ရန်ကုန် ၊ သြဂုတ် ၂၂ ၊ ၂၀၁၀။
ဒီမိုကရက်တစ်ပါတီက သူတို့၏ ရွေးကောက်ပွဲ အပေါ်တွင် ထားရှိသော သဘောထားနှင့် ပါတ်သက်ပြီး သတင်းစာ ရှင်းလင်းပွဲတစ်ခုကို ယနေ့ နံနက်ပိုင်းက ရန်ကုန်ရှိ ပါတီ ဌာနချုပ် တွင် ပြုလုပ်ခဲ့သည်ဟု သတင်းရ ရှိပါသည်။
ယနေ့ပြုလုပ်သော သတင်းစာရှင်းလင်းပွဲတွင် ဒီမိုကရက်တစ်ပါတီက ၂၀၀၈ အခြေခံ ဥပဒေအရ ရွေးကောက်ပွဲတွင် ပြည်သူလူထုက ရွေးချယ်တင်မြှောက်သည့် ကိုယ်စားလှယ်များသည် ၇၅ ရာခိုင်နှုန်းသာ ပါဝင်ခွင့် ရပြီး စစ်တပ်မှ အလိုအလျှောက် ၂၅ ရာခိုင်နှုန်းကို ရရှိမည် ဖြစ်သဖြင့် တစိတ်တပိုင်း ဒီမိုကရေစီ စနစ်ဟု ဆိုရမည် ဖြစ်ကြောင်း ထုတ်ပြန်ခဲ့ပါသည်။
ရွေးကောက်ပွဲဆိုင်ရာ ပေါ်လစီများက တစိတ်တပိုင်း ဒီမိုကရေစီ စနစ်ကိုသာ ဖေါ်ညွှန်းသော်လည်း ဒီမိုကရက်တစ် ပါတီအနေနှင့် ဆက်လက် ဝင်ရောက် ယှဉ်ပြိုင်သွားမည်ဟု လည်း ဆိုပါသည်။
သူတို့၏ သဘောထားများကို ကြေငြာပြီးနောက်တွင် ပါတီ ဥက္ကဌ ဦးသုဝေက သူတို့ပါတီ အနေဖြင့် ကိုယ်စားလှယ် ၁၀၀ ခန့် ရွေးကောက်ပွဲတွင် ဝင်ရောက်ယှဉ်ပြိုင်ရန် တင်သွင်းသွားမည်ဟု ဆိုပါသည်။
ရွေးကောက်ပွဲ ဥပဒေအရ များပြားလှသော ပါတီ မှတ်ပုံတင်ကြေးနှင့် ကိုယ်စားလှယ်လောင်းများ အတွက် တင်သွင်းရမည့် ငွေကြေးများနှင့် ပါတ်သက်ပြီး ထောက်ပြ ပြောဆိုခဲ့သလို ရံပုံငွေကိစ္စနှင့် ပြည်သူ လူထုများကို ကြောက်ရွံ့အောင် ခြိမ်းခြောက်နေသည့် ကိစ္စသည် ရွေးကောက်ပွဲဝင်မည့် ပါတီများအတွက် အကြီးဆုံး စိန်ခေါ်မှု ဖြစ်ပါသည်ဟုလည်း ပြောပြသွားပါသည်။
သူတို့ပါတီမှ ဝင်ရောက် ယှဉ်ပြိုင်မည့် ကိုယ်စားလှယ်တစ်ဦးခြင်းစီ အတွက် တင်သွင်းရမည့် ငွေ ငါးသိန်းကို မိမိတို့ဘာသာ ကျခံရန် ပြောဆိုထားသည်ဟု ဦးသုဝေက ဆက်လက်ပြောပြခဲ့ပါသည်။
သတင်းထောက်များ၏ မေးမြန်းချက်ကို ဖြေကြားခဲ့ရာတွင် သူတို့ပါတီ အနေနှင့် မြန်မာနိုင်ငံ တဝှမ်းတွင် နေရာ နှစ်ဆယ်ခန့်တွင် ရုံးခွဲများ ဖွင့်လှစ်သွားမည်ဟု ဆိုပါသည်။
စစ်အုပ်စုမှ ကျောထောက်နောက်ခံ ပေးထားသော ကြံ့ဖွံ့ပါတီကမူ မနေ့က နေပြည်တော်ရှိ ပါတီ ဌာနချုပ် အပါအဝင် နိုင်ငံတဝှမ်းလုံးတွင် ပါတီရုံးများ ဖွင့်လှစ်ခဲ့ပါသည်။
လက်ရှိ စစ်တပ် ဝန်ကြီးချုပ် သိန်းစိန်ကမူ မနေ့ကျင်းပသော နေပြည်တော်ရှိ ပါတီဌာနချုပ်ဖွင့်ပွဲကို ကိုယ်တိုင် ဖွင့်လှစ်ပေးခဲ့ပြီး ၊ ပါတီဦးဆောင်သူများဖြစ်သော ဝန်ကြီးချုပ် သိန်းစိန် အပါအဝင် စစ်တပ် ဝန်ကြီးများ ဒုဝန်ကြီးများသည် ယခုအခါ မိမိတို့ ရာထူးများမှ နှုတ်ထွက် ခဲ့ကြပြီး ဖြစ်သည်ဟု သိရပါသည်။
ရနကုန်မြို့ရှိ ကြံဖွံ့ပါတီရုံးဖွင့်ပွဲကို ရန်ကုန် မြို့တော်ဝန်ဟောင်း ဗိုလ်မှူးချုပ် အောင်သိန်းလင်းက ဖဲကြိုးဖြတ် ဖွင့်လှစ်ပေးခဲ့သလို မန္တလေးမြို့ရှိ ပါတီရုံးဖွင့်ပွဲကို မန္တလေး မြို့တော်ဝန်ဟောင်း ဗိုလ်မှူးချုပ် ဖုန်းဇော်လွင် ကိုယ်တိုင် ဖွင့်လှစ်ပေးခဲ့ပါသည်။
ယခုအခါတွင် ရွေးကောက်ပွဲ ကော်မရှင်တွင် ပါတီပေါင်း ၄၇ပါတီ ရွေးကောက်ပွဲဝင်ရန် မှတ်ပုံတင်ခဲ့ သော်လည်း ပါတီ ၄၁ ပါတီကို မှတ်ပုံတင်ခွင့် ပြုခဲ့ပါသည်။ လက်ရှိသွားနေသော အခြေအနေအရ ကျန်ပါတီများသည် မှတ်ပုံတင်ခွင့် ရခဲ့လျှင်သော်မှ ကိုယ်စားလှယ်လောင်း တင်သွင်းခြင်း မဲဆွယ် စည်းရုံးခြင်းများ ပြုလုပ်ရန် အချိန်နှင့် အခွင့်အလမ်းများ အလွန် နည်းပါးနေသော အခြေအနေတွင် ရောက်ရှိ နေပါသည်။
No comments:
Post a Comment