အမှန်တရားဂျာနယ် အတွဲ ၁ အမှတ် ၁၀ ကို ထုတ်ဝေ
နိုင်ငံရေး အချိုးအကွေ့ အပြောင်းအလဲ များသော ၂၀၀၉ ခုနှစ်မှ သည် ၂၀၁၀ သို့ မကြာ မှီ ပြောင်းလဲပေတော့မည်။ ၂၀၁၀ သည်ကော မည်သည်တို့ကို ဆောင်ကျဉ်း လာမည်နည်း။
လမ်းကြောင်းနှစ်သွယ်ကိုတော့ ထင်ရှား ပီပြင်စွာမြင်နေရသည်။
ပထမလမ်းကြောင်းက နအဖ တို့ အလိုကျ စိတ်တိုင်းကျ ရေးဆွဲကာ မဲလိမ် အတည်ပြုထား သည့် ၂၀၀၈ စစ်ဗိုလ် တမတ်သား အခြေဥပဒေဖြင့် ရွေးကောက်ပွဲကို အဓမ္မ ကျင်းပကာ တိုင်းရင်းသားပြည်သူ တရပ်လုံးနှင့် ထိပ်တိုက်ရင်ဆိုင်မည့် အလုံးစုံ ပျက်စီးရေး လမ်းကြောင်းဖြစ်သည်။
ဒုတိယ လမ်းကြောင်းကတော့ ဒေါ်အောင်ဆန်းစုကြည်က တောင်းဆိုထားသည့် ဆွေးနွေး ညှိနိုင်း အဖြေရှာကြရေး လမ်းကြောင်းပင် ဖြစ်သည်။
နအဖ ကတော့ သူတို့ စိတ်တိုင်းကျ ဖြစ်သည့် ပထမလမ်းကြောင်းကို သာ ဆက်လျှောက် မည့် အရိပ်အယောင်နှင့် စကားများကို တွင်တွင် သုံးနေသော်လည်း တဖက် ကလဲ လိုက်လျှောမှု အချို့ကို ပြခဲ့သည်။ သို့ရာတွင် မီးစတဖက် ရေမှုတ်တဖက် လမ်းစဉ်ကို ဆက်လက် ကျင့်သုံးနေဆဲပင်။
မည်သို့ပင်ဆိုစေ ရှောင်လွဲမရသည့် အချက်က ၂၀၁၀ တွင် လမ်းကြောင်းတခု ကိုတော့ ရွေးရ ပေတော့မည်။ ထို့အတူ အတိုက်အခံများ ဘက်ကကော ထိုလမ်းကြောင်း နှစ်သွယ် အတွက် ဘာများ ပြင်ဆင် ဆောင်ရွက်ထားကြပြီလဲ ဆိုသည့် မေးခွန်းတခု လဲ ပေါ်ပေါက်လာခဲ့ ပြန်ပါသည်။
စစ်တုရင်ကစား သည့် အခါ အနက်ရုပ်ကိုင်သူသည် ခံစစ် ကစားရသူဖြစ်၍ အဖြူသမား တိုက်စစ် ဆင်သည့် အပေါ် အဆက်မပြတ် ကာကွယ်ရင်း အကောင်းဆုံး ပြန်လည် တိုက်စစ် ဆင်နိုင်သည့် အကွက် သို့ တဖက်သား၏ မှားကွက်ကို ရှာဖွေကာ ကစားပွဲ ချိန်ခွင်လျှာ ကို ပြောင်းလဲရပါသည်။
နအဖ ရွှေ့ကွက်နောက်ကိုသာ တောက်လျှောက် လိုက်နေခဲ့ကြရသည့် အတိုက်အခံများ ကကော တိုက်ပွဲချိန်ခွင်လျှာကို ပြောင်းလဲစေမည့် နည်းဗျူဟာ သို့ သူတို့တိုက်စစ်ကို အကောင်းဆုံးရင် ဆိုင်နိုင်မည့် ခံစစ်နည်းဗျူဟာနှင့် အတူ လုံလောက်သော ပြင်ဆင်မှုများ တုန့်ပြန်နိုင်မည့် နည်းလမ်းများကို ကြိုတင်ဆောင်ရွက်ထားရန် အလွန်အရေးကြီး နေပေပြီ ။
ပို၍ အရေးကြီးသည့် အချက်မှာ တူညီသော ရည်မှန်းချက်ဖြင့် ဟန်ချက်ညီစွာ လှုပ်ရှားနိုင်မည့် စုစည်းအား အတွက် နားလည်မှု များစွာ ကြိုတင် တည်ဆောက်ထား သင့်ပြီ ဟု အမှန်တရား ဂျာနယ်မှ အလေးအနက် တင်ပြအပ်ပါသည်။
၂၀၀၉ စုစည်းလှုပ်ရှားမှု ကော်မတီ၏ နှစ်ပါတ်လည် အစီရင်ခံစာ
၂၀၀၉ခုနှစ် ဇန်နဝါရီလ ၁ရက်နေ့မှ စတင်ဖွဲ့စည်းခဲ့သော ၂၀၀၉ စုစည်းလှုပ်ရှားမှု ကော်မတီ၏ အဓိက ရည်မှန်းချက်မှာ ၂၀၁၀ အတုအယောင်ရွေးကောက်ပွဲကို ဆန့်ကျင် တိုက်ခိုက်သွားရန်ဖြစ်ပြီး၊ ဒေါ်အောင်ဆန်းစုကြည်နှင့် နိုင်ငံရေး အကျဉ်းသား အားလုံး ချွင်းချက်မရှိ လွှတ်ပေးရေး၊ စစ်မှန်သော တွေ့ဆုံဆွေးနွေးမှု ပေါ်ပေါက် လာစေရေးနှင့် တရား မျှတမှု ကင်းမဲ့သော ၂၀၁၀ ရွေးကောက်ပွဲကို တားဆီးနိုင်ရေးတို့ အတွက် လုပ်ငန်းစဉ် များ အနေဖြင့်- ညီညွတ်စွာ အားလုံးပူးပေါင်း ဆောင်ရွက်နိုင်မည့် တခုတည်းသော နည်း လမ်းတခုဖြစ်ပေါ်လာစေရန်-
- တိုက်တွန်း နှိုးဆော်ပေးခြင်း၊ စည်းရုံး လှုပ်ရှားခြင်း၊ အားပေး ဆောင်ရွက်ခြင်း၊ အကြံ ဥာဏ်ပေးခြင်း။
-ပြည်သူ လူထုများ အသိပညာ ရရှိစေနိုင်မည့် သတင်းများ၊ အချက်အလက်များကို နည်းမျိုး စုံသုံး၍ဖြန့်ချီပေးရန်။
-ပြည်တွင်း ပြည်ပ နိုင်ငံရေး လှုပ်ရှားမှုများ ပေါ်ပေါက်လာစေရန် အတူတကွ ပူးပေါင်း လက်တွဲ ဆောင်ရွက်ကြရန်။ စသည့် လုပ်ငန်းစဉ်များကို ချမှတ်ဆောင်ရွက်ခဲ့ပါသည်။
ထို့အတူ နိုင်ငံရေးဦးဆောင် အဖွဲတခုဖြစ်သော NCGUB မှ ပြည်သူ့လွှတ်တော် ကိုယ်စား လှယ်များကို ညီညွတ်စွာ ဦးဆောင်မှု ပေးရန် အတွက် ပြည်သူလူထု ၅၀၀ကျော်၏ လက်မှတ်များနှင့် စာရေးသားတောင်းဆိုမှု ကမ်ပိန်းတခုကို ဆောင်ရွက်ခဲ့ပြီး ထိုတောင်းဆိုစာကို ယခင်ပြည်သူလွှတ်တော် ကိုယ်စားလှယ် ယခု NCGUB အလုပ်သ မားရေးရာ ဝန်ကြီး ဦးခွန်မြင့်ထွန်းမှ တဆင့်ပေးပို့ခဲ့ပါသည်။
ထို့အတူ ဇန်နဝါရီလ ၂၁နှင့် ဖေဖေါ်ဝါရီ ၉ရက်တို့တွင် အမေရိကန် သမ္မတ အိုဘားမားထံ အိတ်ဖွင့်ပေးစာ နှစ်စောင်ကို၎င်း ၊ မတ်လ ၇ရက်နေ့တွင် ၂၀၁၀ ရွေးကောက်ပွဲကို ကန့်ကွက်ရန် အွန်လိုင်း လက်မှတ်ရေးထိုးတောင်းဆိုမည့် ကမ်ပိန်း တခုကို လည်း ဆောင်ရွက်ခဲ့ပါသည်။ (ထိုကမ်းပိန်းမှာ သတ်မှတ်ထားသော လက်မှတ်အရေ အတွက် မရရှိသည့် အတွက် အောင်ဖြင်မှု မရရှိခဲ့ပါ။ ထိုသို့ ဖြစ်ရခြင်းမှာ အခြားသော နိုင်ငံရေး ဦးဆောင် အဖွဲကြီးများ၏ ၂၀၁၀ နှင့် ပါတ်သက်သော သဘောထားများ ရှင်းလင်းစွာ ထုတ်ပြန် ခဲ့ခြင်း မရှိသေးခြင်းကြောင့်လည်းကောင်း၊ အခြားသော ကမ်ပိန်းကြီးများနှင့် ဥပမာ နိုင်ငံရေး အကျဉ်းသားအားလုံး လွတ်မြာက်ရေး တောင်းဆိုမှု ကမ်ပိန်း တို့နှင့် တိုက်ဆိုင် နေ ခဲ့ခြင်း တို့ကြောင့် ဖြစ်ပါသည်။)
ဒေါ်အောင်ဆန်းစုကြည်နေအိမ်သို့ ဂျွန်ယက်တော ဝင်ရောက်သည့် ကိစ္စနှင့် ပါတ်သက် ၍ တရားစွဲဆိုနေစဉ်က မဲဆောက် ဒေသရှိ နိုင်ငံရေး အဖွဲ့ အစည်း၊ အလုပ်သမား အဖွဲ့ အစည်း တချို့နှင့် ပူးပေါင်းကာ Joint Action Committee ကိုဖွဲ့စည်းကာ မေလ ၂၄ ရက် နေ့က မဲဆောက်မြန်မာ ချစ်ကြည်ရေး တံတားအောက်တွင် ဆန္ဒပြပွဲ တကြိမ်၊ မေလ ၂၇ရက်က မဲဆောက်မြို့ UNHCR ရုံးရှေ့တွင်တကြိမ် ဆန္ဒပြ၍ မစ္စတာ ဘန်ကီမွန်းထံ အိတ်ဖွင့်ပေးစာ တစောင် ပေးအပ်ခဲ့ပြီး၊ ဇွန်လ ၄ရက်နေ့က ဘာသာပေါင်းစုံ ဆုတောင်းပွဲ တကြိမ်နှင့် ဇွန်လ ၇ရက်နေ့က မဲဆောက် ချစ်ကြည်ရေး တံတားရှေ့တွင် တကြိမ် ဆန္ဒပြခဲ့ပြီး ထိုင်းဝန်ကြီးချုပ် အဘိဆစ်ကို အိတ်ဖွင့် ပေးစာ တစောင်ပေးပို့ခဲ့ပါသည်။ ထိုဆန္ဒပြပွဲ များသည် မဲဆောက်မြို့တွင် နှစ်နှစ်ဆယ် အတွင်း အဖမ်းအဆီး အနှောင့်အယှက် မရှိ ပဲ အောင်မြင် စွာ ပြုလုပ်နိုင်ခဲ့သော ဆန္ဒပြပွဲများဖြစ်ပါသည်။
ဒေါ်အောင်ဆန်းစုကြည် မွေးနေ့ ဆုတောင်းပွဲနှင့် ၈၈၈၈ ၂၁နှစ်ပြည့် ဘာသာပေါင်းစုံ ဆုတောင်းပွဲ တို့ကိုလည်း ဆောင်ရွက် နိုင်ခဲ့ပြီး တခြားသော အဖွဲ့ အစည်းများ၏ လှုပ် ရှား ဆောင်ရွက်မှုများတွင်လည်း တတ်စွမ်းသမျှ ပူးပေါင်း ပါဝင် ဆောင်ရွက်ခဲ့ပါသည်။
ယခုအခါတွင် ၂၀၀၉ စုစည်းလှုပ်ရှားမှုကော်မတီ အနေဖြင့် ပြည်တွင်း ပြည်ပ အဖွဲ့ပေါင်း ၁၀၀ကျော်ဖြင့် ဖွဲ့စည်းထားသော GAB ခေါ် Global Action for Burma ၏ အဖွဲ့ ဝင် အဖွဲ့ တခု အနေဖြင့် ဆက်လက် ပူးပေါင်းဆောင်ရွက်နေပါသည်။
(မှတ်ချက်။ ။ ၂၀၀၉ စုစည်းလှုပ်ရှားမှု ကော်မတီသည် ယုံကြည်ချက်တူသူများ စုစည်း ဆောင်ရွက်နေသည့် အဖွဲ့အစည်းဖြစ်ပြီး မိမိတို့ ကိုယ်ပိုင် ငွေကြေးဖြင့် သာ စုစည်း ဆောင်ရွက်နေကြခြင်း ဖြစ်ပါသည်။ )
ကျေးဇူးစကား နှုတ်ခွန်းဆက်စကား
လာမည့် ဒီဇင်ဘာလ ၁ရက်နေ့ဆိုလျှင် ၂၀၀၉ စုစည်းလှုပ်ရှားမှု ကော်မတီ၏ သက်တမ်း တနှစ်ပြည့်မြောက်ခဲ့ပြီ ဖြစ်သလို အလုပ်အမှုဆောင် အဖွဲ့၏ ဆုံးဖြတ်ချက်ဖြင့် ထုတ်ဝေခဲ့သော အမှန်တရား ဂျာနယ်သည်လည်း ယခုလတွင် ၁၀ အုပ်မြောက်အဖြစ် ထုတ်ဝေ၍ ယခုနှစ် သက်တမ်း အတွက် အဆုံးသတ် တော့မည် ဖြစ်သည်။
နောက်ထပ်ထုတ်ဝေရန် မထုတ်ဝေရန်ကိုမူ လာမည့် အလုပ်အမှုဆောင် ကွန်ဖရင့်မှ ဆုံးဖြတ် မည် ဖြစ်ရာ အယ်ဒီတာ အဖွဲ့မှ ယခုနှစ်အတွက် ကျေးဇူးတင် နူတ်ဆက်စကားကို ပြောလို ပါသည်။
ဖန်ငွေဟူ၍ မရှိပဲ ယုံကြည်ချက်တူသူများ၏ စုစည်းမှုဖြင့် အမှန်တရားကို ဖေါ်ပြရန် ပြည်သူ လူထုများကို အသိပညာပေးရန်နှင့် ဖျော်ဖြေတင်ဆက်မှုပေးရန် အမှန်တရားဂျာနယ်ကို ထုတ်ဝေခဲ့ကြ ရာတွင် ငွေကြေးအခက်အခဲ၊ နည်းပညာအခက် အခဲတို့သာမက အမျိုးမျိုးသော အခက် အခဲပေါင်း များစွာကို ရင်ဆိုင်ခဲ့ ကြရသည်။
ထိုအခက်အခဲများကို ကြံ့ကြံ့ခံ လက်တွဲရင်ဆိုင်ခဲ့ကြသော စုစည်းလှုပ်ရှားမှု ကော်မတီ အဖွဲ့ဝင် များကိုလည်း အယ်ဒီတာ အဖွဲ့မှ ကျေးဇူး အထူးတင်ရှိပါကြောင်း မှတ်တမ်း တင်လိုပါသည်။
အထူးသဖြင့် ကွန်ပြူတာ ဖိုင်ထုတ်ပေးလိုက်ပြီးသည့် အချိန်မှ စာအုပ် ဖြစ်မြောက်သည်အထိ မအိပ်မနေ ကူညီဆောင်ရွက်ပေးခဲ့သော ဦးဇနကနှင့် ABMA အဖွဲသားများကို၎င်း၊ ပံ့ပိုးထုတ်ဝေ ပေးခဲ့ သည့် ABMA အဖွဲ့ကြီးကို၎င်း၊ စိတ်ဓါတ်အား ငွေအား လူအားဖြင့် တတ်စွမ်းသမျှ ကူညီ အားပေး ခဲ့ သည့် ကိုမန်းမျိုးမြင့်၊ ဤဂျာနယ်၏ အခြေခံ ဒီဇိုင်းကို ရေးဆွဲပေးခဲ့သော ကိုစံနှင့် အမြဲ ဝိုင်းဝန်း အားပေး၍ စာနယ်ဇင်းအတွေ့အကြုံဖြင့် အကြံပြု ကူညီပေးသူ ဆရာနေမျိုးအေး (ရဲခေါင် မဲမောင်) တို့အား အထူးကျေးဇူးတင်ရှိပါကြောင်း မှတ်တမ်းတင် လိုပါသည်။
ထို့အတူ ဤဂျာနယ်တွင် ဝိုင်းဝန်းပါဝင် ရေးသားပေးကြသည့် စာရေးသူများ၊ ခွင့်ပြုချက် ရယူနိုင် ခဲ့ခြင်း မရှိပဲ ပင်တိုင်နီးပါး ကူးယူသုံးစွဲခဲ့သည့် ဧရာဝတီ၏ ပင်တိုင် သရော်စာဆောင်းပါးရှင် ဆရာ ရန်ကုန်သား တာတေနှင့် အခြားသော စာရေးဆရာ ကဗျာဆရာကြီးများကိုလည်း အထူးကျေးဇူး တင်ရှိ ရပါကြောင်း ပြောလိုပါသည်။
နောက်ဆုံး အနေဖြင့် ကျွန်တော်နှင့်အတူ ကျောချင်းကပ် ရင်ချင်းအပ်၍ ဝိုင်းဝန်း လုပ်ကိုင်ခဲ့ ကြသော အယ်ဒီတာအဖွဲ့ဝင် အဟောင်းအချို့နှင့် လက်ရှိ အယ်ဒီတာအဖွဲ့ဝင်များကို၎င်း ဖတ်ရှု အားပေး ကြသည့် စာဖတ်သူ တိုင်းရင်းသား ပြည်သူအားလုံးကို ကျေးဇူးအထူး တင်ရှိပါကြောင်း မှတ်တမ်းတင် အပ်ရင်း အမှန်တရားဂျာနယ်မှ နူတ်ခွန်းဆက်သ အပ်ပါသည်။
GAB အဖွဲ့ကြီး၏ အမျိုးသားလွတ်မြောက်ရေး တိုက်ပွဲခေါ်သံ
No comments:
Post a Comment