5.07.2010

ရွေးကောက်ပွဲ တရားမျှတရေး ရေးရေးပင်မမြင်

ရန်ကုန် မေ ၇။
လက်ရှိလေ့လာတွေ့ရှိရသော အချက်အလက်များအရ ဝန်ကြီးချုပ် ဦးသိန်းစိန်နှင့် အခြားဝန်ကြီးနှင့် ဒုဝန်ကြီး ၂၇ဦးတို့ ဗဟိုကော်မတီ အဖြစ် ဦးဆောင်နေသော ကြံ့ဖွံ့ပါတီသည် လက်ရှိမှတ်ပုံတင်ထားသော ပါတီ ၃၆ ပါတီတွင် အင်အား အကြီးမားဆုံးဖြစ်နေသည်ဟု သိရသည်။ 
ထိုပါတီနှင့် ပါတ်သက်သူ တဦး၏ ပြောပြချက်အရ ကြံဖွံ့ပါတီကို ထူထောင်သူ ၂၇ဦးတွင် ဝန်ကြီးချုပ် ဦးသိန်းစိန် အပါအဝင် ဝန်ကြီး ၅ဦး၊ ရန်ကုန်တိုင်း ဒုတိယ တိုင်းမှူးတဦး နှင့် ကျန်လူများမှာ ဒုတိယဝန်ကြီးများ ဖြစ်ကြသလို မကြာသေးခင်ကမှ သူတို့၏ စစ်ဘက်ဆိုင်ရာ ရာထူးများမှ နုတ်ထွက်ခဲ့ကြသူများ ဖြစ်ပါသည်။ ထိုအထဲတွင် ပါဝင်ကြသူများမှာ ရာထူးမြင့် စစ်တပ်အရာရှိကြီးများ သာ ဖြစ်ကြပါသည်။ ထင်ရှားသူများမှာ - ဝန်ကြီးချုပ် ဗိုလ်ချုပ်ကြီးသိန်းစိန်၊ စိုက်ပျိုးရေးနှင့် ကူးသန်း ရောင်းဝယ်ရေး ဝန်ကြီး ဗိုလ်မှူးချုပ်ဌေးဦး ၊ အမှတ်(၂) လျှပ်စစ်စွမ်းအားဝန်ကြီး ဗိုလ်မှူးချုပ် ခင်မောင်မြင့်၊ ယဉ်ကျေးမှု ဝန်ကြီး ဗိုလ်မှူးချုပ် ခင်အောင်မြင့်၊ သယ်ယူပို့ဆောင်ရေး ဝန်ကြီး ဗိုလ်မှူးချုပ် သိန်းရွှေတို့ ပါဝင်ကြပါသည်။
ထိုအခြေအနေများကြောင့် လာမည့် ၂၀၁၀ ရွေးကောက်ပွဲတွင် ကြံဖွံ့ပါတီ အနိုင်ရစေရေးအတွက် လိုအပ်သော ငွေကြေး အရင်းအမြစ်နှင့် လူသားအရင်းအမြစ်များမှ စ၍ လိ်ုသည်သမျှကို စစ်အစိုးရဆီမှ ရရှိမည်ဖြစ်ရာ ရန်ကုန်မှ နိုင်ငံရေး လေ့လာသူများက ကြံဖွံ့ပါတီကို အစိုးရပါတီဟု ခေါ်ဝေါ်သုံးစွဲ နေကြပါသည်။
အမှန်တကယ်မှာလည်း ကြံဖွံ့အဖွဲ့ကြိးကို ကြီးမားသော အဖွဲ့အစည်းကြီးအဖြစ် ၁၉၉၃ခုနှစ် စက်တင်ဘာလက ဖွဲ့စည်းတည်ထာင်ပေးခဲ့ပြီး ဥက္ကဌမှာ ဗိုလ်ချုပ်မှူးကြီးသန်းရွှေ ဖြစ်ပါသည်။ ၂၀၀၇ ခုနှစ်က သူတို့၏ ထုတ်ပြန်ချက်အရ သူတို့အဖွဲ့ဝင် အင်အားသည် ၁၈နှစ်အောက် လူငယ်များပါ အပါအဝင် ၂၅ သန်းရှိနေပြီဟု ကြေငြာသွားခဲ့ပါသည်။
NLD ၏ ဗဟိုကော်မတီဝင် ဦးဝင်းတင်က စစ်အစိုးရအနေနှင့် အခြားပါတီများကို သူတို့ပါတီ မဲအများစု အနိုင်ရနေလျှင်သော်မှ ရွေးကောက်ပွဲတွင် နေရာအနည်းငယ်ကိုပင် မပေးရအောင် စီစဉ်ထားသည်ဟု ဝေဖန် ပြောဆိုခဲ့ကြောင်း သိရပါသည်။
စတင်တည်ထောင်စဉ် ကတည်းကပင် ငွေအားလူအား နည်းအမျိုးမျိုးဖြင့်  ပံ့ပိုးပေးခဲ့သလို ၊ ယခုအခါ ရာထူးလက်ရှိ ဝန်ကြီးချုပ်နှင့် ဝန်ကြီးများ ၊ဒုဝန်ကြီးများ ဦးဆောင်နေသည့်ပါတီသည် ယခင်ကဲ့သို့ပင် ထောက်ပံ့ ကူညီမှုများကို ဆက်လက်ရယူသွားမည့် အစိုးရပိုင် ကြံ့ဖွံ့ပါတီနှင့် ယှဉ်ပြိုင်ရမည့် အခြားပါတီများ အတွက် တရားမျှတသော အခွင့်အရေးများကို ရေးရေးပင် မတွေ့ရဟု လေ့လာသူများက သုံးသပ်ပြောဆို နေကြပါသည်။
ပြည်တွင်းသတင်းထောက် (ရွှေဝါရောင် သတင်းလွှာ)

No comments:

Post a Comment