၂၀၁၀ အရေး ကျွန်တော့် အတွေးအမြင်များ

အတိုက်အခံတွေမှာ အမျိုးမျိုး ပိတ်ပင်ခံနေရတာတွေ ရှိနေဆဲမှာပဲ မြန်မာ့အရေး ဆွေးနွေးပွဲ ကျင်းပရေး ကော်မတီ ဆိုသူတွေက လာမယ့် ဇန်နဝါရီလ ၁၆ ရက်နေ့မှာ ဆွေးနွေးပွဲ ထပ်မံလုပ်ဦးမယ်လို့ ဖိတ်စာတွေ ထပ်မံ ဝေနေပြန်ပါပြီ။
ဒေါ်အောင်ဆန်းစုကြည် နှင့်တကွ နိုင်ငံရေး အကျဉ်းသားတွေ လွတ်မြောက်ရေးနဲ့ ဒေါ်အောင်ဆန်းစုကြည် ကမ်းလှမ်း ထားတဲ့ တွေ့ဆုံဆွေးနွေး အဖြေရှာရေးနဲ့ ပါတ်သက်ပြီး တခွန်းတပါဒမှ မပြောသွားတဲ့ ဗိုလ်ချုပ်မှူးကြီး သန်းရွှေရဲ့ လွတ်လပ်ရေးနေ့ သဝဏ်လွှာမှာ အခု ၂၀၁၀ မှာ ရွှေးကောက်ပွဲကို မဖြစ်မနေ ကျင်းပသွားမှာ ဖြစ်တယ်လို့ တရားဝင် ပြောကြားသွားခဲ့တဲ့ အပေါ် နိုင်ငံတကာနဲ့ အတိုက်အခံတွေရဲ့ ဝေဖန်ချက်တွေ အဆက် မပြတ် ထွက်ပေါ် လာနေဆဲမှာပဲ မြန်မာ့အရေးဆွေးနွေးပွဲ ကျင်းပရေး ကော်မတီလို့ အမည်ခံထားတဲ့ သူတွေရဲ့ ဖိတ်စာကို ပြည်တွင်းမှာ လိုက်လံ ဝေနေခဲ့တာ ဖြစ်ပါတယ်။
အဲဒီသူတွေနဲ့ ပါတ်သက်ပြီး ပြည်တွင်း ပြည်ပက အတိုက်အခံတွေနဲ့ ဝဘ်ဆိုက်တွေရဲ့ သုံးသပ်ချက်တွေနဲ့ သူတို့ရဲ့ လက်ရှိ အနေ အထားတွေကို ကျွန်တော်တို့ရဲ့ မေးလက်တာတွေမှာ တင်ပြ ပေးပို့ခဲ့ပြီးဖြစ်လို့ အကျယ် ချဲ့ပြီး မပြောလိုတော့ ပါဘူး။
ကျွန်တော်တို့ အနေနဲ့ တခု တင်ပြလိုတာကတော့ အဲဒီသူတွေဟာ သူတို့ရဲ့ လုပ်ရပ်တွေ ထုတ်ပြန် ကြေငြာချက်တွေနဲ့ ပါတ်သက်ပြီး သတင်းဌာနတွေက ထုတ်ပြန်ပေးစေချင်တဲ့ ဆန္ဒနဲ့ သတင်းသမားတွေကို လိုက်လံ ဆက်သွယ် နေတာ ဖြစ်ပါတယ်။
သူတို့ရဲ့ လုပ်ရပ်နဲ့ ပြောဆိုချက်တွေက သူတို့ဟာ ၂၀၁၀ မှာ ရွေးကောက်ပွဲ ဝင်နိုင်ဖို့အတွက် ပြည်သူလူထုတွေ သူတို့ အဖွဲ့အပေါ် စိတ်ဝင်စားမှု ရှိလာအောင် လုပ်ဆောင်နေတယ်ဆိုတာ ထင်ရှားစွာ တွေ့ရပါတယ်။ ၈၈ မျိုးဆက်တွေ ပါတယ်၊ ဘယ်သူတွေ လာတက်တယ် စတဲ့ အချက်တွေနဲ့ ပြည်သူလူထုတွေက သူတို့ ရွေးကောက်ပွဲ ဝင်တဲ့အခါ ထင်ယောင်ထင်မှား မဲထည့်လေမလားဆိုတဲ့ ရည်မှန်းချက်နဲ့ အခွင့်အရေး မက်မောတဲ့ နာမည်ပျက် ပြီးသား လူတွေကို အသုံးချပြီး လုပ်နေတာ ဖြစ်တယ်လို့ ကျွန်တော်တို့ ဘလော့က သုံးသပ်ပါတယ်။
အဲဒီ လုပ်ဆောင်မှုတွေကို နအဖဆီက တရားဝင် ခွင့်ပြုချက် တောင်းပြီးမှ လုပ်ဆောင်ခဲ့တာ ဖြစ်ပါတယ်။ နအဖ ကလည်း ဘယ်သူမှ ဆေးဖေါ်ကြောဘက် မလုပ်တဲ့ သူတို့ရဲ့ ၂၀၁၀ ရွေးကောက်ပွဲကို အသိအမှတ်ပြုတဲ့လူရှိ နည်းလား ဆိုတဲ့ ရည်မှန်းချက်နဲ့ ခွင့်ပြုထားခဲ့တာပါ။
အဲဒီ အမျိုးသားနိုင်ငံရေး ဆွေးနွေးပွဲ ကော်မတီဆိုသူတွေ နားမလည်သေးတဲ့ အချက်ကို ကျွန်တော်တို့ အနေနဲ့ ဟိုက်လိုက် လုပ်ပေးချင်တာက နအဖဟာ လာမည့် ၂၀၁၀ ရွေးကောက်ပွဲကို တခြားလူတွေကို ကြိုးတုပ်ထားပြီး တကောင်ထဲ ပြေးခိုင်းထားတဲ့ သူတို့ရဲ့ခိုင်းနွားကြီး ကြံဖွံ့က လွဲရင် ဘယ်သူကိုမှ အနိုင်မပေးပါဘူးဆိုတာ ပါပဲ။
သူတို့တို့က ကိုယ့်ကိုကိုယ် ထင်တလုံးနဲ့ စစ်ကျွန်စာရင်း ပြေးသွင်းပေမယ့် သူတို့တို့ရမှာက အေးလွင်တို့လို သိပ်ကဲ လာရင် နွားကြိမ်နဲ့ အရိုက်ခံရမယ်။ နောက် လိုအပ်တယ်ထင်ရင် နွားသတ်ရုံ အပို့ခံရမယ် ဆိုတာပါပဲလို့ ထောက်ပြ ချင်ပါတယ်။
အဲဒီကြားထဲမှာ NLD ရွေးကောက်ပွဲ ဝင်မှ ဖြစ်မယ်ဆိုတဲ့ အတွေးအခေါ်ကို ဖြန့်ဝေလာတဲ့ သူတွေကိုလည်း တဆက်တည်း ပြောပြချင်တာ တခုရှိပါတယ်။ အဲဒီရေးတဲ့ ဆောင်းပါးကိုလည်း ကျွန်တော်တို့ မေးလက်တာမှာ ဖေါ်ပြထားပါတယ်။ အဲဒီဆောင်းပါးရှင်ဟာ ပရိုပိုစယ်စားနေတဲ့ နိုင်ငံရေး အဖွဲ့အစည်း တချို့ကို ပုတ်ခတ် ပြောဆို ထားပေမယ့် အဲဒီ ဆောင်းပါးရှင် ပြောတဲ့ အယူအဆဟာ အဲဒီ ပရိုပိုဆယ် ပေးနေတဲ့ နိုင်ငံခြားနဲ့ NLD အခက် တို့ အချက်ဆိုတဲ့ ပြည်တွင်း ပုဂ္ဂိုလ်များရဲ့ အတွေးအခေါ်တွေကပဲ လာတာ ဖြစ်ပါတယ်။ နိုင်ငံခြားသား အချို့က (အထူးသဖြင့် ပရိုပိုစယ်ပေးနေတဲ့ အဖွဲ့တွေက ရွေးကောက်ပွဲ ဝင်ပြိုင် သင့်တယ် ဆိုတဲ့ အချက်ကို တော်တော်လေး ဖိပြောတာ ကျွန်တော်တို့ တွေ့ရပါတယ်။ )
သူတို့ရဲ့တွက်ကိန်းထဲမှာ ဖွဲစည်းပုံ အခြေခံ ဥပဒေက ဘာပဲပြောပြော ၂၀၁၀ရွေးကောက်ပွဲမှာ စစ်ဗိုလ် တမတ်သား မကလို့ ငါးမူးသားပဲ ဖြစ်ဖြစ် ရွေးကောက်ပွဲမှာ ကျွန်တော်တို့ အတိုက်အခံတွေဘက်က ဝင်ပြိုင်မှ အတိုက်အခံတွေ ကိုထောက်ခံတဲ့သူတွေက မဲတွေပေးကြမယ်။ နောက် မဲရတဲ့ အမတ်တွေမှာ ပြောရေးဆိုခွင့် လုပ်ပိုင်ခွင့် အထိုက်အလျှောက်ရမယ် ဆိုတာပါ။ အဲဒီအချက်ကို သူတို့ ကိုးကားချက်ပေးတာက အနှစ်နှစ်ဆယ် ကျော် အတွင်းမှာ ကျွန်တော်တို့ အတိုက်အခံတွေက အပြောင်းအလဲဖြစ်အောင် ဘာမှ မလုပ်နိုင်ဘူး။ လက်ရှိ မှာလဲ အပြောင်းအလဲ ဖြစ်အောင်မလုပ်နိုင်ဘူး ။ ဒါကြောင့် ၂၀၁၀ ထဲမှာ ဘာပဲ ဖြစ်ဖြစ် ရွေးကောက်ပွဲဝင်ပြီး အပြောင်းအလဲကို ရှာသင့်တယ် ဆိုတဲ့ သူတို့ရဲ့ နိုင်ငံခြားပေတံကြီးနဲ့ တိုင်းပြီးပြောတာပါ။
သူတို့သိတာ မဲလိမ်ရင် တိုင်လို့ရတယ်။ ရွေးကောက်ပွဲ မတရားမှုတွေကို သူတို့ နိုင်ငံခြားတွေမှာ စာနယ်ဇင်းတွေ ဒါမှမဟုတ် သက်ဆိုင်ရာ လူ့အခွင့်အရေး ဆိုင်ရာ အဖွဲ့အစည်းတွေက ဝိုင်းတင်ပြလိုက်ရင် အပြောင်းအလဲ တွေ ပြန်ဖြစ်နိုင်တာကိုး။
ဒါဆိုရင် ကျွန်တော် တခုတင်ပြချင်တာက ၁၉၉၀ တုန်းက NLD ရွေးကောက်ပွဲမှာ လူထုမဲ ဆန္ဒနဲ့ အပြတ်အသတ် အနိုင်ရခဲ့ပြီး အဲဒီတုန်းက နဝတ က အာဏာ မလွဲပေးတဲ့ အချိန်မှာ အဲဒီ ပုဂ္ဂိုလ်ကြီးများ ဘာတွေ ပြောင်ပြောင် မြောက်မြောက် လုပ်ပေးနိုင်ခဲ့ပါသလဲ။ ဒီထက်စစ်မှန်တဲ့ လူထုဆန္ဒကို ကျွန်တော်တို့ မြန်မာ နိုင်ငံသားတွေ ဘယ်လို ပြပေးရမှာပါလဲ။
ကမ္ဘာ့ အမြင့်ဆုံးဆိုတဲ့ ကုလသမဂ္ဂ အဖွဲ့ကြီးမှာ ဘာတွေ လုပ်ပေးနိုင်ခဲ့ပါသလဲ။ ပြန်ပြောပြစရာ မလိုတော့ ပါဘူး ခင်ဗျား။
၂၀၀၈ ခုနှစ် နာဂစ် လေမုန်တိုင်းကြီး တိုက်ခတ်လို့ လူတွေ သိန်းနဲ့ချီ သေပြီး သန်းနဲ့ချီ ဒုက္ခတွေ ပင်လယ် ဝေနေချိန်မှာ ဗေဒင်ဆရာပေးထားတဲ့ အခါတော် ပျက်မှာစိုးလို့ အလောင်းပုံပေါ်မှာ ဖြစ်အောင်လုပ်သွားတဲ့ မဲဆန္ဒပေးပွဲ ကိုကော အဲဒီ လူကြီးမင်းများက ဘာတွေ ပြောင်ပြောင်မြောက်မြောက် ပြောဆိုပေးခဲ့ပါသလဲ။ မဲပေး တဲ့ အချိန်မှာကော ဘယ်လို လေ့လာသူမျိုးတွေကို လက်ခံခဲ့လို့ ဘယ်လိုစံနဲ့ လက်ခံပေးခဲ့တာပါလဲခင်ဗျား။
အားလုံးကို ခြုံပြီးပြောရရင် အနောက်တိုင်းက ပေတံကြီးအတိုင်း ပြောနေတဲ့ အချက်အလက်တွေ စံတွေအတိုင်း ၁၉၉၀ ခုနှစ်ရွေးကောက်ပွဲမှာ ကျွန်တော်တို့ ပြည်သူတွေ ကြိုးစားပေးခဲ့ပါပြီ ခင်ဗျား။
အဲဒီအပေါ်မှာတောင် ဘာမှ မလုပ်ပေးနိုင်ပဲနဲ့ အနောက်တိုင်းက ပုဂ္ဂိုလ်ကြီးတွေနဲ့ ပြည်တွင်းပြည်ပက မြန်မာ့ နိုင်ငံရေး ပညာရှိများက ဘာတွေများ ကျွန်တော်တို့ ပြည်သူတွေကိ်ု လုပ်စေချင်ပါသလဲ။ တကယ်လို့များ NLDကို ၂၀၁၀ ရွေးကောက်ပွဲ ဝင်စေချင်ရင် သို့ ခင်ဗျားတို့ အမြှီးပြတ်သလို ပြတ်စေချင်ရင် ကျွန်တော့် အနေနဲ့ NLD ကိုယ်စား အာမ ခံချက် နှစ်ခုပဲ တောင်းပါမယ်။
ပထမ တချက်က UN အတွင်းရေးမှူးချုပ် ဘန်ကီမွန်းက ၂၀၁၀ ရွေးကောက်ပွဲမှာ တရားမျှတတဲ့ အခြေခံ အချက်တွေ ရစေပါမယ်လို့ အာမခံချက်ပေးပါ။ နောက်တချက်က ဒီမိုကရေစီ နိုင်ငံများရဲ့ ဦးဆောင်လို ဖြစ်နေတဲ့ အမေရိကန် သမ္မတ အိုဘားမား အာမခံချက်ပေးပါ။ (လက်ရှိမှာတော့ အိုဘားမားက နအဖလုပ်မယ့် ရွေးကောက် ပွဲကို ဒီအတိုင်းဆို အယုံအကြည် မရှိကြောင်း ပြောသွားခဲ့ပါပြီ။ ) သူတို့တောင်းတဲ့ တရားမျှတတဲ့ အခြေခံ အချက်တွေကို နအဖက လက်ခံ လိုက်လျှောပေးမယ်ဆိုရင် ၊ ဒါမှမဟုတ် ဒေါ်အောင်ဆန်းစုကြည်က တောင်းဆိုထားတဲ့ တွေ့ဆုံ ဆွေးနွေး အဖြေရှာရေးမှာ လက်ခံဆွေးနွေး အဖြေရှာကြမယ်ဆိုရင် ဒါမှမဟုတ် သူတို့ တင်ပြထားတဲ့ ရွှေဂုံတိုင် ကြေငြာချက်ကို နအဖက လက်ခံဆွေးနွေး ပေးနိုင်မယ်ဆိုရင် ဒါဟာ သင့်တင့် မျှတတဲ့ အခြေခံမူ မဟုတ်ဘူးလို့ ဘယ်နိုင်ငံခြား ဆရာကြီးများနဲ့ ၊ အာဏာယူချင်ကြတဲ့ ဆရာ့ ဆရာကြီးများ ငြင်းရဲ ပါသလဲ ခင်ဗျား။
ကိုလိုနီခေတ်က မြန်မာ့နိုင်ငံရေး ခေါင်းဆောင်များ ပြောခဲ့ကြတဲ့ အင်္ဂလိပ်အခက် ဗမာ အချက် ဆိုပြီး တိုင်းပြည် လွတ်လပ်ရေးအတွက် တိုက်ပွဲဝင်ခဲ့ကြတဲ့ ပုံစံမျိုးကို ပုံတူကူးလို့ NLD အခက် တို့အာဏာရဖို့ အတွက်ဆို လုပ်နေကြမယ် ဆိုရင်ဖြင့် ခင်ဗျားတို့လဲ ဘာမှမဖြစ် တိုင်းပြည်အတွက်လဲ ဘာမှ မဖြစ်ပဲ စစ်ကျွန်သက်ကတော့ ဆက်ဆက်လို့ ရှည်နေဦးမယ် ဆိုတဲ့အကြောင်း တင်ပြလိုက်ရပါတယ် ခင်ဗျား။ ။
(မှတ်ချက် ။ ။ ရွှေဝါရောင် သတင်းလွှာ၏ ပြည်တွင်းသတင်းထောက်ပေးပို့သော အချက်အလက်များအပေါ် အခြေခံ၍ ရေးသားခြင်း ဖြစ်ပါသည်။ နောက်တချက် အထူးပြု ပြောလိုသည်မှာ ကျွန်တော့် အနေဖြင့် ဘယ်တုန်း ကမှ NLD ပါတီဝင် အဖြစ်ဝင်ရောက်ခဲ့ဘူးခြင်း မရှိပါ။ ထို့အတူ ကျွန်တော်တို့ မေးလက်တာမှာလည်း မည်သည့် ပရိုပိုစယ်မှ ရ၍ လုပ်ဆောင်နေခြင်း မဟုတ်ပဲ မိမိတို့၏ နိုင်ငံသား တာဝန်သိ စိတ်ဖြင့်သာ ကိုယ်ပိုင် ငွေကြေးဖြင့် ဆောင်ရွက်နေခြင်း ဖြစ်ပါသည်။ )

ရွက်စိမ်း