး ဖြန့်ထုတ် လိုက်ရ ပါတယ်။ အဲဒီဖြန့်ထုတ်လိုက်တဲ့ သူ့တပ်ဖွဲ့တွေ၊ အစိတ်အပိုင်းတွေထဲက အချို့က လူထုနဲ့ ပူးပေါင်းပြီး အာဏာရှင်ကို အာခံလိုက်ကြတယ်၊ တဖန် အဲဒီ တပ်ဖွဲ့တွေနဲ့ အခြားတပ်ဖွဲ့တွေ အနှေးနဲ့ အမြန် ပူးပေါင်းမိလာကြပြီးတော့ လူထုနဲ့ စစ်တပ်ကပါ အာဏာရှင်ကို တော်လှန်လိုက်ကြတဲ့ အဆင့်ကို တတိယအဆင့် လို့သတ်မှတ်ကြပါတယ်။ အဲဒီ တတိယအဆင့်ကို အောင်မြင်စွာ ဆင်နွဲနိုင်မှသာ အာဏာလွဲပြောင်းမှုကို မြင်တွေ့ ရပြီး လူထုအားနဲ့ အာဏာရှင် စနစ်ကို ဖြုတ်ချတဲ့ လူထုတော်လှန်ရေးတစ်ရပ် အောင်ပွဲခံလိမ့်မယ်လို့ ဆိုပါတယ်။

၆။ အာဏာရှင်စနစ်ကို ပြိုလဲသွားအောင် လူထုအားနဲ့ တိုက်ဖျက် အနိုင်ယူနိုင်ခဲ့ကြတဲ့ နိုင်ငံများနဲ့ သူတို့ရဲ့ လူထုတော်လှန်ရေး ဖြစ်စဉ်များကို ကြည့်ရင် အထက်ပါ အဆင့် (၃)ဆင့်ကို ကျော်ဖြတ်နိုင်ခဲ့ကြတယ်လို့ ဆိုကြပါ တယ်။ ရုရှဇာဘုရင်ဖြုတ်ချခြင်း (၁၉၁၇)၊ အီရန်ရှားဘုရင်ကိုဖြုတ်ချခြင်း (၁၉၇၉)၊ ဖိလစ်ပိုင်အာဏာရှင် မားကိုစ် ဖြုတ်ချခြင်း (၁၉၈၆)၊ ရိုးမေးနီးယား အာဏာရှင် ချောင်ဆစ်စကူးကို ဖြုတ်ချခြင်း (၁၉၈၉)၊ စတဲ့ လူထု တော်လှန်ရေး များက အထက်ကပြောတဲ့ အဆင့် (၃)ဆင့်ကို ဖြတ်ကျော်နိုင်ခဲ့လို့ အာဏာရှင်တွေ ပြုတ်ကျပြီး လူထုအောင်ပွဲရခဲ့တဲ့ သမိုင်းဝင် ဥပမာများ ဖြစ်ပါတယ်။

၈၈၈၈ လူထုတော်လှန်ရေး

၇။ ၁၉၈၈ခုနှစ် အရေးအခင်းကို ကြည့်ရင် ပထမအဆင့်ကို ကျောင်းသားများ ဦးဆောင်မှုဖြင့် စတင်နိုင်ခဲ့ပါတယ်။ အဲဒီ လူထုတော်လှန်ရေးရဲ့ ပထမအဆင့် ဖြစ်ပွားလာခဲ့ရတဲ့ အချက်များ Triggers များကို ကြည့်ရင် ရန်ကုန် စက်မှုတက္ကသိုလ် ကျောင်းသား ကိုဖုန်းမော် ပစ်ခတ် သတ်ဖြတ်ခံရခြင်း၊ တံတားဖြူမှာ ဆန္ဒပြ ကျောင်းသား ကျောင်းသူများကို ရက်ရက်စက်စက် သတ်ဖြတ် နှိမ်နုင်းခဲ့ခြင်းများ ဖြစ်ခဲ့ပြီး ကျောင်းသား၊ ကျောင်းသူတွေရဲ့ အာဏာရှင် ဆန့်ကျင်ရေး တိုက်ပွဲဟာ တစ်စတစ်စ အရှိန် ကောင်းလာခဲ့တယ်။ တနည်းအားဖြင့် လူထု တော်လှန်ရေးရဲ့ ပထမအဆင့် အောင်မြင်စွာ ပေါ်ပေါက် လာခဲ့ပြီး ဒုတိယ အဆင့်ကို ရောက်အောင် တွန်းတင် ပေးလိုက်ပါတယ်။

၈။ ၁၉၈၈ခုနှစ်၊ သြဂုတ်လမှာတော့ နိုင်ငံတစ်ဝှန်းလုံးက လူတန်းစားအစုံ ပါဝင်လာခဲ့၊ ဆန္ဒပြခဲ့ကြပြီး စက်တင်ဘာလ အတွင်းမှာတော့ အစိုးရယန္တယားကို ရပ်ဆိုင်းသွားစေခဲ့တဲ့အထိ ဒုတိယအဆင့်ကို အောင်မြင်စွာ ရောက်ခဲ့ကြပါတယ်။ ပြည်သူ့ရဲနဲ့၊ တပ်မတော်သားအချို့လည်း ဆန္ဒပြမှုမှာ ပါဝင်လာခဲ့ကြပါပြီ။ အဲဒီလို တတိယအဆင့်အတွက် အစပျိုးနေချိန်မှာ အာဏာရှင်ဗိုလ်နေ၀င်းရဲ့ တဖက်လှည့် အာဏာသိမ်းခိုင်းမှုကို ကြုံတွေ့ခဲ့ရပြီး တတိယအဆင့်ကို မရောက်နိုင်ခဲ့ပါ။

တတိယအဆင့်ကို ပီပီပြင်ပြင် ရောက်မသွားအောင် ဗိုလ်နေ၀င်းနဲ့ အပေါင်းအပါတစ်စုတို့ လုပ်ခဲ့တဲ့နည်းက ခေါင်းဖြတ်မှု၊ စက်ရုံ အလုပ်ရုံ ဖေါက်ထွင်းမှု၊ ထောင်ဖေါက်မှုများ လုပ်လိုက်ပြီး တပ်မတော်ရဲ့ အမြင်မှာ လူထုရဲ့ ငြိမ်းချမ်းစွာ ဆန္ဒပြခြင်းများနဲ့ တိုင်းပြည် ပြုပြင်ပြောင်းလဲရေး တောင်းဆိုမှုကို အကြမ်းဖက် ဆူပူမှုအဖြစ် အသွင်ပြောင်းပေးကာ တပ်ကို တွေဝေ သွားအောင်၊ လူထုနဲ့ ပူးပေါင်းမှု ဖြစ်မသွားအောင် ဟန့်တား လိုက်ပါတယ်။ တဖက်ကလည်း တိုင်းပြည် ငြိမ်သက်အောင် လုပ်ပေးဖို့ လိုနေပြီ၊ ဒီ့အတွက် တပ်မတော်က အာဏာ ရယူပြီး နိုင်ငံကို ထိန်းသိမ်းမှ ဖြစ်တော့မယ် ဆိုတဲ့ စကားနဲ့ စည်းရုံးလိုက်ပြီး အဆုံးသတ် ရလဒ်အနေနဲ့ န၀တ အာဏာသိမ်းမှုကို တပ်ရင်းတပ်ဖွဲ့များက လက်ခံအောင် လုပ်ယူလိုက်တာ ဖြစ်ပါ တယ်။

၉။ အာဏာသိမ်းပြီးတဲ့နောက်မှာ တပ်မတော်နဲ့ လူထု ပိုဝေးသွားအောင် စကားနှစ်ခု ထဲ့လိုက်ပါတယ်။ “တပ်မတော် ဖြိုခွဲသူ တို့ရန်သူ” နဲ့ “တပ်မတော်သာ အမိ၊ တပ်မတော်သာ အဖ” ဆိုတဲ့ စကားလုံးတွေပါ။ လူထုရဲ့ ဆန္ဒနဲ့ သဘောထားတွေ တပ်မတော်ကို အသိပေးဖို့ ကြိုးစားသူကို တပ်မတော် ဖြိုခွဲသူလို့ စွပ်စွဲဖို့ စီစဉ်လိုက် ခြင်းပါ။ တဖက်ကလည်း အာဏာရှင်ရဲ့ တပ်တွင်းစည်းရုံးရေးများ တွင်တွင်လုပ်ပြီး တိုင်းပြည် ပြုပြင် ပြောင်းလဲရေး အတွက် လူထုရဲ့ ကြိုးပမ်းအားထုတ်မှုများကို အကြမ်းဖက်ဖြစ်စဉ်၊ တိုင်းပြည် ပြိုကွဲစေမယ့် လုပ်ရပ်များအဖြစ် ၀ါဒဖြန့်လိုက်ပါတယ်။ ပြင်ပကသတင်း တပ်အတွင်းကို မစီးဆင်းနိုင်အောင်လည်း ထောင့်စုံကနေ ပိတ်ကြပါတယ်။ နောက်နောင် လူထု တော်လှန်ရေးများ ဖြစ်ပွားလာခဲ့ရင် အဆင့်(၃)ကို ရောက်မလာနိုင်အောင် ကာကွယ်ထားခြင်း ဖြစ်ပါတယ်။ တနည်းအားဖြင့် လူထု တော်လှန်ရေးများရဲ့ အောင်ပွဲခံနိုင်မယ့် အဆင့်ကို ကြိုတင်တားဆီးထားခြင်းပါ

၁၀။ ၁၉၈၈အလွန် လူထုဆန္ဒပြမှုတွေကို လေ့လာကြည့်ရင် အများစုဟာ ပထမအဆင့်မှာဘဲ အာဏာရှင်ရဲ့ ရက်ရက် စက်စက် ဖြိုခွင်းတာ ခံခဲ့ကြရပါတယ်။ ဒုတိယ အဆင့်ကို အတိုင်းအတာ တစ်ခုအတိ ရောက်လာတယ်လို့ ပြောလို့ ရတာ ၂၀၀၇ခုနှစ် ရွှေဝါရောင် အရေးအခင်း ဖြစ်ပါတယ်။ သံဃာများ၊ ကျောင်းသား/သူများနဲ့ ဒေသခံ လူထု အချို့ ပါဝင်ခဲ့ကြပြီး မြို့ကြီး အတော်များများမှာ ဖြစ်ပွား ခဲ့ပါတယ်။ ဒါပေမယ့် တတိယအဆင့် မရောက်လိုက်ခင်မှာ ချေမှုန်းခံလိုက် ရပါတယ်။

ရလိုက်တဲ့ သင်ခန်းစာက လူထုအင်အားကို အခြေခံပြီး အာဏာရှင်စနစ်ကို တိုက်ဖျက်ဖို့ စီစဉ်ကြမယ်ဆိုရင် ပထမအဆင့်ဖြစ်တဲ့ လူတန်းစားတစ်ခုက နိုင်ငံတစ်နေရာမှာ အာဏာရှင်ကို ကန့်ကွက်ဆန့်ကျင် ဆန္ဒပြမှုများ ဖြစ်ပွားခြင်း၊ ဒုတိယအဆင့်အဖြစ် နိုင်ငံတစ်ဝှမ်းက လူထုကြီး ပါဝင်လာစေခြင်း၊ တတိယအဆင့် လူထုနဲ့ တပ်မတော် ပူးပေါင်းစေခြင်း၊ စတဲ့ အဆင့်(၃)ဆင့်အတွက် နည်းလမ်းများကို ရှာဖွေဖို့၊ ပြင်ဆင်ဖို့၊ အကောင်အထည် ဖေါ်ဖို့နဲ့ အဲဒီ အဆင့် (၃)ဆင့်ကို ဟန်ချက်ညီညီ ချိတ်ဆက် ပေးမယ့် Game Plan တစ်ခု ရှိနေဖို့ပါ တနည်းအားဖြင့် လူထုနဲ့ တပ်မတော် ပါလာနိုင်ချေ မရှိသေးပါက အဆင့်(၁)များမှာပင် ရပ်တန့်နေပြီး တော်လှန်ရေး မျိုးဆက်ပြုံးသွား နိုင်ချေနဲ့ ရင်ဆိုင်ရ နိုင်ပါတယ်။

ယနေ့ကာလ နိုင်ငံတစ်ဝှမ်းက လူထုကြီးပါဝင်စေဖို့

၁၁။ လူထုပါဖို့ဆိုရင် လူထုကဏ္ဍရဲ့ ယနေ့အခြေအနေကို လေ့လာ သုံးသပ်ကြရအောင်။ နအဖက လူထုကို အကြောက် တရား အောက်မှာ့ နေထိုင်ခိုင်းထားတာကို မြင်တွေ့နေရတော့ ရုရှ သိပ္ပံပညာရှင် ပါဗ်လော့ရဲ့ Condition Reflex ခေါ်တဲ့ ဇီဝကမ္မဆိုင်ရာ လေ့လာတွေ့ရှိချက်တစ်ခုကို ပြန်လည် သတိရမိ ပါတယ်။ သတ္တ၀ါတွေမှာ အမြင်၊ အကြား၊ အထိအတွေ့၊ အနံ့၊ အရသာဆိုတဲ့ အာရုံငါးပါးမှတဆင့် လှုံဆော်မှု (Stimulus) တွေ အဖန်တလဲလဲ ရခဲ့ရင် အဲဒီ ထိတွေ့ယဉ်ပါးလိုက်ရတဲ့ အခြေအနေ တစ်ခုအပေါ် အသိမဲ့တုန့်ပြန်မှုတွေ ပေါ်ပေါက်လာတဲ့ အကြောင်းကို လေ့လာ ဖေါ်ထုတ်ခဲ့တာပါ။

ယခုစာဖတ်သူအနေနဲ့ စိမ်းစားသရက်သီးကို ဆား၊ ငရုပ်မှုန့်များနဲ့ တို့စားဖို့ စိတ်ကူး ကြည့်စမ်းပါ။ စားလည်း စားခဲ့ဖူးတဲ့၊ စိမ်းစားသရက်သီးကို ကြိုက်လဲကြိုက်တဲ့သူဆိုရင် ပါးစပ်ထဲမှာ တံတွေးတွေ အလိုလို ထွက်လာပါလိမ့်မယ်။ ဒါဟာ စိမ်းစားသရက်သီးကို ဆားနဲ့ တို့စားခြင်း ဆိုတဲ့ အခြေအနေ (Condition) ကို စာဖတ်သူရဲ့ ခန္ဓာကိုယ်က မှတ်သားထားပြီးတော့ လိုအပ်တဲ့ တုန့်ပြန်မှုကို ခန္ဓာကိုယ်က အလိုအလျောက် ဆောင်ရွက်ပေးခြင်းပါ။ တနည်းအားဖြင့် စိမ်းစားသရက်သီးအတွက် အသိမဲ့ တုန်ပြန်မှု Conditional Reflex ခန္ဓာကိုယ်မှာ ရှိနေပြီလို့ ပြောလို့ရပါတယ်။

၁၂။ နိုင်ငံရေး နိုးကြားသူများ၊ ဒီမိုကရေစီအတွက် တိုက်ပွဲဝင်သူများ၊ အတိုက်အခံပါတီဝင်များကို ရိုက်နှက်၊ သတ်ဖြတ်၊ နှစ်ရှည် ထောင်ဒဏ်ပေးနေခြင်း၊ သူတို့ရဲ့ ပိုင်ဆိုင်မှုတွေ၊ စီးပွားရေးလုပ်ငန်းတွေ ပိတ်ပင် ဖျက်ဆီးခြင်း၊ စတဲ့ အခြေအနေတွေကို အမြင်၊ အကြား အာရုံများကတဆင့် လူထုအမှတ်သညာထဲကို အကြိမ်ပေါင်း များစွာ ရိုက်ထဲ့ ထားပါတယ်။ အဲဒီ အခြေအနေများ အတွက် လူထုအတွင်းမှာ ပေါ်လာခဲ့တဲ့ အသိမဲ့တုန့်ပြန်မှုတွေက နိုင်ငံရေး၊ ဒီမိုကရေစီ အရေးတွေမှာ ကိုယ်တိုင် ပါဝင်ဖို့ စိုးရိမ် ကြောက်ရွံ့တဲ့ စိတ်များ ပေါ်ပေါက်လာခြင်းပါ။

ဒီအတွက်ကြောင့် တုတ်တွေ၊ ဒိုင်းတွေ ကိုင်ဆောင်ထားတဲ့ လုံထိန်းများက လူထုမြင်ကွင်းမှာ လေ့ကျင့်ခန်းများ လုပ်ပြလိုက်ရင်၊ လုံထိန်း တွေ၊ စစ်သားတွေ အပြည့်နဲ့ ကားတန်းကြီး မြို့တစ်ပတ်လောက် မောင်းပြလိုက်ရင်ပဲ လူထုအတွင်းမှာ အကြောက် တရားများ အသိမဲ့စွာ ပေါ်ပေါက်လာကြရတာ ယနေ့ နအဖက လူထုအပေါ် ဖန်တီးထားတဲ့ နိုင်ငံရေး နိုးကြားမှု အခြေအနေအပေါ် အကြောက်တရား များ ဖြစ်ထွန်းစေတဲ့ Conditional Reflex အခြေအနေ မှန်ပါ။ အဲဒီ အခြေအနေ ကို ဖန်တီးရခြင်းရဲ့ ရည်ရွယ်ချက်က လူထုတော်လှန်ရေးရဲ့ အဆင့်(၂)ကို ရောက်မလာအောင် ကာကွယ် ဟန့်တား ထားတာ ဖြစ်ပါတယ်။

၁၃။ ဒါပေမယ့် နအဖရဲ့ အဲဒီ အကြောက်တရား လှုံဆော်မှုတွေက လူထုအတွင်းမှာ မုန်းတီး နာကျည်းခြင်းများနဲ့ အမျက် ဒေါသတွေကို ယှဉ်တွဲ ဖြစ်ထွန်း စေပါတယ်။ ဒီ့အတွက်ကြောင့် လူထုအားကို အခြေခံတဲ့ လူထု တော်လှန်ရေး တစ်ခု ဖြစ်ပေါ်လာဖို့ ယနေ့အချိန်မှာ မလွယ်ဘူးလို့ ဆိုနိုင်ပေမယ့် လူထုရဲ့ အာဏာရှင်တွေအပေါ် ထားရှိတဲ့ အမျက်ဒေါသနဲ့ အမုန်းတရားတွေက ကြောက်ရွံ့ခြင်းကို ကျော်လွန်သွားပြီးဆိုရင် ဒေသစုံမှာ လူတန်စား ပေါင်းစုံ ပါဝင်တဲ့ လူထုတော်လှန်ရေး အဆင့်(၂) လှုပ်ရှားမှုတွေ ပေါ်ပေါက်လာပါလိမ့်မယ်။ သာဓက တစ်ခုအဖြစ် ၂၀၀၇ခုနှစ် ရွှေဝါရောင် တော်လှန်ရေးကာလ အခြေအနေကို ပြန်မြင်ယောင် ကြည့်ရင် ရဟန်းသံဃာတွေနဲ့ အစပြုပြီး တစတစနဲ့ ကျောင်းသားတွေများလာ၊ နောက်ပိုင်း သောင်းသိန်းချီတဲ့ လူထုပါဝင်လာတာ မှတ်မိကြမှာပါ။

၁၄။ လူထုရဲ့ ထိရောက်စွာ ပူးပေါင်းပါဝင်လာစေဖို့ ဆောင်ရွက်ကြရမည့် အလုပ်တစ်ခုက ကြောက်ရွံ့ခြင်းကို လျော့နည်းသွားစေဖို့ ဆောင်ရွက်ခြင်းပါ။

တနည်းအားဖြင့် အသိမဲ့ တုန့်ပြန်မှုတွေ ရှိနေတဲ့ အခြေအနေတစ်ခုနဲ့ တဖြည်းဖြည်းခြင်း ထိတွေ့ပေးခြင်း၊ Desensitization လုပ်ပေးခြင်းပါ။ ယနေ့ NLD ပါတီဝင်များ လုပ်နေကြတဲ့ ဒေါ်အောင်ဆန်းစုကြည် ဓါတ်ပုံဖြန့်ဝေခြင်းဟာ ကြောက်ရွံ့ခြင်းကို လျော့ပါးစေဖို့ ဆောင်ရွက်နေတဲ့ အလွန် ဉာဏ်သွားတဲ့ Desensitization လုပ်ငန်းတစ်ခု လို့ ပြောပါရစေ။ စစ်အစိုးရ ရဲ့ ပုံနိုပ်ထုတ်ဝေရေးဆိုင်ရာ ဥပဒေ၊ စည်းမျဉ်း၊ စည်းကမ်းများနဲ့ ဘောင်ခတ်ထားမှုကိုလည်း ကျော်လွှားသွားနိုင်ခဲ့ ပါတယ်။

နိုင်ငံရေးနဲ့ ပတ်သက်သော စာရွက်စာတမ်းများ ကူးမပေးပါလို့ စာကပ်ထားပြီး စိုးရိမ်စွာနဲ့ အလုပ်လုပ်နေ ကြရတဲ့ လုပ်ငန်းရှင်များကို အကူအညီ တောင်းရခြင်းမှလည်း လွတ်ကင်းပြီး အောင်မြင်စွာ လုပ်သွားကြတဲ့ အလုပ်တစ်ခုမို့ ဓါတ်ပုံဖြန့်ချီရေး အတွေးပေါ်သူ များနဲ့ ဆောင်ရွက်နေသူများ အားလုံးကို လေးစား ချီးကျူးရပါတယ်။

၁၅။ ဓါတ်ပုံဖြန့်တဲ့ နည်းလမ်းအပြင် အခြားသော Desensitization နည်းလမ်း များကိုလည်း ဉာဏ်ကွန့်ကာ ထပ်မံ ဆောင်ရွက်ကြဖို့ လိုပါတယ်။ Desensitization ကို ဘယ်လောက် အတိုင်း အတာ အထိ လုပ်ရမှာလည်း လို့မေးရင် ဒေါ်အောင်ဆန်းစုကြည် ပြောခဲ့သလို မတရားတဲ့ အမိန့်အာဏာတွေကို တာဝန်အရ ဖီဆန်ကြမယ်ဆိုတဲ့ စိတ်ဓါတ်တွေ လူထုအတွင်းမှာ ကိန်းအောင်လာအောင် ဆောင်ရွက်နိုင်ပြီဆိုရင် လူထု တော်လှန်ရေး အဆင့်(၁)ကနေ အဆင့် (၂)ကို ကူးပြောင်းသွားနိုင်ဖို့ အဆင့်သင့်ဖြစ်နေတဲ့ လူထုကြီး ရှိနေပြီလို့ ပြောလို့ရပါတယ်။ ၁၉၈၈ခုနှစ် အရေးအခင်းအပြီး ကျောင်းတွေပြန်ဖွင့်တော့ ဗိုလ်ချုပ်ပုံရင်ထိုးလေးတွင် အင်္ကျီ၊ လွယ်အိတ်များမှာ တပ်ဆင်၊ ပင်နီတိုက်ပုံနဲ့ ကချင်ပုဆိုးဝတ်ဆင်ကာ တော်လှန်ချင်တဲ့ ခွန်အားကို တဖြည်းဖြည်းခြင်း ပြန်မွေးယူခဲ့ရတာ အမှတ်ရ နေပါသေးတယ်။ မိမိရဲ့ စိုးရိမ်စိတ်ကို ထိန်းချုပ်လာနိုင်တဲ့အပြင် မြင်ရသူတွေအတွက်လည်း တော်လှန်ရေးသတ္တိတွေ ပေါ်ပေါက်လာစေခဲ့ပါတယ်။

၁၆။ အဆင့်(၁)က အဆင့်(၂)ကို ကူးပြောင်းမှုသည် အချိန်တစ်ခု အမြဲလိုပါတယ်။ ဒါပေမယ့် အချိန်တိုလေ လူထု အထိအခိုက် နည်းလေ ဖြစ်တာမို့ အချိန်တိုတိုနဲ့ အဆင့်(၂)ကို ကူးပြောင်းနိုင်ဖို့လည်း စဉ်းစား စီစဉ်ဖို့ လိုပါလိမ့်မယ်။ အဲဒီအချိန်ကို လေ့လာတဲ့အခါ ၁၉၈၈ခုနှစ် လူထုတော်လှန်ရေး အဆင့်(၁)ရဲ့ အဓိက Trigger ဖြစ်တဲ့ ကိုဖုန်းမော် သတ်ဖြတ် ခံရတဲ့ မတ်လမှ လူထုတိုက်ပွဲ အဆင့်(၂)ရဲ့ အရှိန်အမြင့်ဆုံးကာလ စက်တင်ဘာလအထိ (၇)လ ကြာမြင့် ပါတယ်။

၁၇။ ရွှေဝါရောင်အရေးအခင်းကို လေ့လာရင် အဆင့်(၁)ရဲ့ ပထမ Trigger က သြဂုတ်လ (၁၅) လောင်စာဆီဈေး မြင့်တင်လိုက်ခြင်းပါ၊ ဒုတိယ Trigger က စက်တင်ဘာ (၅)ရက် ပခုက္ကူ အရေးအခင်း ဖြစ်ပြီး အဆင့်(၁)ရဲ့ အရှိန်အမြင့်ဆုံးရောက်သွားတာက စက်တင်ဘာ (၂၂) ရက်၊ ရန်ကုန်မှာ သံဃာ ၂၀၀၀ခန့်နဲ့ မန္တလေးမှာ ၁၀၀၀၀ခန့် ဆန္ဒပြမှုများဖြစ်ပါတယ်။ ဒီနောက် (၂၄)ရက်နေ့မှာ အဆင့်(၂) အရှိန်ရလာခဲ့ပါပြီ၊ ရန်ကုန် ဆန္ဒပြပွဲမှာ သံဃာနဲ့ လူထု စုစုပေါင်း တစ်သိန်းလောက်ရှိလာခဲ့ပါတယ်။ (၂၆)ရက်နေ့မှာ ပစ်ခတ်နိုမ်နင်းမှုတွေ နအဖ စတင်ပြုလုပ်ခဲ့ပြီး (၂၇)ရက်နေ့မှာ ဘုန်းကြီးကျောင်းတိုက်များကို ၀င်စီးပြီး သံဃာများကို ဖမ်းဆီးခဲ့ကြခြင်းနဲ့ အဆင့်(၂)မှာပင် အဖြိုခွဲ ခံလိုက်ရပါတယ်။ ရွှေဝါရောင်လူထုတိုက်ပွဲရဲ့ အဆင့်(၁) Trigger ပေါ်ပေါက်ချိန်မှ အဆင့်(၂) အရှိန် တက်လာချိန်ဟာ အချိန်အားဖြင့် တစ်လခွဲကျော် ကြာပါတယ်။

၁၈။ ဒီအချက်က ဘာကို ပြနေသလဲဆိုရင် လူထုအတွင်းမှာ အာဏာရှင်စနစ်ကို ရွံ့ရှာမုန်းတီးခြင်းက ၁၉၈၈ခုနှစ် ထက် များစွားပိုနေတယ်ဆိုတာ ပြနေပါတယ်။

ဒုတိယက သံဃာတော်များရဲ့ ငြိမ်းချမ်းစွာနဲ့ မေတ္တာပို့၊ ပရိတ်တော်များ ရွတ်ဆိုပြီး အစိုးရတစ်ရပ်အနေနဲ့ လူထုအပေါ် ဆောင်ရွက်ပေးသင့်တဲ့ အချက်များကို တောင်းဆို ဆန္ဒပြခဲ့ကြခြင်းကလည်း လူထုရဲ့ ပူးပေါင်းပါဝင်မှုကို အချိန်တိုအတွင်း ရရှိစေခဲ့တဲ့ အချက်တစ်ခု ဖြစ်ပါတယ်။

အဲဒီ အချက်များအပြင် ဘာသာရေး ခေါင်းဆောင်များ လူထုတော်လှန်ရေးမှာ ပါဝင်လာခြင်းက အောင်ပွဲကို ပိုမိုနီးကပ်လာ စေပါတယ်။

လူထု လူတန်းစားအားလုံးရဲ့ ဆုံချက်တစ်ခုက ဘာသာရေးဖြစ်တာကြောင့် လူထုကြည်ညိုလေးစား တန်ဖိုးထား ကိုးကွယ်ကြရတဲ့ ဘာသာရေးခေါင်းဆောင်ရဲ့ သဘောထားမှတ်ချက်တစ်ခုဟာ သူကို အကြွင်းမဲ့ ယုံကြည် ကိုးကွယ်သူများကို ကောင်းစွာ လွှမ်းမိုးနိုင်တာကြောင့် လူထုတော်လှန်ရေးတွေမှာ ဘာသာရေးခေါင်းဆောင်များရဲ့ ပူးပေါင်းပါဝင်မှုဟာ အလွန်အရေးကြီးတဲ့နေရာမှာ ရှိပါတယ်။

လူထုတော်လှန်ရေး အောင်ပွဲခံခဲ့တဲ့ ဖြစ်စဉ်များကို ကြည့်ရင် ဘာသာရေးခေါင်းဆောင်များက အဆုံးအဖြတ်ပေးတဲ့ အခန်းကဏ္ဍက ပါဝင်ခဲ့ကြတာ အမြဲတွေ့ရပါတယ်။

လူထုတော်လှန်ရေး အဆင့် (၃) တပ်မတော်ပါဝင်ခြင်း

၁၉။ လူထုတော်လှန်ရေးရဲ့ အာဏာရှင်စနစ်အပေါ် အဆုံးသတ်အောင်ပွဲဟာ တပ်မတော်က ပူးပေါင်းပါဝင်မှ ဖြစ်မှာမို့လို့ အရေးအကြီးဆုံးနဲ့ ယနေ့ လူထုတော်လှန်ရေးမှာ ဖြည့်စွက်ရမယ့် ဟာကွက်တစ်ခုလို့ ဆိုခြင်ပါတယ်။ အစဉ်အဆက်လည်း မအောင်မြင်သေးတဲ့ အဆင့်မို့ အခက်ခဲဆုံး အဆင့်လို့ ဆိုရပါလိမ့်မယ်။ ဒီအတွက်ကြောင့် တပ်မတော်က ဘာကြောင့် မပါသေးတာလည်း၊ မပါနိုင်တာလည်း၊ လူထုတော်လှန်ရေးမှာ ပါဝင်နိုင်ဖို့ အဟန့် အတားတွေက ဘာတွေလည်း၊ ဒီအဟန့်အတားတွေကို ဘယ်လို ကျော်လွှားနိုင်သလဲ၊ စတဲ့ မေးခွန်းတွေအတွက် အဖြေရှာဖို့ လိုအပ်နေပါပြီ။

၂၀။ တကယ်တန်းတော့ လူထုကလည်း အကြောက်တရားနဲ့ နေထိုင်နေရကြသလို တပ်မတော်သားများလည်း အကြောက် တရားအောက်မှာ နေထိုင် နေကြရတာပါ။ အာဏာရှင်က သဘောမတွေ့ရင် အရပ်သားကို ပေးတဲ့ ပြစ်ဒဏ်ထက် ပိုကြီးတဲ့ ပြစ်ဒဏ်ကို တပ်မတော်သားကို ပေးပါတယ်။ ပိုဆိုးတာက တပ်မတော် ကို သတင်းလောကနဲ့ အဆက်ဖြတ်ပြီး အာဏာရှင်ရဲ့ တဖက်သတ် ၀ါဒဖြန့်မှုအောက်မှာ ထားရှိတာမို့ ပြင်ပ အခြေအနေကို အမှန်အတိုင်း သိခွင့် အလွန်နည်းပါတယ်။ ဒီအချက်များအပြင် ခွဲထွက်လိုတဲ့ တပ်မတော်သားများ အစိုးရိမ်ဆုံးက သူတို့ ခွဲထွက်လာတဲ့အချိန် အခြားတပ်တွေ ပါမလာဘဲ ထီးထီးဖြစ်ကာ ချေမှုန်းခံရမှာကို ဖြစ်ပါလိမ့်မယ်။ မိသားစုတွေပါ တနွယ်ငင် တစင်ပါ ဖြစ်ကြမှာမို့ သူတို့ရဲ့ အာဏာရှင်အပေါ် ကြောက်ရွံ့စိုးရိမ်စိတ်ဟာ အရပ်သားများ ထက် မပိုရင်တောင် မလျော့နိုင်ပါ။ ဒီအချက်တွေက လူထုတော်လှန်ရေးမှာ တပ်မတော်ပါဝင်လာစေဖို့ ပထမ အဟန့် အတားတွေပါ။

၂၁။ မြန်မာ့တပ်မတော်မှာ ဗိုလ်ချုပ်ကြီးရားမို့စ်လို လူတစ်ဦး ပေါ်ထွက်လာခဲ့ရင် ဒီအဟန့်အတား ပျောက်ကွယ် သွားပါလိမ့်မယ်။ အာဏာရှင်ရဲ့ လက်ဝေခံဘ၀နဲ့ ရနေတဲ့ စည်းစိမ်ဥစ္စာနဲ့ ရာထူးအာဏာကို ဘ၀ရဲ့ အောင်မြင်မှုလို့ ထင်မှတ်နေကြတဲ့ ဗိုလ်ချုပ်တွေ၊ တပ်မတော်အရာရှိကြီးတွေကို တကယ်စစ်မှန်တဲ့ ဘ၀အောင်မြင်မှုတွေအကြောင်း ဗိုလ်ချုပ်ကြီးရာမို့စ်နဲ့ ပမာနိုင်းပြီး ပြောပြသင့်ပါပြီ။ ဗိုလ်ချုပ်ကြီးရာမို့စ်ရဲ့ လူထုဘက်က ရပ်တည်ချက်က ယနေ့ ဖိလစ်ပိုင်နိုင်ငံကို ဒေသအတွင်းနဲ့ ကမ္ဘာအလယ်မှာ လူရာဝင်စေခဲ့သလို တိုင်းပြည်ကိုလည်း ဖွံ့ဖြိုးမှု လမ်းကြောင်း အမှန်ပေါ်ကို ရောက်စေခဲ့ပါပြီ၊ သူကိုယ်တိုင်လည်း ယနေ့အထိ နိုင်ငံ့အရေးအရာတွေကို ဆက်လက်ဦးဆောင်မှု ပေးလျက်ရှိသလို သူ့ရဲ့ ခေါင်းဆောင်မှုကိုလည်း ဖိလစ်ပိုင်နိုင်ငံရေးသမားတိုင်းက တန်ဖိုးထား လေးစား နေကြတာ၊ ဒီနေ့ ဗိုလ်ချုပ်ကြီး ရားမိုစ့်ဟာ ဖိလစ်ပိုင်နိုင်ငံရဲ့ အရေးအရာများသာမက အရှေ့တောင်အာရှအသင်းကြီးရဲ့ ပဲ့ကိုင် လမ်းညွန်သူ တစ်ဦး အဖြစ်ပါ ဆောင်ရွက်ပေးနေရတစ်ဦး ဖြစ်နေကြောင်းကို ဗိုလ်သန်းရွှေ လက်အောက်က စစ်ဗိုလ်ချုပ်တွေ သိဖို့ နည်းလမ်းပေါင်းစုံနဲ့ ပြောပြသင့်ပါပြီ။

၂၂။ ဗိုလ်နေ၀င်းရဲ့မျိုးဆက်တွေ ဘ၀ပျက်ချိန်၊ ဗိုလ်စောမောင် စိတ်ဝေဒနာခံစားခဲ့ရပြီး လူမသိ သူမသိ ဇာတ်သိမ်း ရချိန်၊ ဗိုလ်ခင်ညွန့်နဲ့ သူ့မိသားစု၊ သူ့နောက်လိုက်များ ကျူပင်ခုတ် ကျူငုက်မကျန် အရှင်းလင်း ခံကြရချိန်မှာ ဗိုလ်ချုပ်ကြီးရာမိုစ့်က သူ့ရဲ့ကောင်းမွေကို သူ့မိသားစု၊ သားစဉ်မြေးဆက် လက်ဆင့်ကမ်းပေး နိုင်ခဲ့ပါပြီ။ မြန်မာပြည် က စစ်ဗိုလ်ချုပ်တွေ၊ အရာရှိကြီးတွေ တကယ်အားကျသင့်တာက ဗိုလ်ချုပ်ကြီးရားမိုစ့်လို ဘ၀မျိုး ဖြစ်ကြောင်း သိစေသင့်ပါပြီ။ လူထုဖက်က ရပ်တည်တဲ့ ဗိုလ်ချုပ်ကြီးရာမိုစ့်အတွက် နိုင်ငံရေးအာဏာဟာ ဖွဲ့စည်းပုံ အခြေခံ ဥပဒေကို လိုသလိုရေးဆွဲပြီး အတင်းသိမ်းပိုက်ဖို့ မလိုပဲ သူ့လက်ဝယ်ကို လူထုက လိုလိုချင်ချင် အပ်နှင်းကြတာ ဖြစ်ပါတယ်။ တနည်းအားဖြင့် စစ်မှန်တဲ့ တပ်မတော်ခေါင်းဆောင်နဲ့ သူ့ရဲ့ လူထုအကြားက ယုံကြည်မှုကို ဖေါ်ပြပါ တယ်။

၂၃။ ဒုတိယ အဟန့်အတားက အာဏာရှင်ရဲ့ တပ်မတော်အပေါ် ဆောင်ရွက်နေတဲ့ တဖက်သတ် ၀ါဒဖြန့်ချီ စည်းရုံးမှု များကို ပြင်ပက တန်ပြန်ဆောင်ရွက်ဖို့ ခဲယဉ်းနေတာ၊ အားနည်းနေတာ၊ စတဲ့အချက်များ ဖြစ်ပါတယ်။ ဗိုလ်သန်းရွှေ ပြောကြားနေတဲ့ မိန့်ခွန်းများကို ကြည့်ရင် သူ့အာဏာတည်မြဲရေးအတွက် တပ်မတော်နဲ့ ဒီမိုကရေစီ လိုလားသူ လူထုအကြား နားလည်မှုတွေ လွဲမှားအောင် ရန်တိုက်ပေးနေတာ အထင်အရှားမို့ သူ့ရဲ့ ၀ါဒဖြန့်ချက် တစ်ခုခြင်းစီကို ကျနော်တို့ဖက်က စနစ်တကျ တန်ပြန် ချေဖျက်သင့်ပါတယ်။ တပ်မတော်သားတွေကို နားလည် သဘောပေါက်လာအောင် စည်းရုံးနိုင်မှ လူထု တော်လှန်ရေး အဆင့်(၃)ကို ရောက်လို့ အာဏာရှင်စနစ် နိဂုံးချုပ်နိုင် ပါလိမ့်မယ်။

၂၄။ ဗိုလ်သန်းရွှေလက်ထက် တပ်မတော်အင်အား ပိုမိုချဲ့ထွင်လာတာ၊ လက်နက်အသစ်တွေ ပိုမိုအသုံးပြုနိုင် လာခြင်းကို တပ်မတော်သားအချို့က သဘောကျကောင်း ကျနေနိုင်ပြီး ယခင် တပ်မတော်ခေါင်းဆောင်များထက် ပိုတော်သူ၊ နိုင်ငံသစ်ကို တည်ဆောက်နိုင်သူလို့ ထင်ကောင်း ထင်နေနိုင်ပါတယ်။

ဒီအချက်ကလည်း လူထု တော်လှန်ရေး မှာ တပ်မတော်ရဲ့ ပူးပေါင်းပါဝင်မှုရဖို့ အဟန့်အတားတစ်ခု ဖြစ်နေနိုင်ပါတယ်။ ဒီအတွက် ကျနော်တို့ နိုင်ငံ့စီးပွားရေး၊ ဖွံ့ဖြိုးတိုးတက်ရေး ရှု့ထောင့်များကနေ တိုင်းပြည်အတွက် အကောင်းဆုံးလုပ်သင့်တာတွေကို ချပြ သင့်ပါပြီ။

ဗိုလ်သန်းရွှေရဲ့ နိုင်ငံသယံဇာတများကို အသုံးထက် အဖြုန်းများနေတာကို ထိထိရောက်ရောက် ဖေါ်ထုတ်သင့်ပါပြီ။ တပ်မတော်ကို ခေတ်မီအောင် တည်ဆောက်ရာမှာ ၀မရှိပဲ ၀ိလုပ်ခဲ့တဲ့ တချိန်က ဆိုဗီယက် ပြည်ထောင်စုနဲ့ ယနေ့ မြောက်ကိုရီးယားတို့ အကြောင်း တပ်မတော် အသိုင်းအ၀န်းက သိအောင် ပြည့်ပြည့်စုံစုံ ဖေါ်ထုတ်ကြရအောင်ပါ။ နိုင်ငံရေး၊ စီးပွားရေး တည်ငြိမ်စွာ ဖွံ့ဖြိုးတိုးတက်နေတဲ့ နိုင်ငံတော်ကို တည်ဆောက်နိုင်မှသာ တကယ်ခေတ်မီတဲ့ တပ်မတော်တစ်ခုကို တည်ဆောက်နိုင်ပါလိမ့်မယ် ဆိုတဲ့အကြောင်း ဗိုလ်သန်းရွှေကို ယုံကြည် ဆည်းကပ်နေသူများကို ပြောပြ ကြရအောင်ပါ။

၂၅။ အထက်ပါ အချက်များအားလုံးကို ပြန်လည်စုစည်း သုံးသပ်ရရင် -

(က) လူထုအားကို အသုံးပြုပြီး အာဏာရှင်စနစ်ကို တော်လှန် ပြောင်းလဲကြမယ်ဆိုရင် အဆင့်(၃)ဆင့်ကို ကျော်ဖြတ်နိုင်မှသာ ဆုံးခန်းတိုင် အောင်မြင်ခြင်းကို ရောက်ပါမယ်။

(ခ) အာဏာရှင်စနစ်လက်အောက်မှာ လူထုတော်လှန်ရေး အဆင့်(၁)ဖြစ်ပေါ်လာစေမည့် အကြောင်း အချက် Trigger တွေ ဆက်လက် ပေါ်ပေါက်နေဦးမှာ ဖြစ်ပါတယ်။

(ဂ) ယနေ့လုပ်ကြရမည့် ပထမအလုပ်က လူထုကို အကြောက်တရားများ လျော့နည်းလာစေဖို့ လုပ်ငန်းများ ဖြစ်ပါတယ်။ ဒုတိယအလုပ်က တပ်မတော်ကို လူထုနဲ့ လက်တွဲနိုင်ဖို့ စနစ်တကျ စည်းရုံးကြဖို့ ဖြစ်ပါတယ်။

(ဃ) အဆင့်(၂)နဲ့ (၃)အတွက် အခြေခံကောင်းတွေ ရထားပြီလို့ ယူဆပြီဆိုရင် အာဏာရှင်ကို လူထုအားနဲ့ စိမ်ခေါ် တိုက်ပွဲဝင်လို့ ရပါပြီ။

၂၆။ တိုင်းပြည်ကို အာဏာရှင်တစ်ယောက်ရဲ့ လက်ဝယ်က ကယ်တင်နိုင်ဖို့အရေး နည်းလမ်းများစွာ ရှိတဲ့အနက် လူထုအားကို အသုံးပြုကာ တော်လှန်ရေး ဆင်နွဲဖို့အတွက် တွေးမိတဲ့ အတွေးတွေ ဖြစ်ပါတယ်။ ၁၉၈၈ခုနှစ်မှ ယနေ့တိုင် ဖြစ်ပေါ်ခဲ့တဲ့ လူထုတော်လှန်ရေး ဖြစ်ရပ်အသီးသီးကို ပြန်လည်သုံးသပ်ကာ လုပ်ဆောင်သင့်တာကို တွေးတောမိခြင်း ဖြစ်ပါတယ်။ အဲဒီ အတွေးများကို ယနေ့နိုင်ငံရေး အခင်းအကျင်းထဲ သွတ်သွင်းကာ ပြင်ပဖိအားများ၊ မြန်မာနိုင်ငံရေးလောကထဲက ဇာတ်ကောင်အသီးသီးရဲ့ လှုပ်ရှားမှုများကို အခြေခံပြီး မြန်မာ့ဒီမိုကရေစီအရေး အမြင်နဲ့ အတွေးများကို ဆက်လက်တင်ပြပါဦးမယ်။ အသံညီပြီး အလုပ်တူကြဖို့ အမြင်တူပြီး အတွေးညီကြရအောင်။

၂၀၀၉ခုနှစ်၊ ဇူလိုင်လ(၁)ရက်

ဗုဒ္ဓဟူးနေ့

No comments:

Post a Comment